Read Tzotzil 1 Juan 3 Bible Online

1 Juan 3 - Tzotzil bible

1 Juan 3

¹A'yio ava'iic, mu no'ox albajuc yepal syail xc'uxul yo'nton ti Jtotic Diose, ti laj sbisotic ta xnich'one, jech o xal xnich'nabotic ta melel. Jech o xal un, ti buch'utic sventainojic ti sba banomile, mu xa'ibeic smelol ti jech xnich'nabotic ti Diose, yu'un mu xojtiquinic ti Diose.

²Xnich'nabotic xa Dios, Jchi'iltac. Mu'yuc to quilojtic ti c'u s'elan ta jtatique. C'alal mi tal ti Jesucristoe, jna'tic xa ti jech ta xijc'ot jech c'u cha'al ti stuque, yu'un ta xquiltic ti c'u s'elane.

³Scotol ti buch'utic spatoj yo'ntonic ta smalael taje, ta sq'uel stuc'ulan sba stuc, jech c'u cha'al ti Jesucristo oy stuq'uil slequil yo'ntone.

⁴Scotol ti buch'utic ta sa'ilan ti smulique, ta sbajbeic smantal ti Diose, yu'un ti mulile, ja' jbaj-mantal ta xijc'ot yu'un.

⁵Ti vo'oxuque ana'ojic xa lec ti tal ta banomil ti Jesucristoe yo' jech tal stub xch'ay ti mulile, ac'o mi mu'yuc smul ti stuque.

⁶Ja' yu'un un cha'e, scotol ti buch'u junic xchi'uc ti Jesucristoe, ma'uc xa ta sa'ilan ti smulique. Scotol ti buch'utic ta sa'ilan ti smulique, mu'yuc yiloj, mu sna'be yo'nton ti Jesucristoe.

⁷Jnich'nab, mu me buch'u xaslo'laoxuc. Ti buch'u yacal ta spasel ti c'usi leque, oy slequil stuq'uil, yu'un ti Jesucristoe oy slequil stuq'uil ec.

⁸Ja'uc ti buch'u ta sa'ilan ti smule, ventainbil yu'un ti pucuje, yu'un ti pucuje, ta sliquebal ono'ox talel, laj sa'ilan ti smule. Ja' sventa tal Xnich'on ti Diose yo' jech ta slilinbe yabtel ti pucuje.

⁹Ti buch'utic xnich'nabtac ti Diose, mi junuc ma' ti staoj yav ta sa'ilanic ti smule, yu'un yich'ojbeic xcuxlejal Dios. Jech o xal mu staojuc yav ta sa'ilan ti smule, yu'un xnich'on xa Dios.

¹⁰Xvinaj lec buch'utic xnich'nabtac ti Diose, xchi'uc buch'utic xnich'nabtac ti pucuje. Ti buch'utic mu'yuc c'usi lec ta spase, ti mu'yuc ta xc'uxubin ti yane, ma'uc xnich'on Dios.

¹¹Xi s'elan ma' ti lequil c'op laj ava'iic talel ta sliquebale: c'uxuc xava'i abaic ta jujun tal.

¹²Mu me jechuc co'ntontic jech c'u cha'al ti Caine, ti laj smil ti yits'in ta scoj stotinoj ti pucuje. ¿C'u cha'al laj smil un? Yu'un ti c'usi ta spas ti Caine, toj chopol ta j'ech'el, ja'uc ti yits'ine, lec ti c'usi ta spase.

¹³Jchi'iltac, mu me toj ch'ayeluc xc'ot avo'ntonic yu'un ti buch'utic sventainojic ti sba banomil ti xti'et sjolic ta atojolique.

¹⁴Ti vo'otique, lijelavotic xa batel ta lajebal chamebal, lij'ochotic xa batel ta sventa cuxlejal. Jna'tic lec un, yu'un c'ux ta xca'itic ti jchi'iltique. Ti buch'u mu'yuc c'ux ta xa'i ti xchi'ile, chamem.

¹⁵Scotol ti buch'u xti'et sjol ta stojol ti xchi'ile, ja' jun jmilvanej. Xana'ic lec xtoc, ti jun jmilvaneje, laj to c'op ma' ti oy ta stojol ti ach' cuxlejal sventa sbatel osile.

¹⁶Jna'tic lec c'u s'elan ma' ti c'uxul o'ntonale, yu'un ti Jesucristoe laj xa yac' sba ta milel cu'untic. Jechuc me co'ntontic ta scoltael ti jchi'iltique, manchuc mi ta xcac' jol jbaquiltic yu'un.

¹⁷Mi oy buch'u staoj scotol ti c'usi ta xtun yu'un yo' jech ta xcuxie, mi mu'yuc ta stic' sba ta scoltael ti xchi'il c'alal ta xil ti oy c'usi tsots sc'oplal ta xtun yu'une, ¿c'usi xut ta xal ti oy xc'uxul yo'nton Dios ta stojole?

¹⁸Jnich'nabtac, ma'uc no'ox me ti ta xloc' ta alel cu'untic ti c'ux ta xca'i jbatique, vinajuc ti yabtel ta jtojoltique.

¹⁹Ti jech taj une, ta jna'tic ti ja' melel ti c'usi ta xcaltique, xchi'uc ta xca'itic ti jun co'ntontic va'alotic ta stojol ti Diose.

²⁰Mi ta xac' jna'tic ti co'ntontic ti oy c'usi quechel mac cu'untique, ti Diose, jelavem sna' scotol, ja' mu sta ti co'ntontique.

²¹Mi mu'yuc ta xac' jna'tic ti co'ntontic ti oy c'usi quechel mac cu'untique, Jchi'iltac, jpat co'ntontic ta stojol ti Diose.

²²Ja' yu'un un, ta xijyac'botic scotol ti c'usi ta jc'anbetic ti ta xtun cu'untique, yu'un ta jch'unbetic ti smantale, xchi'uc ta jpasbetic ti c'usi lec ta xile.

²³Ti smantale, ja' ti c'otuc ta o'ntonal ta xch'unel ti Jesucristo ti ja' Xnich'one, xchi'uc ti c'uxuc xca'i jbatic ta jujun tal jech c'u cha'al laj yalbotique.

²⁴Ti buch'utic ta xch'unbeic ti smantale, oyic ta stojol ti Diose. Ti Diose oy ta stojolic ec. Xi s'elan ta jna'tic ma' ti oy ta jtojoltic ti Diose: ja' ta sventa ti laj yac'botic ti Ch'ul Espíritue.