Read Tzotzil Jueces 10 Bible Online

Jueces 10 - Tzotzil bible

Jueces 10

¹C'alal cham xa ox ti Abimeleque, oy jun vinic ti sbiinoj Tolae, snitilul ti Isacare, xnich'on ti Fuae, smom ti Dodoe, lic sva'an sba ta spojel ti israeletique. Ti Tola taje nacal ta Samir ti oy ta vits yu'un ti Efraine.

²Oxib xcha'vinic (23) jabil laj spas ajvalilal ta stojol ti israeletique, ja' to ti c'uxi chame. Laj smuquic ta Samir.

³Ts'acal to un, lic sva'an sba ti Jair ti liquem talel ta Galaade, ti chib xcha'vinic (22) jabil laj spas ajvalilal ta stojol ti israeletique.

⁴Laj yilbe sat lajuneb xcha'vinic (30) ta vo' squerem xnich'nab, ti xcajetic no'ox ta sburroic jujunique, xchi'uc ti oy jujun steclumalic ta yosilal ti Galaade. Ti lajuneb xcha'vinic jteclum taje, ojtiquinbil to yu'unic avi tana le'e, “Steclumal ti Jaire” xi sc'oplal.

⁵C'alal cham ti Jaire, laj yich' muquel yu'unic ta Camón.

⁶Ja'uc ti israeletique lic spasic chopol ta sba ta sat ti Diose. Yu'un lic snijan xchiman sbaic ta yich'el ta muc' ti ep ta tos sloc'obbailtac ti Baale xchi'uc ti Astartee, jech c'u cha'al ti diosetic yu'unic ti Siriae, ti Sidone, ti Moabe, ti Amone, xchi'uc ti filisteoetique. Laj svalopatinic comel ti Diose. Mi ja'uc xa ta xich'ic ta muc'.

⁷Jech o xal ti Diose lic sc'ac'al yo'nton ta stojolic. Laj yac' comel ta yoc ta sc'ob ti filisteoetique xchi'uc ti amonitaetique.

⁸Va'i un, scotol ti israeletic ti nacalic ta Galaade, ti oyic ta jot uc'um Jordán ti ja' yosilal ti amorreoetique, vaxaclajuneb (18) jabil sjalil lic yich'ic ilbajinel yu'un ti filisteoetique, xchi'uc ti amonitaetique.

⁹Ti amonitaetique ech' xtuch'ic ti uc'um Jordane yo' jech ta stsaquic ta leto snitilultac ti Judae, ti Benjamine, xchi'uc ti Efraine. Jech o xal ti israeletique mu x'ech' xjelav ti svocol laj staique.

¹⁰Va'i un, ja' o lic sc'anbeic coltael ti Diose, ti xi laj yalbeique: “Ch'ul Dios cu'uncutic, laj jsa' jmulcutic ta atojol. Laj xa jtenotcutic comel ta snijanel xchimanel jbacutic ta yich'el ta muc' ti jeche' diosetique.”

¹¹Xi tac'batic talel yu'un ti Diose: “Ti vo'oxuque laj avich'ic tsots ilbajinel yu'un ti egipcioetique, ti amorreoetique, ti amonitaetique, ti filisteoetique,

¹²ti sidonioetique, ti amalecitaetique, xchi'uc ti madianitaetique. Ja'uc ti c'alal xa'oc' xa'avanic xa ta jtojole, laj jtic' jba ta apojelic.

¹³Manchuc mi jech un, laj avalopatinicun comel ti bat anijan achiman abaic ta yich'el ta muc' ti yan diosetique. Mi ja'uc xa ta jtic' jba ta apojelic yan velta avi tana li' une.

¹⁴¡Batanic, ba c'anbeic pojel coltael yu'un ti diosetic ti loc' ayan ta avo'ntonic ta st'ujele! ¡Ac'o stic' sba sva'an sba ta apojelic ti jech mu x'ech' xjelav ta xava'iic ti vocole!”

¹⁵Va'i un, ti israeletique xi laj stac'beic ti Diose: “Laj xa jta jmulcutic. Lec un cha'e, paso ta jtojolcutic ti c'usi lec ta xava'ie. Ja'uc le' une, ¡avocoluc, va'ano aba, tic'o aba ta jpojelcutic avi tana li' une!”

¹⁶Jech ti israeletique lic stubbeic sc'oplal ti jeche' diosetique yo' jech ta xlic yich'ic ta muc' ti Dios yan veltae. Jech ti Diose mi ja'uc xa ts'icbaj ta xa'i ti ilbajinbilic ti israeletique.

¹⁷Ti amonitaetique lic svol sbaic ti bat slaman sbaic ta Galaade. Ja'uc ti israeletique laj stsob sbaic ti bat svol sbaic ta Mizpae.

¹⁸Ti israeletic ti nacalic ta Galaade lic svulesbe sbaic ta yo'nton xchi'uc ti banquilaletic yu'unique, ti buch'u van ta xtojobtasvan ta ac'-leto ta stsaquel ta leto ti amonitaetique, ti ja' ta xc'ot ta jpojvanej yu'un scotol ti jnaclejetic ta Galaade.