Read Tzotzil Jueces 15 Bible Online

Jueces 15 - Tzotzil bible

Jueces 15

¹Ech' c'u sjaliluc un, ti c'alal ja' xa yorail ta xich' tsobel ti trigoe, ti Sansone bat sq'uel ti yajnile. Yic'oj batel jcot ch'iom tentsun. C'alal c'ote, xi laj yale: —Ta xi'och batel. Ta jq'uel ti cajnil ti tiq'uil ta jc'ol yut nae. Mi ja'uc aq'ue ochuc yu'un ti smuni'e.

²C'ajomal no'ox xi albate: —Laj jnop ti laj xa aten comel ta avo'ntone. Avie laj cac'be yic' ti buch'u lec xavil aba xchi'uque. Manchuc mi jech un, li' oy jun smuc ti x'ech' to c'upil sbae, ti c'otuc ta xq'uexol ti xvixe.

³Ja'uc ti Sansone xi laj staq'ue: —¡Avi tana une, ma'uc xa ta jmul ti oy c'usi chopol ta xlic jpasbe ti filisteoetique!

⁴Va'i un, loc' batel, bat stsac vo'lajunvinic (300) ta cot vet. Ta cha'cha'cot laj snupanbe ta chucbel ti sba sni' snetaque. Ti cha'cha'cot ta jujune, laj xchucanbe ta yolon sne ti c'usi lec xtil yu'un ti c'oq'ue.

⁵Laj taj une, lic stsanbe sc'ac'al ti c'usi lec xtil yu'un ti c'oq'ue. Xtilte tilte xa batel sc'ac'al sne ti vetetic ti laj scolta batel ta yosilal sts'unubic ti filisteoetique. Ti jech taj une, c'ot ta pasel yu'un ti laj c'ac'uc ti tsobbil trigo ti busajtique, xchi'uc ti tec'ajtic toe. Laj c'ac'uc ti yaq'uil uvaetique xchi'uc ti olivo te'etique.

⁶Jech ti filisteoetique lic st'unic buch'u laj spas ti va'i s'elan taje. Laj ya'iic ti laj spac sutel xq'uex ti Sansón ta stojol ti smuni' ti nacal ta Timnate, ta scoj ti pojbat ti yajnil ti laj yac'be ech'el ta yoc ta sc'ob ti buch'u lec xil sba xchi'uque. Jech o xal un, bat xchiq'uic ti antse xchi'uc ti stote.

⁷Va'i un, ti Sansone xi laj yale: —Ti ja' jech a'elanic le'e, ¡jamal ta xcalboxuc ava'iic ti mu xilubtsaje, ta to jpacbeic sutel ya'iic ti c'usi laj spasbeicune!

⁸Ta sc'ac'al xa yo'nton ta j'ech'el, lic stsacan ta milel, ti lilijem com yu'un ti sjol sbaquilique. Laj taj une, bat snac' sba ta naclej ta nail ch'en ti oy ta lican ch'entic yu'un ti Etame.

⁹Ja'uc ti filisteoetic une talic, ti c'ot slaman sbaic ta Judae, ti sbusetic no'ox batel ti c'otic c'alal to Lehie.

¹⁰Ti jnaclejetic ta Judae xi bat sjac'beique: —¿C'u cha'al ti tal atsacuncutic ta letoe? Ti stuquique xi laj staq'uique: —Ja' tal jtsaccutic ti Sansone yo' jech ta stoj ti c'usi laj spasbuncutique.

¹¹C'alal laj ya'iic snitilultac ti Judá ti va'i s'elan taje, laj stsob sbaic oxmil (3,000) ta vo' viniquetic. Batic c'alal to nail ch'en ti oy ta lican ch'entic yu'un Etame, ti xi c'ot yalbeic ti Sansone: —¿Mi mu xana' ti ja' ech'em to xu' yu'unic ti filisteoetique, ti ja' mu sta ti vo'otique? ¿C'u cha'al ya'yel ta xavac'otic ta vocol? Xi tac'batic yu'un ti Sansone: —C'ajomal no'ox ta jpacbeic sutel ya'iic jech c'u cha'al laj spasbeicune.

¹²Ja'uc ti stuquique xi laj yalbeique: —Ti vu'uncutique tal jtsacotcutic batel yo' jech ta xacac'otcutic batel ta yoc ta sc'ob ti filisteoetique. Ti Sansone xi laj staq'ue: —Ac'o ave ati'ic ti mu xamilicune.

¹³—Ta j'ech'el mi ja'uc ta xajmilcutic. C'ajomal no'ox ta xajtsaccutic batel, ta xcac'otcutic ta yoc ta sc'ob ti filisteoetique —xiic. Va'i un, laj xchuquic ta cha'bej ach' ch'ojon. Laj sloq'uesic talel ti bu nac'ale.

¹⁴C'alal c'otic ta Lehie, ti filisteoetique mu xa c'usi x'ech' o ta xa'iic ti muyubajele. X'avlajetic no'ox bat snupic ta be. Ja'uc xcuxlejal ti Diose tal ta stojol ti Sansone. Mu tsotsuc laj ya'i laj stuch' ti ch'ojon ti chucbil o ti sc'obe, ti co'ol s'elan laj ya'i jech c'u cha'al uni balbil lino poc' ti c'aq'uem xae.

¹⁵Laj taj une, javal laj sta jot sbaquil yolon ye burro ti yox toe, ti ja' laj smil o ep ta mil filisteoetic xchi'uque.

¹⁶Ts'acal to un, xi lic yale: “Ta sbaquil no'ox yolon ye burro, laj jpas ta jbus ta cha'bus. Ta sbaquil no'ox yolon ye burro, laj cu'un jmil (1,000) ta vo' viniquetic.”

¹⁷Ts'acal to un, laj sjip batel ti sbaquil ye burroe. Ti bu taje, laj yac'be sbiin Ramat-lehi.

¹⁸Ja'uc ti Sansone mu xa x'ech' ta xa'i ti taqui ti'ile, ti xi lic yavta ti Diose: “Altic no'ox ya'yel ma' ti mu albajuc lic'ot ta jtsalvanej avu'une, ti li' aq'ueloj avi tana une ti ta xicham ta taqui ti'ile, ti ta xi'och ta yoc ta sc'ob ti jcontrainvanejetique.”

¹⁹Va'i un, ti bu ta x'ech' ti vo' ta jomol banomil ti oy ta Lehie, laj sjam ti Diose. Ti Sansone laj yuch' ti vo' ti xtuctun ta x'ech' ta jomol banomile, xcuxet to batel banomil laj ya'i ti yo'ntone. Jech o xal un, ti sat vo' ti oy ta Lehie, sbiinoj to yu'unic avi tana li'e, En-hacoré.

²⁰Jtob jabil c'ot ta jpojvanej ti Sansón yu'un ti Israele, ti c'alal ja' o yorail ta x'ilbajinvanic ti filisteoetic ta banomil taje.