Read Tzotzil Jueces 18 Bible Online

Jueces 18 - Tzotzil bible

Jueces 18

¹Ti jech ora ta vo'ne taje, ch'abal to ox banquilal ajvalil yu'un ti Israele. Ja'uc snitilultac ti Dane, ch'abal steclumal bu ta xnaqui ti stuquique, ti yalel muyelic ta sa'el ti bu xu' ta xnaquiique.

²Jech o xal snitilultac ti Dane, ta Zora to xchi'uc ta Estaol to, laj staquic batel vo'ob (5) tsatsaquil viniquetic yo' ta xtunic ta jpa'ivanej ta xchajel ta q'uelel ti banomile. Ti vo'ob jpa'ivanejetic taje ech'ic ta vitstic ti bu oy yosil ti Efraine, ti c'otic ta sna ti Micaía ti ech' yu'unic ti ac'ubaltic ti bu taje.

³Ti nopol xa oy sna ti Micaíae, ta sc'opojel no'ox laj ya'iic ti nacal jun levita querem vinique, ti xi bat sjac'beique: —¿Buch'u laj yic'ot talel li'e? ¿C'u cha'al li' oyote? ¿C'usi ta xasa' li'e?

⁴Ti levitae lic xchap ti c'u s'elan strate laj spasic xchi'uc ti Micaíae, xchi'uc xtoc ti c'u s'elan trate laj spasic ti och ta paleal yu'une.

⁵Ja' yu'un un, xi laj yalbeique —Jac'uncutic ta stojol ti Diose yo' jech ta xich' na'el mi lec ta xc'ot ta jtojolcutic ti jech loq'uemuncutic talel ta xanvile.

⁶Ti pale levitae xi laj stac'bee: —Junuc avo'ntonic, batanic, ac'o stic' sba ta apojel ta acoltaelic ti Dios ti buyuc no'ox ta xabatique.

⁷Ti bu taje, loq'uic batel ti vo'ob jpa'ivanejetic ti batic c'alal to ta Laise. Ti jnaclejetic ta jteclum taje, mu'yuc c'usi xal yo'ntonic ta naclej, ja' ti xchanojbeic stalel ti sidonioetique, ti jun yo'ntonic nacalique. Mu'yuc buch'u x'ilbajinatic yu'unic ta j'ech'el, mi ja'uc ti mu'yuc ta ye ta sti'ique. Yu'un nom to xilic ti sidonioetique, ja' ti slecoj svoc'oj sbaique.

⁸Va'i un, ti vo'ob jpa'ivanejetique sutic batel ta o'lol yu'un ti Zora xchi'uc ti Estaole, ti bu comem ti yan xchi'ilique, ti xi jac'batic yu'une: —¿C'u s'elan laj avilic un? Xi laj staq'uique:

⁹—Laj jxanicutic sbejel ti banomil taje. Toj jun yutsil ti osil banomil ta j'ech'ele. ¡Jchapan jbatic! ¡Ba jtsactic ta leto ya'iic! ¡Mu teyuc no'ox ameyoj avoc ac'obic ta chotlej! ¡Ba cu'nintic ti banomil taje!

¹⁰C'alal mi lijc'ototic ti bu taje, taj jtatic jnaclejetic ti mu'yuc xi'el ta xa'iique, ti ep yosil sbanomilique, ti mi ja'uc jutebuc ti mu'yuc ta ye ta sti'ique. Ta xac' ta avoc ta ac'obic Dios ti c'usi ja' yu'unique.

¹¹Vaquib ciento (600) ta vo' viniquetic snitilultac ti Dane, chapal lec xchi'uc yabtejebic, loq'uic batel ta o'lol yu'un Zora xchi'uc ti Estaole.

¹²C'otic ta yosilal Judá. Ti bu taje, c'ot slaman sbaic ta yeloval smaleb c'ac'al yu'un ti Quiriat-jearime, ti bu sbiinoj to yu'unic Slamlebic ti Dane.

¹³Ti bu taje, loq'uic ech'el ta vitstic yu'un ti Efraine. C'otic ta sna ti Micaíae.

¹⁴Va'i un, ti vo'ob jpa'ivanejetic ti laj xchajic ta xaniel ti banomil ta Laise, xi laj yalbeic ti xchi'ilique: —Oy jtos ma' ti mu xana'ic une. Ta na li'e, oy jlic luchbil jayal saquil c'u'il xchi'uc yan diosetic. Oy xtoc jun loc'obbail dios ti bonbil ta plata taq'uine. ¿C'usi stac' xapasbeic un?

¹⁵Va'i un, ti jpa'ivanejetique laj xch'ac sbaic batel ta stojol ti yan xchi'ilique. Batic ta sna ti querem vinic levitae, ti lec xcaltique, ja' ta sna ti Micaíae. “¿Mi li'ote?” xutic c'otel.

¹⁶Ti vaquib ciento (600) ta vo' soldado danitaetique, chapalic lec xchi'uc yabtejebic ti volol no'ox ta xmalavanic ta ti' nae.

¹⁷Ti vo'ob jpa'ivanejetique, ba'yel ochic batel ta yut na. Laj stamic talel ti loc'tabil dios ti bonbil ta plata taq'uine, ti jayal luchbil saquil c'u'ile, xchi'uc ti bic'tal diosetique. Jech laj spas taje, ti palee va'al com ta ti' na xchi'uc ti vaquib ciento (600) ta vo' soldadoetique.

¹⁸C'alal laj yil ti pale ti och batel ti jpa'ivanejetic ta sna ti Micaíae, ti ta stamic loq'uel ti loc'tabil diose, ti luchbil jayal saquil c'u'ile, xchi'uc ti bic'tal diosetique, xi laj yale: —¿C'usi ta xapasic le'e?

¹⁹Xi laj stac'beique: —¡Ch'an chan, chi'inucutic batel! ¡Ta xatun cu'uncutic ta paleal, co'ol s'elan ta xac'ot ta jtotcutic! ¿Mi mu ja'uc lec xana' ti ta xac'ot ta paleal yu'un scotol ti jvoc' snitilul Israele, ti ja' mu sta ti ochemot ta paleal ta jun no'ox vinic xchi'uc yalab xnich'nabe?

²⁰Lec laj ya'i ti palee. Tey bat spet loq'uel talel ti loc'tabil diose, ti jayal saquil luchbil c'u'ile, xchi'uc ti bic'tal diosetique, batic xchi'uc ti danitaetique.

²¹Jba'be jelavel ech'el yu'unic ti c'usitic x'ayan yu'unique, ti ololetique, ti xvacaxique.

²²Nat xa xanavic batel c'alal laj stsob sbaic xchi'uc slac'natac ti Micaía ti bat slubiic ta bee.

²³C'alal laj ya'iic ti x'avlajetic batel yajval ti jnutseletique, ti danitaetique laj sq'uel sutel spatic, ti xi laj yalbeic ti Micaía: —¿C'usi laj apas? ¿C'u cha'al ta xavavtauncutic?

²⁴Xi tac'batic yu'un ti Micaíae: —Laj avich'beicun talel ti dios ti laj cac' ta meltsanele. Avic'ojbeicun talel ti cajpalee. Mu'yuc c'usi laj avictabeicun comele, ti cajal to aveic ta xajac'beicun c'usi laj apas xachiique.

²⁵Xi tac'bat yu'un ti danitaetique: —Mu me toj cajaluc ave xava'i aba, naca mi oy buch'u junucal cu'uncutic ti ch'abal ti sts'iquemal xcuchemal yu'un ti syales yoc sc'ob ta atojole, ti ta stub acuxlejal ta j'ech'el xchi'uc ti avuts' avalaltaque.

²⁶C'alal laj yil ti Micaía ti mu no'ox albajuc yepalique, sut batel ta sna. Yan ti danitaetique stam batel sbeic.

²⁷Ti c'usitic meltsanbil yu'un ti Micaía xchi'uc ti yajpalee, c'otic ta Lais. Ti bu taje, ti jnaclejetique mu'yuc c'usi sna'ic ti nacalique. Scotolic milatic ta espada yu'un ti danitaetique. Laj stsanbeic sc'ac'al ti jteclume.

²⁸Ti jech nom xil sbaic xchi'uc Sidon ti jteclum taje, ti slecoj svoc'oj sbaique, mu'yuc buch'u tal stic' sba ta spojelic. Yu'un oyic ta stenlej yu'un ti Bet-rehobe. Ts'acal to un, ti danitaetique lic xcha'meltsanic ti jteclume, lic naquiicuc.

²⁹Ac'o mi Lais sbi ta ba'yele, ti stuquique laj yac'beic sbiin Dan, sna'obil sbi ti smolmuc'tot ti jun vinic xnich'on ti Israele.

³⁰Ti danitaetique lic sva'anic ti loc'obbail diose yo' jech ta snijan sbaic ta yich'el ta muc'. Ti pale yu'unique, ja' ti Jonatán sbie, xnich'on ti Gersone, smom ti Moisese. Ts'acal to un, snitilultac ti Jonatane ochic ta paleal yu'un ti danitaetique, ja' to ti c'uxi xujbil loq'uique.

³¹Ti c'u sjalil va'al xch'ulna ti Dios ta Siloe, ja' jech va'al o com ta stojolic ti loc'obbail dios ti laj smeltsan ti Micaíae.