Read Tzotzil Jueces 21 Bible Online

Jueces 21 - Tzotzil bible

Jueces 21

¹Ti israeletique ta j'ech'el laj sva'an sbaic ta yalel ta Mizpa ti mu xu' xac'beic yic' stsebic mi junuc snitilultac ti Benjamine.

²Ts'acal to un, lic stsob sbaic ta Betel, ti vololic x'oc'lajetic ic'ub ti xi ta sc'anic parte ta stojol ti Diose:

³“¡Mu xa ono'ox cha'beluc un, jCh'ul Tot, Dios yu'un ti Israele! ¿C'u cha'al ti jech c'ot ta jtojolcutic le'e? ¿C'u xa no'ox cha'al ti ch'ay xa jvoc' snitilul ti Israele?”

⁴Ti israeletique sob xa liquic ta yoc'omal. Lic smeltsanic jun altar. Laj yac'beic chic'bil matanal xchi'uc milbil matanal sventa lajesobil o'ntonal yu'un ti Diose.

⁵Xi lic sjac'be sbaique: “¿Buch'u junucal cu'untic ti mu'yuc xc'ot ta tsobajel ta Mizpae?” Ja' ti yalojic ono'ox ta jamal ti jbel sc'oplal ta xich' milel ti buch'u mu'yuc xc'ot ta tsobajele.

⁶Yu'un ti israeletique mu x'ech' ta xa'iic me'unal ta scoj ti mu no'ox albajuc chopol c'ot ta stojol snitilultac ti Benjamín ti c'alal svinquilel sbaique, ti xi ta xalique: “Avi ti c'ac'al li'e, tub jvoc' snitilultac ti Israele.

⁷¿C'usi ta jpastic yo' ta jtabetic yajnilic snitilultac ti Benjamín ti cuxulic to comique? Yu'un laj caltic ta jamal ta sba sat ti Diose, ti mu xcac'betic yic' jtsebtic ti stuquique.

⁸¿Mi oy junuc snitilultac Israel ti mu'yuc xbat sva'an ta stojol Dios ta Mizpae?” Vul ta yo'ntonic pisil une, ti mu junuc ay ta tsoblej ti jnaclejetic ta Jabes ti oy ta Galaade.

⁹Yu'un ti c'alal xcholet loc' ti biile, mi junuc oy buch'u laj stac'.

¹⁰Va'i un, scotol ti jteclume laj staquic batel lajcha'mil (12,000) ta vo' soldadoetic ti tsots xu' yu'unique, ti albatic mantal ti ac'o smilic ta espada scotol ti jnaclejetic ta Jabese,

¹¹ti capaluc lajuc ta milel ti ololetique, ti antsetic ti ma'uc xa tojol tsebetique.

¹²Ti c'u yepal nacalic ta Jabese, laj staic talel chanib ciento (400) ta vo' tojol tsebetic ti mu'yuc tabil ta vinique, ti yic'ojic ech'el ti bu lamalic ta Silo ti oy ta Canaane.

¹³Va'i un, scotol ti jteclume laj yalic mantal ti ac'o ba yich' sa'el talel snitilultac ti Benjamín ti oyic ta lican ch'entic yu'un ti Rimone. Laj yalbeic ti lajuc sicubuc xa ti c'ope.

¹⁴Snitilultac ti Benjamine sutic talel. Ac'bat yajnilic yu'un ti israeletic ti yic'ojic talel ta Jabese. Ja' no'ox un, mu'yuc xloc' o ta antsetic scotolic.

¹⁵Yu'un c'uxubaj yo'nton ti israeletic ta stojol snitilultac ti Benjamine, ti xocol com yu'un Dios yavil ti bu oyic jvoc' snitilultac ti Israele.

¹⁶Xi lic sjac'olanbe sbaic ti banquilaletic yu'un ti jteclume: “¿Bu ta jtabetic talel yajnilic ti jlome, c'alal scotol ti antsetic snitilultac ti Benjamine lajic ta milel?

¹⁷Yu'un ti bu xocol com yavil snitilultac ti Benjamín ti ja' snitilultac ti Israele, xlic xa yu'unic jun jteclum ti c'u yepal cuxul comique. Tsots sc'oplal ti oyuc yajvale yo' jech chapal snitilultac ti Israele.

¹⁸Ja'uc ti vo'otic le' une, mu xu' ta xcac'betic yic' ti jtsebtique, ti c'alal jcotoltic laj caltic ta jamal ti israelotic ti ta xich' bisel ta cotol chaval ti buch'u ta xac'be yic' stseb snitilultac ti Benjamine.

¹⁹Ac'o mi jech un, jujun jabil ta x'ech' jun muc' ta q'uin yu'un Dios ti ta Siloe, ti oy ta stuq'uil yolon ti yolon xocon sloq'ueb c'ac'al yu'un ti Betele, ti ta be ta stuq'uil sloq'ueb c'ac'al ta xc'ot ta Betel ti oy ta Siqueme, ti oy ta stuq'uil yolon ti yac'ol xocon sloq'ueb c'ac'al ti oy ta Lebonae.”

²⁰Va'i un, ti banquilaletic yu'un ti Israele xi laj yalic ti laj staquic batel mantal ta stojol snitilultac ti Benjamine: “Batanic, ba nac'o abaic ta yut uvatic ti nopol ta Siloe,

²¹ti teyuc xa asatic chaplanic leque. C'alal xvoletic loq'uel ta ac'otajel ti tsebetic ta Siloe, loc'anic batel ta anil ti bu nac'aloxuque. Elc'anic batel jujun tseb ti jujunoxuque. Iq'uic batel ta alumalic.

²²Mi ta xtal sc'anic parte ta jtojolcutic ti stot sme'e, mi ja' ti xchi'iltac ta voq'uel ti tsebetique, ja'uc le' une, xi ta xcalbecutique: ‘Quere, c'uxubajuc avo'ntonic ta jtojolcutic. Ch'aybo ti smulique. Mu'yuc xloc' o yajnilic ti c'u yepal laj jtacutic talel c'alal laj jtsaccutic ta leto ti Jabese. Yu'un ma'uc vo'oxuc laj avac'beic ti yajnilique. Melel me cac'tic un, mu'yuc amulic ta xc'ot yu'un ti c'usi jamal laj ava'an abaic ta yalele.’ ”

²³Snitilultac ti Benjamine c'ot ta yo'ntonic ti va'i s'elan albatique. Jujunic laj yelc'anic batel jujun tseb ti ta x'ac'otaj laj staique. Ts'acal to un, ta anil no'ox, sutic batel ta yosilalic. Lic xcha'meltsanic ti steclumalique, lic naquiicuc.

²⁴Ja'uc ti yan israeletique laj xch'ac sbaic ec. Ta jujuchop sutic batel ta stojol ti snitilulique, ta yosilic ti bu liquemic ti jujuvoq'ue.

²⁵Ti jech c'ac'al ta vo'ne taje, mu'yuc ajvalil ta jujuvoc' yu'un ti Israele. C'ajomal no'ox ta spasic ti c'usi lec ta xa'iic ti jujuchope.