Read Tzotzil Jueces 4 Bible Online

Jueces 4 - Tzotzil bible

Jueces 4

¹Ts'acal to un, ti c'alal chamem xa ox ti Aode, jech ti israeletique lic xcha'pasic ti c'usi chopol ta sba ta sat ti Diose.

²Va'i un, aq'ueic ta yoc ta sc'ob Jabin yu'un ti Diose, ti ja' jun ajvalil cananeo ti sventainoj ti jteclum Hazore. Ti banquilal jpas-mantal yu'un ti yajsoldadotac ti Sisara sbie, nacal ta Haróset-goim.

³Ti Jabin taje, oy yu'un baluneb ciento (900) ta cot carreta ti meltsanbil ta taq'uine. Jtob (20) jabil sjalil tsots laj yilbajin ti israeletique, ja' to ti c'alal xvocoletic liquel ta stojol ti Dios ti ac'o coltaaticuque.

⁴Ti jech yorail taje, ti israeletique ja' jventainvanej yu'unic ti me' alc'op Débora sbie, yajnil ti Lapidote.

⁵Ti Déborae, stalel ono'ox ti xchotet ta yolon yaxinal ti xane (“Xan yu'un ti Déborae”, xi ti ojtiquinbil yu'unique). Ti xan taje, oy ta vits ta yosil ti Efraín ti oy ta o'lol yu'unic ti Ramá xchi'uc ti Betele. Jech ti israeletique ja' xbat sjac'beic c'u s'elan ta xchapaj ti oy c'op yu'unique.

⁶Oy jun c'ac'al, ti Déborae laj stac ta iq'uel jun vinic ti Barac sbie, xnich'on ti Abinóame. Ti Baraque nacal ta Cedes ti ja' jun jteclum ti oy ta yosil snitilultac ti Neftalie, ti xi albat yu'un ti Déborae: —Ti Ajvalil Dios yu'un ti Israele xi xcholet ta xalbot ava'i ti mantale: ‘Batan ta vits Tabor, tsobo lajunmiluc (10,000) ta vo' viniquetic snitilultac ti Neftalie xchi'uc ti Zabulone.

⁷Vu'un ta jliquesbe sjol ti Sisarae, ja' ti jtsob-soldado yu'un ti Jabine yo' jech ta xtalic ta uc'um Cisón ta stsacoxuc ta leto xchi'uc scarretaique, xchi'uc ti epal soldadoetic yu'une. Ja' no'ox un, chapal sc'oplal ta xcac' ta avoc ta ac'obic.

⁸—Ta xibat mi ta xachi'inun batele —xi laj stac' ti Baraque—. Yan ti mi mu xachi'inun batele, mu xibat.

⁹—Ta xajchi'inot batel —xi laj stac' ti Déborae—. Ti c'usi lec ta xc'ot ta pasele, ma'uc me avich'el ta muc' un. Yu'un ta stojol jun ants ta x'aq'ue ta yoc ta sc'ob ti Sisara yu'un ti Diose. Jech ti Déborae bat ta Cedes xchi'uc ti Baraque.

¹⁰Ti bu taje, ti Baraque laj sta ta iq'uel snitilultac ti Zabulone xchi'uc ti Neftalie. Ti jech laj spas mantale, laj stsob sba yu'un lajunmil (10,000) ta vo' j'ac'-leto viniquetic ti nabal bat ti Débora xchi'uc ti Baraque.

¹¹Nopol ta Cedes, ti nopol xil sbaic xchi'uc ti tulan ti oy ta Zaanaime, lamalic ta naclej ti Heber ti ja' quenita vinique, ja' ti jvoc' ti laj xch'ac sbaic xchi'uc ti yan quenitaetique. Ti quenitaetique, ja' snitilultac ti Hobabe, smuni' ti Moisese.

¹²Laj ya'i ti Sisarae ti muy ech'el ta vits Tabor ti Baraque.

¹³Jech o xal laj stsob baluneb ciento (900) ta cot ti scarreta ti meltsanbil ta taq'uine xchi'uc scotol ti yajsoldadotaque. Xvoletic no'ox batel ta Haróset-goim xchi'uc scotol ti yajsoldadotaque, ti c'ot ta uc'um Cisone.

¹⁴Ja' yu'un un, ti Déborae xi laj yalbe ti Baraque: —¡Ac'bo yipal un, yu'un ja' xa yorail ta xac'bot ta avoc ta ac'ob Dios ti Sisarae! ¡Yu'un ti Diose ja' xa jba'be batel ta stojol ti avajsoldadotaque! Jech ti Baraque yalic batel xchi'uc ti lajunmil (10,000) ta vo' yajsoldadotac ta vits Tabore.

¹⁵C'alal yorail xa ta xlic stsac sbaic ta letovajel ta espada xchi'uc ti Baraque, jech ti Diose xi'bal sba ta j'ech'el ti c'usi laj spas ta stojol ti carretaetique xchi'uc ti soldadoetique. C'ot ta pasel ti yal ta scarreta ti Sisarae, ti ta yoc xa xpochbe ech'el jatobale.

¹⁶Ja'uc le' une, ti Baraque snutsoj batel c'alal to Haróset-goim ti soldadoetic xchi'uc ti scarretaique. Ti jech c'ac'al taje, mu junuc cuxul com ti epal soldadoetic yu'un ti Sisarae, ti xi s'elan cham scotolique:

¹⁷Ja'uc ti Jabine, ajvalil yu'un ti jteclum Hazore, lec xil sbaic xchi'uc snitilul ti Heber ti ja' quenitae. Ti jech jatvil batel ti Sisarae, ta yoc c'ot c'alal to yaxibal na ti Jael ti ja' yajnil ti Hebere,

¹⁸ti xi laj yalbe ti c'alal bat snup talel ta bee: —La' li'e, Cajcuch abtel, la' li'e, mu xaxi'. Ti Sisarae och batel, naq'ue, lamanbat poc' yu'un ti Jaele.

¹⁹Va'i un, c'anbat vo' yu'un ti Sisarae, yu'un taquin yo'nton ta j'ech'el. Jech ti Jaele laj sjam ti yavil chu' vacax ti co'ol s'elan uni tsu meltsanbil ta nucule. Laj yac'be yuch'. Ts'acal to un, lic no'ox xcha'lamanbe ti poq'ue.

²⁰Ti Sisarae xi laj yale: —Oyan no'ox me ta ochebal sti' ti axibal nae. Yu'un mi oy buch'u ta xtal ti ta sjac'bot mi oy buch'u li' tiq'uil ta yut nae, albo ya'i ti mu'yuc buch'ue.

²¹Ti jech lubem ta j'ech'el ti Sisarae, bat xch'ulel ta vayel. Va'i un, ti Jaele laj stam jun martillo xchi'uc jun pajob-te' ti ta stunesic o ta stsacleb snitleb ti axibal nae. Ta c'un c'un nopaj batel ti bu oy ti Sisarae. Nax to ti paj xutbe ti pajob te' ta xocon sti'ba ti toj jelavel c'alal to banomile. Ja' jech cham ti Sisarae.

²²C'alal c'ot ti Barac ta sa'el ti Sisarae, ti Jaele loc' batel, bat snup talel ta be, ti xi laj yalbee: —La' li'e, ta xcac'bot avil ti buch'u ta xasa'e. Ti Baraque och batel ta yut ti axibal nae. Telel xa ta banomil laj sta ti Sisarae, ti chamem xae. Laj yil xtoc ti pajal ti pajob-te' ta xocon sti'bae.

²³Ti jech c'ac'al taje, ja' jech pec'tsanbat sc'oplal yu'un Dios ta sba ta sat israeletic ti Jabin ajvalil yu'un ti cananeotique.

²⁴Jech ti israeletique lic yac'beic yipal ta yilbajinel ti Jabine, ja' to ti c'uxi tsuts yu'unique.