Read Tzotzil Jueces 7 Bible Online

Jueces 7 - Tzotzil bible

Jueces 7

¹Ti Gedeone, ti ja' xa sbiinoj yu'unic ti Jerobaale, xchi'uc ti c'u yepal oy ta stojole, sob xa liquic batel ta yoc'omal, ti c'ot svol sbaic ta sat vo' yu'un ti Harode. Yan ti bu vololic ta yaxibal naic ti madianitaetique, comem ta yolon ti yolon xocon sloq'ueb c'ac'al yu'unic ta stenlej ti oy ta yoc vits yu'un ti Moree.

²Ti Gedeone, xi albat yu'un ti Diose: “Toj ep avic'ojan talel ti achi'iltaque. Yu'un mi ta xlic jpas ta stojol ti israeletic ti tsalbil ta xc'ot yu'un ti madianitaetique, xu' ti cajal xa'i sbaic ti ta xalbe sbaic ti laj spoj sba stuquique, ti mu'yuc c'usi balun o ta xic'ot yu'unique.

³Jech o xal un, albo ya'i ti avinictaque, ti buch'uuc no'ox ta xi'e, suticuc batel ta snaic.” Ti va'i s'elan taje, laj sna' c'u s'elan yo'nton svinictac ti Gedeone. Sutic batel chib xcha'vinic mil (22,000) ta vo' ti svinictaque. C'ajomal xa no'ox lajunmil (10,000) ta vo' ti come.

⁴Ja'uc le'e, xi lic yalilan ti Diose: “Toj ep ti avinictaque. Ic'o batel ta yuch'el vo'. Yu'un ti bu taje, ta jq'uelbe yo'ntonic, ta xcac'bot avil ti buch'u ta xbat xchi'inote, ti buch'utic ti mu'yuc ta xbate.”

⁵Jech ti Gedeón une laj yic' batel ta yuch'el vo' ti svinictaque, ti xi albat yu'un Diose: “Ch'acal xavac' ti buch'utic sjopoj ta xuch'ic ti vo'e, ti co'ol s'elan ts'i' leq'uilanbil ta xuch'ique. Slecoj xavac' ti buch'u ta spatan sbaic ta yuch'el ti vo'e.”

⁶Ti buch'utic sjopoj laj yuch'ic ti vo' ti leq'uilanbil laj spas jech c'u cha'al ti ts'i'e, c'ajomal no'ox vo'lajunvinic (300) ta vo' loc' ta chapel. Scotol ti yane laj spatan sbaic ta yuch'el ti vo'e.

⁷Va'i un, ti Diose xi laj yalbe ti Gedeone: “Xu' xa cu'un ta apojelic ta sventa ti vo'lajunvinic (300) ta vo' viniquetic le'e. Tsalbil ta xc'ot cu'un ti madianitaetique. Scotol ti yane, suticuc batel.”

⁸C'alal mu to ta sutic batele, ti Gedeone laj yal mantal ti ac'o yich' tsobel comel ti sq'uibique, ti xulub xchijique. C'ajomal xa no'ox com xchi'uc ti vo'lajunvinic (300) ta vo' ti t'ujbilique. C'ot svol sbaic ta lamlej ta yac'ol ti bu vololic ta lamlej ti madianitaetic ta stenlejale.

⁹Ta yac'ubalil no'ox taje, xi pasat ta mantal yu'un Dios ti Gedeone: “Chapano aba yalel, lic tsaco ta leto ya'i ti madianitaetique. Yu'un ta xcac'bot ta avoc ta ac'ob.

¹⁰Ja'uc le' une, mi ta xaxi' ta stsaquel ta letoe, caj yalanic batel xchi'uc ti avajtunel Furae ti bu vololic ta lamleje.

¹¹A'yio ava'i lec ti c'usi ta xalique. Ts'acal to un, ta xava'i lec ta avo'nton ti mu'yuc xa xi'el ta xbat atsac ta letoe.” Jech ti Gedeone yal batel xchi'uc ti Fura ti yajtunele. C'otic c'alal to sts'el ti bu lamalic ti scontrae.

¹²Ti madianitaetique, ti amalecitaetique, ti jnaclejetic ti liquemic talel ta sloq'ueb c'ac'ale, co'ol s'elan j'ilbajinvanej c'ulub ti lamal stanioj sbaic ta stenleje. Mu no'ox albajuc yepal ti scamelloic oy yu'unique, ti co'ol s'elan yi' oy ta sti'il ti nabe.

¹³C'alal nopaj batel ti Gedeón ti bu lamal ti yajcontrae, laj ya'i ti oy jun soldado ti yacal ta xchapbe ya'i xvaich ta stojol yan soldado ti c'usi laj yile, ti xi ta xale: —Laj quil ta jvaich ti oy jbej pan ti meltsanbil ta jchop o trigo ti stselel xa talel ti bu lamalotique, ti toj lomel c'ot yu'un ti jbej axibal na ti c'alal tselel c'ote.

¹⁴Xi tac'bat yu'un ti xchi'ile: —Taje, ja' xa xal o sc'oplal yespada ti israelal vinic Gedeone, xnich'on ti Joase. Yu'un ti Diose ta xac'be ta yoc ta sc'ob Gedeón ti madianitaetique, xchi'uc scotol ti c'u yepal vololique.

¹⁵C'alal jech laj ya'ibe ti slo'ile, ti laj svinajesbe smelol ti xvaiche, jech ti Gedeone laj yich' ta muc' ti Diose. Ts'acal to un, sut batel ti bu vololic ti israeletique, ti xi laj yalbe ti mantale: —¡Chapano abaic, yu'un ti Diose ta xac' ta coc ta jc'obtic ti madianitaetic ti bu vololique!

¹⁶Ta jech yepal, lic xch'ac ta oxch'ac ti vo'lajunvinic (300) ta vo' ti svinictaque. Laj yac'anbe jujun xulub chij scotolic, xchi'uc jujubej xocol q'uib ti tiq'uil bal ti sc'oq'uique.

¹⁷Xi laj yalbee: —C'alal mi lic'ot ta jot xocon ti bu lamalic ti jcontrainvaneje, tuc'ulanic lec ti c'usi ta jpas ta xavilique. Ja' jech xapasic ec.

¹⁸Ti vu'une, xchi'uc ti c'u yepal ta xchi'inicun batele, c'alal ta xava'iic ta xcoq'uisancutic ti jcachucutique, oq'uisanic ec ti joyoloxuc ta spat ta xocon ti bu lamalique, ti xi xa'avanique: ‘¡Ta sventa ti Diose, ta sventa ti Gedeone!’

¹⁹Ja' yu'un un, ti Gedeone xchi'uc ti vo'vinic (100) ta vo' svinictaque, c'otic ta jot sti'il ti bu lamalic ti scontraic ti c'alal ja' o xa yorail ta xjel ti jq'uel-osil ta o'lol ac'ubale. Va'i un, lic yoq'uisanic ti xulub chije, xchi'uc laj st'usic ta voq'uel ti lumal q'uibetic ti yich'ojic batele.

²⁰Ta yorail no'ox, jmoj laj yoq'uisanic xulub chij ti yoxchopalique, ti laj st'usic ta voq'uel ti q'uibetique. Ta sts'et c'obic sjapojic ech'el ti stojique. Yu'un ja' ta sbats'i c'ob stsacojic ti xulub chije, ti x'avanic no'ox ti xi ta xalique: “¡Letovajel! ¡Ta sventa ti Diose, ta sventa ti Gedeone!”

²¹Ts'ijil comic ti israeletic ti bu sjoyoj sbaic ta spat ta xocon ti yajcontraic ti lamalique. Scotolic x'avlajetic xa lic jatavicuc loq'uel ti soldado madianitaetique.

²²Sts'oetic no'ox ta yoq'uisanel xulub chij ti vo'lajunvinic (300) ta vo' israeletique. C'ot ta pasel yu'un ti Diose ti lic stsacan sbaic ta leto stuquic ti madianitaetique. Jatvil xa batel c'alal to Bet-sitá ta sbelel Zererá, ti c'ot c'alal to sts'ac Abel-mehola ti oy ta sts'el Tabate.

²³Va'i un, taatic ta iq'uel ti israeletic snitilultac ti Neftalie, ti Asere, xchi'uc ti Manasese, yo' jech xba slubiic ta be ti madianitaetique.

²⁴Ja'uc ti Gedeone laj stac batel mantal ta vitstic yu'un ti Efraine. Laj yal ech'el mantal ti ac'o yalicuc talel ta stsaquel ta leto madianitaetic scotol ti viniquetic taje, yo' jech ta xtal smaquic ta be ti bu xu' ta x'ech' xtuch'ic uc'um ta Betbara ti oy ta uc'um Jordán ti c'alal mu to ta xc'otic ti madianitaetique. Ti snitilultac ti Efraine mu ch'ajuc laj ya'iic ti mantale.

²⁵Ma'uc no'ox taje, yu'un tsac yu'unic ti cha'vo' banquilaletic yu'un ti madianitaetique, ti sbiinoj Orebe, ti Zeebe. Ja'uc ti Orebe laj smilic ta lican ch'entic ti ojtiquinbil yu'unic avi tana le'e: “Lican ch'entic yu'un ti Orebe.” Yan ti Zeebe, laj smilic ta banomil ti bu ja' sbiinoj ti Zeebe, ta yavil ti bu ta xich' pits'el ti uva ta sventa ti vinoe. C'alal laj yo'ntonic ta slubiel snutsel ta be ti madianitaetique, sjol ti Orebe xchi'uc sjol ti Zeebe, xchechojbeic batel ta stojol ti Gedeón ti oy ta jot uc'um Jordane.