Read Tzotzil Apocalipsis 1 Bible Online

Apocalipsis 1 - Tzotzil bible

Apocalipsis 1

¹Ti jpoc vun ts'ibabil li'e, ja' sc'oplal ti oy c'usi ac'bat sna' ti Jesucristo yu'un ti Diose, yo' jech ti Jesucristoe ta xac'be sna' ti yajtuneltac ti c'usi jutuc xa sc'an ta xc'ot ta pasele. Ti Jesucristo eque laj stac talel yaj'ánjel yo' tal yac'be sna' ti Juan ti yajtunele.

²Jech ti Juan eque, jamal laj yal scotol ti c'usi laj yile, yu'un ja' rextico yu'un ti sc'op Dios ti laj svinajes ti Jesucristoe.

³Jun no'ox yutsil ti buch'utic ta sq'uelic ti vun li'e, xchi'uc ti buch'utic ta xchiquintaic ta ya'yiel ti c'u s'elan ta scaj'al ti ch'ul c'op li'e, ti ta xich'ic ta muc' ti c'u s'elan li' ts'ibabil ta jpoc vune, yu'un jutuc xa sc'an ta xc'ot ta pasel ti c'usi yaloj ti Diose.

⁴Vu'un Juan ta jts'iba batel ti jvun ta stojol ti vuc-chop tsobobbail ti oy ta Asia banomile. Ich'beic slequilal yutsilal xchi'uc slamajemal yo'nton ti Diose, ti ja' ono'ox Dios avi tana li'e, ti ta vo'ne talele, ti oy sc'oplal ta xtale, xchi'uc ta sventa ti Ch'ul Espíritu ti oy vuctos ti stalel ti bu oy ta spas mantal ti Diose,

⁵xchi'uc ta sventa ti Jesucristoe, ti Buch'u j'ech'el laj sva'an sba ta rextico ti c'usi ta xale, xchi'uc ti Buch'u ja' ba'yel cha'cuxie, ti oy ta yoc ta sc'ob ti ajvaliletic li' ta banomile. Yu'un laj xc'uxubinotic ti Cristoe, laj spocbotic jmultic ta sventa laj smal ti xch'ul ch'ich'ele.

⁶Yu'un ta sventa Cristo, lijc'ot ta ajvalil, ta pale yo' jech ta xijtun ta stojol ti Diose, Stot ti Cajvaltic Jesucristoe. Jechuc o sbatel osil, ich'biluc ta muc' ti slequil yutsile, ti smuc'ul stsatsale. Jechuc.

⁷Ti Jesucristoe ta xtal ta ba toc. Scotolic ta xilic, ta xilic ec ti buch'utic laj sjipanic ta curuse. Ti jujun lum ti oyic ta sjoylej banomile ta x'oq'uic c'alal ta xilic ta xtale. Jech ono'ox ta xc'ot ta pasel. Jechuc.

⁸Ti Cajvaltic Dios ti scotol xu' yu'une, ti ja' ono'ox Dios avi tana li'e, ti ta vo'nee, ti oy sc'oplal ta xtale, xi ta xale: —Vu'un ti sliqueb spajebe.

⁹Vu'un Juan, jchi'il jbatic, jmoj ta xquich' jvocoltic ta sventa ti jmoj laj jtatic ventainel yu'un ti Diose, xchi'uc jmoj ta xac'botic yip co'ntontic ti Jesucristoe. Ti vu'une tiq'uilun ta chuquel ta Patmos banomil ti joyobtabil ta nab ta sventa ti ta xcal ti ch'ul c'op yu'un Dios ti laj yac'bun jna' ti Jesucristoe.

¹⁰C'alal sc'ac'alil yich'el ta muc' ti Cajvaltique, ja' o liventainat yu'un smuc'ul stsatsal ti Ch'ul Espiritue, xchi'uc laj ca'i oy Buch'u tsots c'opoj talel ta jpat ti co'ol s'elan yech'omal snuc' ti corneta

¹¹ti xi laj yalbune: —Ti c'u s'elan ta xavile, ts'ibao ta jpoc vun. Taco batel ta stojol ti vuc-chop tsobobbail ti oy ta Asia banomile: ti Efesoe, ti Esmirnae, ti Pérgamoe, ti Tiatirae, ti Sardise, ti Filadelfiae, xchi'uc ti Laodiceae.

¹²Lijoybij ta sq'uelel batel ti Buch'u ta xisc'opone. Ti c'alal jech laj jpase, laj quil vucub yavil cantila ti naca meltsanbil ta oroe.

¹³Ta o'lol ti bu oy ti vucub yav cantilae, laj quil ti oy Buch'u va'al ti xco'olaj jech c'u cha'al xchi'uc vinic, c'otem c'alal to lumtic ti yoc sc'u' slapoje, xchi'uc c'otem ta sti' yo'nton ti oro chuquil xchuquinoje.

¹⁴Ti stsotsil sjole, sac ta j'ech'el jech c'u cha'al ti saquil tsotse, mi jech c'u cha'al ti saquil bote, co'ol s'elan leb c'oc' yilel ti sbec' sate.

¹⁵Ti yoque xojobin no'ox yutsil jech c'u cha'al ti ch'ulbil tsatsal c'anal taq'uin ti laj yich' ch'ulel ta c'oq'ue. Ti sc'opojel xtoque co'ol s'elan yech'omal epal uc'umetic.

¹⁶Ti ta sbats'i c'obe stsacoj vucbej c'anal. Ja' jech xtoc co'ol s'elan jich'il espada yich'oj cha'jot ye ta xloc' talel ta ye. Sjunul ti sate co'ol s'elan xojobal c'ac'al ti c'alal tsots xnobet ti xojobale.

¹⁷C'alal jech laj quile, co'ol s'elan chamem liyal ta lum ta sts'el yoc. Ja'uc ti stuque laj scajan talel sbats'i c'ob ta jtojol ti xi laj yalbune: —Mu xaxi', yu'un vu'unun ti sliqueb spajebe.

¹⁸Vu'un ti stalel cuxulune. Licham to ox, avi tana une, cuxulun sbatel osil, yu'un oy xa ta coc ta jc'ob syavial ti lajebale, xchi'uc ti bu ta xbatic ti animaetique.

¹⁹Ts'ibao ta jpoc vun ti c'usi laj xa avile, ti c'usi syaquil ta xc'ot ta pasele, xchi'uc ti c'usi ta to xc'ot ta pasele.

²⁰Le'e, xi smelol ma' ti vucub c'anal ti jtsacoj ta jbats'i c'ob laj avile, xchi'uc ti laj avil ti vucub yavil cantila meltsanbil ta oroe: ti vucbej c'anale, ja' sc'oplal ti buch'u sventainojic ti vuc-chop tsobobbaile. Ti vucub yavil cantile, ja' sc'oplal ti vuc-chop jch'unolajeletique.