Read Tzotzil Apocalipsis 19 Bible Online

Apocalipsis 19 - Tzotzil bible

Apocalipsis 19

¹Laj taj une, laj ca'i oy buch'u ep ta xc'opojic ta vinajel ti xi tsots ta xalique: “Ta sventa smuc'ul stsatsal slequilal yutsilal Dios cu'untic, laj jtatic ti pojel colele. Colij'albat yu'un.

²Yu'un jbel sc'oplal tuc' ta xchapanvan, Laj xa yac'be stoj smul ti me' jmulivajel antse, ta scoj ti lec xa'i sbolomalin sbae, ti laj soques ti jnaclejetic ta sjoylej banomile. Ti Diose laj xa spacbe sutel ti lajic ta milel ti yajtuneltaque.”

³Laj taj une, laj ca'i ti xi lic yalic xtoque: “Sbatel osil xtomet ta xmuy ta vinajel ma' ti xch'ailale. Coliyal ti Diose.”

⁴Ti chanib xcha'vinic (24) ta vo' moletique, xchi'uc ti chanib c'usi cuxulique, snupilanic xa banomil laj spatan sbaic ta lumtic ta yich'el ta muc' ti Dios ti chotol ta muc' ta chotlebale, xi lic yalilanique: “Lequil c'optabiluc ti Diose. Jechuc.”

⁵Oy Buch'u c'opoj talel ta muc' ta chotlebal ti xi ta xale: “Acotolic yajtuneloxuc ti Diose, ti ta xaxi'taique, ti yalel toyol ti abijilique, lequil c'optaic ti Dios cu'untique.”

⁶Laj ca'i xtoc ti oy buch'u yepal no'ox ta xc'opojic ti xvochvun ta j'ech'ele, ti co'ol s'elan yech'omal epal uc'um, mi co'ol s'elan tsots chauc xc'avlajet ti xi ta xalique: “Lequil c'optabiluc ti Diose, yu'un och xa ta spas mantal ti Cajvaltique, ti Dios cu'untic ti scotol xu' yu'une.

⁷Laetuc, muyubajuc co'ntontic ta j'ech'el ta yalbel yutsil slequilal, yu'un sta xa yorail ta xnupun ti jcot ta Uni Chije, ti xi s'elan xchapanoj sba ti yajnile:

⁸Albat xa sc'oplal ta slap ti lino poq'ue, ti xlaplun no'ox yutsil ti saquile. Yu'un ti lino taje, ja' sc'oplal ta xac' ta na'el ti oy slequil stuq'uil c'usitic laj spasic ti buch'utic yu'untac ti Diose.”

⁹Xi laj yalbun ti anjele: “Xi xats'ibae: ‘Yan no'ox yutsilic ti buch'utic ic'bilic ta sq'uelel nupunel yu'un ti jcot ta Uni Chije.’ ” Xi to laj sts'ac batel ti lo'ile: “Taje, ja' sc'op Dios ta melel.”

¹⁰Laj jquejan jba ta yoc ti anjele yo' ta xquich' ta muc', ja'uc le'e, xi laj yalbune: “Mu jechuc xapas, ja' ich'o ta muc' ti Diose. Ti vu'une, naca yajtunelun Dios jech c'u cha'al ti vo'ote xchi'uc ti achi'iltac ti buch'utic jun yo'ntonic ta stojol c'u s'elan yaloj comel ti Jesuse.” Ti tijbil sjol yo'ntonic ti j'alc'opetic ta yalbel sc'oplal ti Jesuse, ja' ta xac' ta na'el stuc ti Jesuse.

¹¹Laj taj une, jamal ti vinajel laj quile, vinaj jcot saquil ca'. Ti buch'u scajlebinoje, ta x'albat sc'oplal J'ech'el Oy Stuq'uil Yo'nton, yu'un ta stuq'uil slequil yo'nton ta xventainvan xchi'uc ta stuq'uil yutsil yo'nton ta xletovaj.

¹²Ti sbec' sate xojobin no'ox jech c'u cha'al leb c'oc'. Yepal no'ox sronail sjol slapoj. Ts'ibabil jun biil xtoc ti ja' no'ox xojtiquin ti stuque.

¹³Cheq'uel ta ch'ich' ti sc'u' slapoje, ti xi ma' ti sbie: ja' Sc'op ti Diose.

¹⁴Nabalic batel ta spat epal anjeletic ti lic talel ta vinajele, ti slapojic ti lino poc' ti jun yutsil ti saquile, ti cajalic ta saquil ca'e.

¹⁵Ti Buch'u cajal ta ca'e, ta xloc' ta ye jun espada ti juxbil lec yee, yo' ta syayijesan ti jujun muc'tiquil lume. Co'ol s'elan tsatsal taq'uin, jbel xc'opoj ta spasvan ta mantal. Ti jech mu'yuc xa c'usi x'ech' o ta xa'i yu'un sc'ac'al yo'nton ti Dios ti scotol xu' yu'une, ja' stuc ta st'us ta yacan ti uva oy ta yavile, yo' ta xloc' ti vino ta yac'bel yuch' ti jnaclejetic ta banomil ti ta sta svocolic yu'une.

¹⁶Ts'ibabil ta sc'u' nopol yac'ol sjol yacan jun biil ti xi ta xale: “Banquilal Ajvalil yu'un ti muc'tiquil ajvaliletique. Banquilal Ajvalil yu'un ti its'inal ajvaliletique.”

¹⁷Laj quil jun ánjel xtoc ti va'al ta sba ta sat ti c'ac'ale, ti xi tsots ta xavta scotol ti mutetic ti xvilajet ta vinajele: “Tsobo abaic talel, la'ic ta sventa muc' ta ve'el ta xac'boxuc ti Diose.

¹⁸Yu'un ta xati'beic sbec'tal ti banquilal ajvaliletique, ti jpas-mantal yu'un ti soldadoetique, ti tsatsal viniquetique, sbec'tal ti ca'etique xchi'uc ti buch'u cajlejetic ta ca'e, sbec'tal stacopal ti mosoviletique, ti ma'uc mosoviletique, ta biq'uit ta muc'.”

¹⁹Laj quil ti jti'oval chone, xchi'uc ti ajvaliletic oyic ta banomile, xchi'uc ti yajsoldadotaque, ti laj stsob sbaic talel ta stsaquel ta leto ti buch'u cajal ta saquil ca'e, xchi'uc ti yajsoldadotaque.

²⁰Ti jti'oval chone och ta c'abal jmoj xchi'uc ti jlo'lavanej j'alc'op ti laj yac' iluc ti oy c'usi ch'ayal ta xc'ot o'ntonal yu'un ta stojol ti jti'oval chone. Ta sventa ti laj yac' iluc oy c'usi ch'ayal ta xc'ot o'ntonal yu'un ti jlo'lavanej j'alc'ope, laj slo'laan ti buch'utic sq'ueloj xa no'ox sba laj yich'ic smarcail ti jti'oval chone, xchi'uc ti laj yich'beic ta muc' ti sloc'obbaile. Va'i un, ti jti'oval chone, xchi'uc ti jlo'lavanej j'alc'ope, cuxul jipatic yalel ta c'oc' ti bu ta xtil ta azufree.

²¹Ti yane laj yich'ic milel ta espada ti ta xloc' ta ye ti Buch'u cajal ta ca'e. Ech' yo'nton scotol ti mutetic ta sti'bel ti sbec'tal ti buch'u lajic ta milele.