Read Tzotzil Apocalipsis 21 Bible Online

Apocalipsis 21 - Tzotzil bible

Apocalipsis 21

¹Laj taj une, laj quil jun ach' vinajel xchi'uc jun ach' banomil, yu'un ti ba'yel vinajele, ti ba'yel banomile laj tsuts xa sc'oplal. Jech ec ti muc' ta nabe tsuts sc'oplal.

²Ti vu'un Juane laj quil ti ch'ul jteclume, sc'oplal ti ach' Jerusalén ti lic talel ta stojol Dios ti oy ta vinajele. Lec smeltsanoj sba ta j'ech'el jech c'u cha'al junuc jmalijel tseb ta snupel ta be ti slecome.

³Laj ca'i oy buch'u tsots x'avet ta xlic talel ta vinajel ti xi ta xale: “Q'uelo avil li'e, ja' xa ti bu ti Dios ta xchi'in ti jnaclejetique. Ti stuque ta xchi'in ta naclej ti jnaclejetic ti ja' steclumale. Ti stuquique c'otic xa ta yalab xnich'nab ti Diose, xchi'uc ja' xa c'ot ta Dios yu'unic.

⁴Scotol ta scusbat ya'lel satic yu'un ti Diose, yu'un laj xa sc'oplal ti chamebal lajel ta stojolique, ti oq'uel avanele, ti at-o'ntone, ti ip c'ux ta xa'iique, yu'un x'ech' jelav xa sc'oplal ti c'u s'elan oy ta vo'nee.”

⁵Ti Buch'u chotol ta muc' ta chotlebale, xi laj yale: “Vu'un ta jpas ta ach' scotol ti c'usitic oye.” Xi laj yal xtoque: “Tsaco ta vun ti c'op li'e, ja' melel, stac' patel o'ntonal ta stojolal.”

⁶Ts'acal to un, xi laj yalbune: “C'ot xa ta pasel. Vu'unun ti sliqueb spajebe, yu'un vu'un laj jliques, vu'un ta jlajes. Ti buch'u ta xa'i taqui ti'ile, ta xcac'be yuch' ti sat vo' ti ta xac' cuxlejale, mi jutebuc tojbil ta j'ech'el.

⁷Ti buch'u mu xlaj ta lo'laele, ti ta stsal yu'un scotole, vu'un ta jva'an jba ta Dios yu'un. Ta xc'ot ta jnich'on ti stuc eque. Ta xcac'be xrextoin scotol taje.

⁸Ja'uc ti buch'utic xi'el no'ox xa'i sbaique, ti buch'utic mu'yuc c'usi ta xc'ot ta yo'nton ta xch'unele, ti buch'utic xti'et sjolique, ti buch'utic jmilvaneje, ti buch'utic batem yo'ntonic ta mulivajele, ti j'ac'-chameletique, ti buch'utic ta xich'ic ta muc' ti c'usitic meltsanbil ta c'abale, ti buch'utic jutc'opetique, scotolic taje, ta xbatic ta muc' ta c'oc' ti bu ta xtil ta azufree, ti ja' xa xcha'cojal lajebale.”

⁹Tal jun ta yucubal ti anjele, ti oy ta sc'ob ti yucubal sbis noj ta slajeb ti vucub cuxul j'ilbajinvanej vocole, ti xi laj yalbune: “La' li'e, ta xcac'bot avil ti jmalijel tsebe, ja' ti yajnil ti jcot ta Uni Chije.”

¹⁰C'alal laj sjambun jba jsat ti Ch'ul Espiritue, laj quil ti yic'ojun batel ti ánjel ta jun muc' ta toyol vitse. Laj yac'bun quil ti muc' ta ch'ul jteclum Jerusalén ti yal talel ta stojol ti Dios ti oy ta vinajele.

¹¹Ti jteclume xojobin no'ox ta yutsilal ti Diose, xnobet xojobal co'ol s'elan jech c'u cha'al xojobal c'upil sba ton, yu'un sts'ayet no'ox xojobal jech c'u cha'al ti saquil baxtone, ti sts'ayayet no'ox xojobal jech c'u cha'al ti nene.

¹²Ti jteclume joyol ta jun muc' ta moc ti toyol yich'oje, xchi'uc yich'oj lajcheb sti'. Ta jujun ti sti'e, va'ajtic jujun ánjel. Ti ta sti'taque, tsacbil sbiic ti lajcha'chop snitilul Israele.

¹³Oxib sti' oy ta stuq'uil ti sloq'ueb c'ac'ale. Oxib sti' oy ta yolon ti yolon xocon sloq'ueb c'ac'ale. Oxib sti' oy ta yac'ol ti yolon xocon smaleb c'ac'ale. Oxib sti' oy ta smaleb c'ac'ale.

¹⁴Smocal ti jteclume, yich'oj lajcha'bej ton ti c'otem ta yicob ti moque, ti bu tsacbil sbiic ti lajcha'vo' yajtacbolaltac ti jcot ta Uni Chije.

¹⁵Ti ánjel ti laj sc'oponune, oy ta sc'ob co'ol s'elan jun aj meltsanbil ta oro yo' ta sbis ti jteclume, ti jujun sti'e, xchi'uc ti smocale.

¹⁶Chanjot xchiquin yich'oj ti jteclume, yu'un co'ol snatil, sjamlej. Xi s'elan loc' ta bisel yu'un ti ánjel c'alal laj sbis ti jteclume: yich'oj cha'mil xchi'uc lajunvinic (2,200) kilómetro ti snatile, ti sjamleje, ti stailej xmuye.

¹⁷Xi s'elan loc' ta bisel yu'un xtoc spimil yich'oj ti moque: Yich'oj chanib xchanvinic (64) metro. Ti anjele mu yanuc sbisol laj stunes jech c'u cha'al ta stunesic ti jnaclejetic ta banomile.

¹⁸Naca ta jaspe ton meltsanbil ti smocale. Naca bats'i oro meltsanbil ti muc' ta lume, co'ol s'elan nen sts'ayet no'ox yutsil ta j'ech'ele.

¹⁹Nichimtic no'ox ta jmec ta c'upil sba baxton ti jujubej xchotleb sliqueb yoc ti smocale. Ti sliquebale ja' yich'oj ti jaspe tone. T xchibale ja' yich'oj ti zafiro tone. Ti yoxibale ja' yich'oj ti ágata tone. Ti xchanibale ja' yich'oj ti esmeralda tone.

²⁰Ti yo'obale ja' yich'oj ti ónice tone. Ti svaquibale ja' yich'oj ti rubí tone. Ti yucubale ja' yich'oj ti crisólito tone. Ti xvaxaquibale ja' yich'oj ti berilo tone. Ti sbalunebale ja' yich'oj ti topacio tone. Ti slajunebale ja' yich'oj ti crisoprasa tone. Ti xbuluchibale ja' yich'oj ti jacinto tone. Ti xlajchebale ja' yich'oj ti amatísta tone.

²¹Ti lajcha'pech ti' moque, naca ta perla ton meltsanbil. Ti jujupech sti'taque, jpech perla ton yich'oj. Ti muc' ta calle yu'un ti jteclume, naca oro yich'oj, ti sts'ayet no'ox yutsil jech c'u cha'al ti nene.

²²Ti jcot ta Uni Chije xchi'uc ti Cajvaltic Dios ti scotol xu' yu'une, ja' xa c'otem ta xch'ulna ta jteclume. Mu'yuc laj quil yan ch'ulna ti bu taje.

²³Ti ta jteclume, laj to c'op ta xtun xojobal ti c'ac'ale, xojobal ti ue, yu'un ja' xa xojobin stuc ti Diose, xchi'uc ja' xa c'otem ta xojobinel yu'un ti jcot ta Uni Chije.

²⁴Xanavic no'ox ta xojobal jteclum ma' ti jnaclejetic oy ta sjoylej banomile. Ti ajvaliletic oyic ta sjoylej banomil xtoque, ta xac'beic Dios ti sc'ulejalic laj staique.

²⁵Sti'tac ti jteclume, jamal scotol c'ac'al, yu'un laj to c'op ma' ti oy ac'ubal ta jteclum taje.

²⁶Ti yutsil slequilalic laj staic ti jnaclejetic ta sjoylej banomile, ta xaq'uic jelavel ta stojol ti Diose.

²⁷Ti bu taje, laj c'op ta x'och batel ti c'usi chopole, ti buch'u oy c'usi chopol ta spase, ti jlo'lavanejetique. Ja' no'ox ta x'ochic batel ti buch'utic tsacal ti sbiic ta jpoc vun sventa cuxlejal ti oy ta stojol ti jcot ta Uni Chije.