Read Tzotzil Apocalipsis 4 Bible Online

Apocalipsis 4 - Tzotzil bible

Apocalipsis 4

¹Laj taj une, laj jtoy sat, laj quil jamal jun ti'na ta vinajele, ti co'ol s'elan yech'omal snuc' corneta ti laj sc'oponun talel ta ba'yel ti xi laj yalbune: “Muyan talel li'e, yu'un ta xcac'bot avil ti c'usi ts'acal to ta xc'ot ta pasele.”

²Ta jech to yepal un, ventainbil lic'ot yu'un smuc'ul stsatsal ti Ch'ul Espiritue. Laj quil jun muc' ta chotlebal ti ta vinajele, ti oy Buch'u chotol ta muc' ta chotlebale.

³Ti Buch'u chotol ta muc' ta chotlebale, oy xojobal co'ol s'elan ti diamante ton ta xac' xojobale, mi mo'oje, co'ol s'elan ti rubí baxton ti sts'ayts'un no'ox xojobal ta xaq'ue. Ta joyob bu oy ti muc' ta chotlebale, oy jun vacnac'obal xlaplun ti xojobal co'ol s'elan jech c'u cha'al ti esmeralda tone.

⁴Ta joyob bu oy ti muc' ta chotlebale, oy yan chanib xcha'vinic (24) ta cot chotlebal, ti chotolic chanib xcha'vinic (24) ta vo' moletic ti xi s'elan oyique: jun no'ox yutsil ti sc'u' slapojique, xchi'uc slapoj sronail sjolic ti naca meltsanbil ta oroe.

⁵Ti bu oy ti muc' ta chotlebale, xjaplajet no'ox sac tsel, oy c'opojel, xchi'uc xc'avlajet no'ox chauc ta xloc' talel. Ta stuq'uil yeloval ti muc' ta chotlebale, ta xtil vucub leb c'oc', ja' smelol ti vuctos stalel ti Ch'ul Espíritu yu'un ti Diose.

⁶Ta yeloval xtoc ti bu oy ti muc' ta chotlebale, tey oy jun muc' ta nab yilel, ti yaxjipan yutsil co'ol s'elan jech c'u cha'al junuc nene. Ta jujot sti'il ti muc' ta chotlebal oy ta o'lole, laj quil oy c'usi chanib cuxajtic ti yepal no'ox oy sbec' sat ta spat ta sti'bae.

⁷Ti jcot c'usi cuxule, co'ol s'elan jcot ta león. Xchibal ti c'usi cuxule, co'ol s'elan jcot ta tot vacax. Yoxibal ti c'usi cuxule, co'ol s'elan sat vinic. Xchanibal ti c'usi cuxule, co'ol s'elan jcot muc' ta xic ti xvililet no'ox ta xanave.

⁸Ta jujun ti c'usi chanib cuxajtique, yich'oj vaquib xic' ti jujune, noj ta bec' satil ta yolon ta sba ti xiq'ue. C'ac'al ac'ubal mu xicta sbaic ta yalel ti xi ta xalique: “Ch'ul Dios, Ch'ul Dios, lequil Ch'ul Dios ma' ti Diose. Scotol xu' yu'un ma' ti Diose, ti jech no'ox stalel ta vo'nee, avi tana li'e, xchi'uc ti ta to xtale.”

⁹C'alal jujucoj ti c'usi cuxajtic ta xalbeic slequil yutsil ti Buch'u chotol ta muc' ta chotlebal ti stalel cuxul sbatel osile,

¹⁰jech ti chanib xcha'vinic (24) ta vo' moletique, ta squejan sbaic ta stojol ta yich'el ta muc' ti Buch'u stalel cuxul sbatel osile, xchi'uc xi ta xalic c'alal ta sye'ic batel sronail sjolic ta stojol ti Buch'u chotol ta muc' ta chotlebale:

¹¹“Cajval Dios cu'uncutic, ac'otebal o ti ich'bilot ta muq'ue, ti ta xa'albat ti yan avutsile, ti oy amuc'ul atsatsale, yu'un vo'ot laj apas scotol ti c'usitic oye, yu'un loc' ayan ta avo'nton ti jech oy scotol ti c'usitic laj ameltsane.”