Read Tzotzil Rut 2 Bible Online

Rut 2 - Tzotzil bible

Rut 2

¹Ti Noemie oy yuts' yalal ta sventa ti anima smalal Elimeleque, ti sbiinoj Booze, ti ja' jun c'ulej vinic ti caj tsacal xa'i sbae.

²Oy jun c'ac'al, ti Rute xi laj yalbe ti Noemie: —Ac'bun ave ati', ta xiloc' batel ta xc'uxc'ultael trigo ta osiltic. Ta jnaban jba ta spat junuc ti buch'u yacal ta stsob ts'unubal ti mi xaq'ue —Batan, jtseb —xi tac'bat yu'un ti sme'alibe.

³Ti Rute bat ti bu xyaquet ti j'abteletic ta osiltique. Yochel ta xc'uxc'ultael ti bu javajtic ta xcom sjol ti ts'unubal yu'un ti jtsob-trigoe. Lec xa c'ot o yorail yu'un, yu'un ti osil ti bu taje, ja' yu'un ti Booz ti yuts' yalal ti Elimeleque.

⁴C'alal ja' o c'ot ti Booz ti lic batel ta Belene, xi c'ot sc'oponan ti jtsob-ts'unubale: —Coliyal ti Dios ti li' xchi'inojoxuque. —Jechot ec, ac'o sva'an sba ti Dios ta atojolale —xi laj stac' ti stuquique.

⁵Laj taj une, ti Booze xi bat sjac'be ti jq'uelvanej yu'un ti jtsob-ts'unubale: —¿Buch'u yuts' yalal ti tseb le'e?

⁶Ti jq'uel-j'abtele xi laj staq'ue: —Ja' jun moabita ti xchi'inoj talel ta Moab ti Noemie.

⁷Laj sjac'bun mi xu' ta xc'uxc'ulta batel trigo ti nabal ta spat ti jtsob-ts'unubale. Sob ic'luman xnabet talel toy talel c'ac'al yu'un ta c'uxc'ulajele, ti ja' to laj xcux uni jliquel le'e.

⁸Va'i un, ti Booze xi bat yalbe ti Rute: —A'yio ava'i, tseb, ti c'usi ta xcalbote, mu xbat c'uxc'ulajan ta yan osil. Li' no'ox nabetan batel ta spat ta xocon ti caj'abteltaque.

⁹Nabetan batel ti bu ta x'abtejic ech'el ti caj'abteltac ta xavile. Yu'un laj calbe mantal ti caj'abteltaque ti mu junuc ta xayutilane. C'alal ta xavuch' ava'i vo'e, batan ti bu oy ti yavile, uch'an ti bu ta slupic loq'uel eque.

¹⁰Snupilan xa banomil laj spatan sba ta lumtic ta x'ich'van ta muc' ti Rute, ti xi laj sjac'be ti Booze: —¿C'u cha'al toj c'ux ta xavilun ta aba ta asat, ti ta xavac' ta q'uelel ti yutsil avo'nton ta jtojol ti c'alal jyanlum antsune?

¹¹Xi tac'bat yu'un ti Booze: —Yu'un jna'oj lec scotol ti c'u s'elan laj apas aba talel ta stojol ti ame'alib ti c'u xa sjalil xchamel talel ti amalale. Jna' lec xtoc ti laj acomtsan atot ame'e, xchi'uc alumal ti tal naclan ta jtojolcutic ti mu ja'uc xavojtiquinuncutique.

¹²Scotol ti c'usi lec laj apas talele, Dios, ac'o xa xq'uextabot sutel. Ac'o xayac'bot amoton ti Ajvalil ti ja' Dios yu'un ti Israele, ti laj asa' apojel ta stojole.

¹³Ti stuque xi laj staq'ue: —Spajeb xa o oy yutsilal avo'nton ta jtojol. Xcuxet xa banomil ta xca'i yu'un ti ac'ope. Yu'un ta yutsilal slequilal avo'nton laj achi'inun ta lo'il c'alal mi ja'uc junucun avajmosove.

¹⁴C'alal sta yorail ti ve'ebale, ti Booze xi laj yalbe ti Rute: —La' li'e, ilo jutebuc pan, ts'ajo li' ta ya'lel ve'lile. Jmoj lic chotiicuc xchi'uc j'abteletic ti Rute, ti ac'bat ch'ilbil trigo yu'un ti Booze. Laj stun laj slajes ti tsebe. Noj lec xch'ut. Com to scomelal yu'un.

¹⁵Laj taj une, c'alal bat to c'uxc'ulajuc yan veltae, ti Booze xi laj yalbe mantal ti yaj'abteltaque: —Q'uelic no'ox ti c'uxc'ulajuc ti bu busul ti chucbiquil jchop o ta trigoe. Mu xa jalanbeic.

¹⁶Yalel xa xabajesic yalel jbej cha'bejuc c'alal ta xachuquique yo' ta stsob ti tsebe. Mu me buch'u xutilan avu'unic un.

¹⁷Ti Rute yich'oj bat c'ac'al ta xc'uxc'ultael ti jchop o ta trigo ta yosil ti Booze. C'alal laj smaj ti c'u yepal laj sta ta tsobele, x'ech' to ta jtob (20) kilo laj sta ta tsobel ti jchop o ta trigoe.

¹⁸Xt'inet xcuchoj batel yicats c'alal sut batel ta jteclume. C'ot yac'be yil ti sme'alibe. Laj taj une, lic sloq'ues talel scomelal ti ve'lile, laj yac'be ti Noemie.

¹⁹Xi jac'bat yu'un ti Noemie: —¿Bu laabtej nax le' une? ¿Bu ay atsob talel ti ep ta jmec ti sat jchop o ta trigoe? C'uxubinatuc ta j'ech'el ti buch'u laj scoltaot le'e. Ti Rute xchapet lic yalbe ya'i ti sme'alibe, buch'u ta yosil ti bu ay ta c'uxc'ulajele. —Ti bu li'ay ta c'uxc'ulajele, ta yosil jun vinic ti sbiinoj Booze —xi laj yal.

²⁰Xi tac'bat yu'un ti Noemie: —C'uxubinatuc yu'un ti Diose. Yu'un laj xa yac' ta ilel yutsil slequil yo'nton ta jtojoltic avi tana li'e, ti laj xc'uxubinan ti buch'utic chamem xae. Ti vinic taje, ja' jun jnamtal uts' alaltic ti oy ta sventa xispojotic xiscoltaotique.

²¹Xi laj sts'ac batel lo'il ti Rute: —Laj yalbun xtoc ti xu' la xic'uxc'ulaj xchi'uc yaj'abteltaque, ja' to la ti c'uxi ta xc'ot ta tsutsel stsobel ti ts'unubale.

²²Va'i un, ti Noemie xi laj stac'be ti yalibe: —Jtseb, lec ta xca'i ti ta xacom o xchi'uc ti yaj'abteltaque, ti mu xabat ta yan osil yo' jech mu xata ilbajinele.

²³Ti Rut une nabal o ta xc'uxc'ultael trigo xchi'uc sme' mosovtac ti Booze, ja' to ti c'uxi tsuts stsobel ti jchop o ta trigoe xchi'uc ti trigoe. Jmoj nacalic ta naclej xchi'uc sme'alib ti stuque.