Read Tzotzil Rut 3 Bible Online

Rut 3 - Tzotzil bible

Rut 3

¹Ti Noemie, oy jun c'ac'al ti xi laj yalbe ti Rute: —Jtseb, ta jsa'bot anup achi'il yo' ta xata jun avo'nton yu'une.

²A'yio ava'i, ti cuts' calaltic Booze, ti lac'uxc'ulaj xchi'uc ti sme' mosovtaque, ti ac'ubal tana li'e, ta xbat ta yosil ta st'ujbel sc'a'epal ti sat sts'unubale.

³Chapano aba ta spasel jech c'u cha'al li'e: Atinan lec, muibtaso aba ta muil poxil. Lapo ti avutsil c'u'e. Batan ti bu taje. Ja' no'ox un, mu to me xavac' aba ta ilel ta stojol ti Booz c'alal mu to ta xlaj yo'nton ta ve'el ta uch' vo'e.

⁴Q'uelo lec ti bu ta xpuch'an sba vayuque. Va'i un, batan, jolbo ti yoque, puch'ano aba ta vayel ti bu taje.[9] Ts'acal to un, ja' xa stuc ta xalbot ti c'usi ta xapase.

⁵Xi laj stac' ti Rute: —Lec oy, ta jpas scotol ti va'i s'elan laj avale.

⁶Ti Rute bat ti bu ta xich' majel ti trigoe, ti jech lic spas scotol jech c'u cha'al albat yu'un ti sme'alibe.

⁷Ve' yuch' vo' ti Booze, xlaet no'ox ti yo'nton ta xvinaje. Ts'acal to un, bat xpuch'an sba vayuc bu busul ti sat ts'unubale. Lec xa ox jliquel un, c'un c'un xa bat ti Rute. C'ot sjolbe ti yoque, lic xpuch'an sba vayuc.

⁸C'alal vul xch'ulel ta o'lol ac'ubal ti Booze, c'alal ja' o lic sjoybin sbae, toj ch'ayal c'ot yo'nton laj yil ti puch'ul ta xvay jun ants ta yoque.

⁹—¿Buch'uot? —xi laj sjac' ti Booze. Xi laj stac' ti Rute: —Vu'unun avajtunelun Rut, ti jnamtal uts' alalote, ti tsots sc'oplal ta xatic' aba ta jpojel jbainele, ti c'otuc ta avo'nton ic'une.

¹⁰Xi laj yal ti Booze: —Ac'o sva'an sba ta atojolal ti Diose. Avi tana une, ta j'ech'el laj avac' ta ilel ta q'uelel ti achabioj aba ta stojol ti anima amalale. Yu'un ti jechuque, ja' laj asa' ti bu querem toe, mi jc'ulej, mi me'un, ti mu to ta sta syijil jech c'u cha'alune. Mu ja'uc jech laj apas.

¹¹Mu xaxi', tseb, scotolic ti li' ta jlumale sna'ic xa ti ja' jun antsot ti laj avac' ta ilel ti c'usi leque. Jech o xal un, ta jpas ti c'usi ta xac'anbune.

¹²Ti jech anamtal uts' alalune, ja' melel ava'uc. Ja'uc le' une, oy to avuts' avalal ti nopol xavil abaic xchi'uque, ti mu xco'olaj ti vu'une.

¹³Li' ech'uc avu'un ti ac'ubal avi tana li'e. Mi oc'om ta sc'an ta xc'ot ta pasel yu'un jech c'u cha'al liquem ta spasel ti namtal uts' alalil xa'i sbaique, ac'o spas. Yan ti mi mu jechuque, ta sba ta sat ti Diose, ta xcal ta jamal ta jpas ti vu'une. Avie, vayan, ja' to mi sacube.

¹⁴Ti jech ac'ubal taje, vay ta yoc Booz ti Rute. Ta yoc'omal, ic' to, sc'an to sacub, lic, ti xi ono'ox laj yal ti Booze: “Tsots sc'oplal, mu'yucuc buch'u sna' tal jun ants li' ta yavilal abtelale.”

¹⁵Va'i un, xi albat yu'un ti Booze: —Tsaco talel ti amochibe, yombo lec sba. C'alal syomojbe lec sba xmochib ti Rute, x'ech' ta cha'vinicuc (40) kilo jchop o ta trigo laj scocan ochel ti Booze. Ts'acal to un, laj yac'be batel xcuch ti yicatse, bat ta jteclum ti antse.

¹⁶C'alal c'ot ti Rut ti bu oy ti sme'alibe, xi jac'bat yu'une: —¿Mi lec ti c'usi laj atae, jtseb? Ti Rute xcholet lic yalbe ya'i scotol ti c'usi laj spas ti Booz ta stojole,

¹⁷ti xi to lic sts'ac batel ta yalilan ti slo'ile: —Laj yac'bun talel scotol ti jchop o ta trigo li'e, ti xi laj yalbune: “Altic ma' ti ameyoj avoc ac'ob ta xasut batel ta stojol ti ame'alibe.”

¹⁸Va'i un, xi laj yal ti Noemie: Avi tana une, jtseb, malo ava'i c'usi ta xc'ot ta pasel. Yu'un ti vinic le'e, mu teyuc no'ox xch'ayet avie, ja' to ti c'uxi ta xc'ot ta chapel yu'un ti c'usi sc'an pasele.