Read Tzotzil Rut 4 Bible Online

Rut 4 - Tzotzil bible

Rut 4

¹Ech' c'uc sjaliluc un, ti Booze bat xchotan sba ta ochebal sti' ti jteclume, ta yavil ti bu ta stsob sbaic ti jnaclejetique. Ta yorail taje. ja' o jelav ti uts' alalil ti laj yalbe sc'oplal ti Booze, ti xi albat yu'un ti Booze: —Mala un to, yu'un ta xajc'oponot. La', chotlan li'e. Ti uts' alalile bat chotluc.

²Ta jech no'ox yepal un, ti Booze laj sta ta iq'uel lajunvo' (10) moletic yu'un ti jteclume, ti laj yalbe ya'i ti jmoj ac'o chotliicuc xchi'uque. C'alal chotolic xa xchi'uque,

³ti Booze xi laj yalbe ti yuts' yalale: —Ti Noemie sut xa talel ta Moab. C'ot ta nopel yu'un ti ta xchon ti sbanomil ti bu smacoj ti cuts' calaltic Elimeleque.

⁴Ta xcac'bot ana', yu'un mi oy ta avo'nton ta xamane, alo ca'itic li' ta sba ta sat ti rexticoetique, xchi'uc ti moletic yu'un ti jteclume. Ti jech bats'i yuts' yalalot ti Elimeleque, oy me ac'oplal ta xamanbe ti yosile. Yan ti mi mu xac'an xamane, ac'bun jna', jnamtal uts' alalun xca'i jbatic ec, ti xu' ta xquich'e. Xi laj stac' ti uts' alalile: —Ta jman.

⁵Va'i un, ti Booze xi jamal laj yale: —Na'o ava'i lec un, mi ta xamanbe yosil ti Noemie, tsots sc'oplal ta xavic' ti Rute, ti jun me'unal moabita antse, yo' jech mu xch'ay yajval ti rextoil yu'un ti animae.

⁶C'alal jech laj ya'i ti uts' alalil taje, xi laj staq'ue: —Ti jech s'elan taje, mu xu' ta jman, xu' ta xlic soquesbe sc'oplal ti jrextoe.[10] Mi ta xc'ot ta avo'nton ta xamane, mano, ta xcac' que ti c'otan ta yajvale.

⁷Ti jech c'ac'al ta vo'ne taje, xi s'elan ma' ti liquem yu'unic ta Israele: c'alal mi ta xac' ye ta sjelbe yajval ti oy c'usi yich'oj ti uts' alalile, mi oy c'usi ta smanbe sbaique, mi ja' ti buch'u ta xac' yee, mi ja' ti buch'u ta xchone, ta sloc' ti xonobe. Ta xac'be yich' ti jmanolajele. Taje, ja' svinajeb ti ta xc'ot ta pasel ti c'u s'elan liquem yu'unique.

⁸Ti yuts' yalal ti Booze laj sloc' ti xonobe, ti xi laj yal c'alal laj yac'be jelavel xonobil ti Booze: —Mano.

⁹Va'i un, ti Booze xi laj yal ta sba ta sat ti moletique, xchi'uc ti c'u yepal joyolique: —Avi tana li'e, rexticooxuc acotolic ti ta jmanbe xrexto ti Noemie, ti Elimeleque, ti Quelione, xchi'uc ti Mahlone.

¹⁰Rexticooxuc xtoc ti ta xquic' ti Rut ti me'unal moabita antse yo' jech mu xch'ay sc'oplal ti Mahlón ta rextoil ti anima smalale. Ja' jech xtoc, mu xtub o sc'oplal ti Mahlón ta stojol ti anitilulique. Mi ja'uc ta xch'ay ta o'ntonal ti li' ta jteclume. Rexticooxuc ti c'ac'al avie.

¹¹Ti moletique xchi'uc scotol ti c'u yepal joyolique, xi laj staq'uique: —Melel ava'uc unbi, rexticouncutic. Ti ants ti ta x'och ta anae, ¡ac'o sva'an sba ti Dios ta stojole jech c'u cha'al c'ot ta stojol ti Raquele xchi'uc ti Leae, ti jcotoltic lic talel jts'unubaltic yu'unic ti vo'otic ti israelotique! Ti vo'ote ja'uc junuc vinicot ti caj tsacal xava'i aba li' ta Efratae, ti ja'uc junuc vinicot ti ich'bilucot ta muc' li' ta Belene.

¹²Ac'o yac'bot ep anich'nab ti Dios ta sventa ti ants li'e. Epajuc ta j'ech'el ti avalab anich'nabe jech c'u cha'al ac'bat ti Farese,[11] ti ja' yol xnich'onic ti Tamare xchi'uc ti Judae.

¹³Ja' jech c'ot ta pasel ti nupij ts'aqui ti Booz xchi'uc ti Rute. Laj xchi'in ti yajnile. Laj yac' ye sti' ti Dios ti lic xchi'in ti yole, ti laj yilbe sat jun squereme.

¹⁴Va'i un, ti antsetique xi ta xalbeic ti Noemie: —Lequil c'optabiluc ti Diose ti laj yac'bot jun amom ti ta xlic stuc'ulanote. Ja'uc la jun amom ti jelavem cajal sc'oplal c'otuc li' ta Israele.

¹⁵Ja' ta smuq'uibtasbot avo'nton, ta sq'uelot, ta stuc'ulanot c'alal yayilot xae. Yu'un squerem ol avalib ti mu tenbajot ta yo'ntone, ti ech'em stunel avu'une, ti ja' mu sta stunel avu'un ti ja'uc oyuc vucub avalabe.

¹⁶Ja'uc ti Noemie laj xq'uech ti olole, lic sbain ta sts'itesel.

¹⁷Xi ta x'albat yu'un ti slac'natac c'alal laj yilique: —Voq'uesbat xa jun yol ti Noemie. Obed,[12] laj yac'be sbiin. Taje, ja' stot ti Isaie, smuc'tot ti Davide.

¹⁸Snitilultac ti Farese, ja' jech li'e: Nich'naj ti Farese, Hesrón laj yac'be sbi.

¹⁹Nich'naj ti Hesrone, Ram laj yac'be sbi. Nich'naj ti Rame, Aminadab laj yac'be sbi.

²⁰Nich'naj ti Aminadabe, Nahasón laj yac'be sbi. Nich'naj ti Nahasone, Salmón laj yac'be sbi.

²¹Nich'naj ti Salmone, Booz laj yac'be sbi. Nich'naj ti Booze, Obed laj yac'be sbi.

²²Nich'naj ti Obede, Isaí laj yac'be sbi. Nich'naj ti Isaie, David laj yac'be sbi.