Read Tzotzil 1 Samuel 10 Bible Online

1 Samuel 10 - Tzotzil bible

1 Samuel 10

¹Va'i un, ti Samuele laj stsac aceite ti oy ta limitee. Laj sq'uebbe yalel ta sjol ti Saule, ti xi laj yalbee: —Avi tana une, ti Diose laj xa st'ujot ta ajvalil ta sventa ti Israel ti ja' steclumale. Ta xabain ta sventainel. Ta xatic' aba ta spojel ti volibilic yu'un ti scontraique. Xi s'elan svinajeb ta xc'ot ta atojolal ti la'och ta ajvalil yu'un ti steclumal jech c'u cha'al li'e:

²C'alal ta xach'ac aba ta jtojol avi tana li'e, ti ta Selsae, ta xanup ta be cha'vo' vinic ta nopol ti bu mucul ti Raquel ti oy ta yosilal ti Benjamine. Ti viniquetic taje, ja' ta xalic ava'i ti laj staic ti burroetic ta xasa'olane. Jech xtoc ta xalbot ava'i ti ma'uc xa ta svul yo'nton ti atot yu'un ti burroetique, ti ja' xa ochem ta vul o'nton ta atojolic ti ta sjac'olanbe sba ti c'usi xu' ta spase.

³Ta jelavel ech'el xtoc une, c'alal ta xac'ot ta tulan yu'un ti Tabore, ta xloq'uic talel oxib viniquetic ta snupelot ta be ti ta xmuyic batel ta Betel ti ta xbat yich'ic ta muc' ti Diose. Ti june yic'oj ech'el oxcot tentsun. Ti xchibale yich'oj batel oxbej pan. Ti yoxibale yich'oj batel jbej yavil vino ti noj ta vino ti meltsanbil ta nucule.

⁴Ta xasc'oponot. Ta xayac'bot cha'bej pan. Tsacbo, ich'bo.

⁵Ts'acal to un, ta xac'ot ta Gabaa ti ja' yu'un ti Diose, ti bu volol ta xata jq'uel-osil filisteoetique. C'alal ta xa xa'och batel ta jteclume, anupoj ta xc'ot ta be ti xvolet talel j'alc'opetic ti ch'ayem xch'ulelic ti loq'uic yalel talel ta ch'ulnae, ti jba'be ech'el yu'unic ti jtij muc' ta set-set taq'uine, ti chij-chij taq'uine, ti amae, xchi'uc ti arpae.

⁶Va'i un, xcuxlejal ti Diose ta xtal yu'ninot. Ta xch'ay ach'ulel yu'un jech c'u cha'al ti stuquique, ti yanot o ta q'uelelot xchi'uque.

⁷C'alal jech ta xc'ot ta atojol une, ja' paso ti c'usi lec ta xavile, Dios ta xa scoltaot.

⁸Jelavan ech'el c'alal to Gilgal ti bu ta xc'ot jnup jbatic ta bee yo' jech ta xcac'tic ti milbil matanal ta sventa ti lajesobil o'ntonale. Vucub c'ac'al xamalaun ja' to mi lic'ote yo' jech ta xcac'bot ana' ti c'usi sc'an ta xapase.

⁹Ta yorail ti c'alal laj xch'ac sbaic ti Samuel xchi'uc ti Saule, ti laj stam batel ti sbee, jeltabat yo'nton yu'un ti Diose. Scotol laj c'otuc ta pasel ti svinajebtac ti jech c'ac'al taje.

¹⁰Ts'acal to un, c'alal c'ot ti Saúl xchi'uc ti smosov ta Gabaae, nupatic ta be yu'un ti j'alc'opetic ti ch'ayem xch'ulelique. Va'i un, ti Saule, u'ninat yu'un xcuxlejal ti Diose. Lic ch'ayuc xch'ulel ta yalilanel c'op ec jech c'u cha'al ti j'alc'opetique.

¹¹Ja'uc le' une, scotolic ti buch'utic xojtiquinic ono'oxe, ti c'alal laj yilic ti xch'ay xch'ulel jech c'u cha'al ti j'alc'opetique, xi lic yalbe sbaic ta jujun tale: “¿C'usi c'ot ta stojol xnich'on ti Cise? ¿Mi ja' jun j'alc'op ti Saúl eque?”

¹²Ti bu taje, oy jun ta scotolic ti xi lic yalilane: “¿Buch'u la ti stotic yu'un ti yalojic le' une?” Ta scoj taje, ja' ti bu lic talel ti xi x'ale ti c'op yu'unique: “¿Mi ja' jun j'alc'op ti Saúl eque?”

¹³C'alal ech' yip ti xvulvun jech c'u cha'al junuc j'alc'op ti Saule, c'ot ta sna.

¹⁴Ti stuque xchi'uc ti smosove, xi jac'batic yu'un ti sjuntote: —¿Bu c'alal la'ayic le' une? Ti Saule xi laj staq'ue: —Ja' ay jsa'cutic ti burroetique. C'alal vinaj lec ti mu na'baj bu oye, ay jt'uncutic ti Samuele.

¹⁵Sjuntot ti Saule xi laj staq'ue: —¿C'usi laj yal ti Samuel une? Avocoluc, lo'iltabun ca'itic.

¹⁶Ti Saule xi laj stac'be ti sjuntote: —Laj yalbuncutic ta jamal ti laj xa yich' tael ti burroe. Ja'uc ti Saul une mu'yuc laj yal ti ta x'och ta ajvalil ti albat yu'un ti Samuele.

¹⁷Ts'acal to un, ti Samuele laj staan ta iquel ti israeletique, ti chba snijan xchiman sbaic ta yich'el ta muc' ti Dios ta Mizpae.

¹⁸Ti bu taje, xi laj yalbee: —Ti Ajvalile, Dios yu'un ti Israele, xi ta xale: ‘Ti israeloxuque, laj jloq'uesoxuc talel ta Egipto. Laj jtic' jba ta acoltaelic ta apojelic ti c'alal oyoxuc ta vocol yu'un ti egipcioetique, xchi'uc ta stojol scotol ti ajvaliletic ti ta xilbajinoxuque.’

¹⁹Avi tana une, ta xabajic ti Dios avu'unique, ti c'alal ja' jpojvanej avu'unic ta scotol ti avocolique, ti bu mu xa xnel ta xava'iic ti at-o'ntonale, ti loc' ta alel avu'unic ta jva'anboxuc junuc ajvalil ti ta xaspasoxuc ta mantale. Ja'uc tana le' une, ta jujuvoc' nitiluloxuc ti bu la'ayanic talele, chapano abaic talel ta sva'anel abaic ta stojol ti Diose.

²⁰Laj taj une, ti Samuele laj yal mantal ti ac'o nopajicuc talel scotolic ti jujuvoc' snitilultac ti Israele. Ja'uc ti yorail ti laj yich' q'uelele, ja' c'ot ta sba snitilultac ti Benjamine.

²¹Laj yal mantal xtoc ti ac'o nopajicuc ech'el ti jvoc' snitilultac ti Benjamine. Ja'uc ti yorail ti laj yich' q'uelele, ja' c'ot ta sba snitilultac ti Matrie. Ja'uc ti yorail ti laj yich' q'uelele, ja' c'ot ta sba ti Saule, xnich'on ti Cise. Lic sa'ic un, mu'yuc laj staic.

²²Ja'uc taj une, lic sjac'beic ti Diose yo' jech ta sna'ic mi tey oy ti Saule. Laj yal ti Diose ti tey oy ti Saule, ti snac'oj sba ta yavil q'uejob c'u'ile.

²³Va'i un, bat snitic loq'uel talel ta anil ti bu snac'oj sbae. C'alal c'ot sva'an sba ta stojol jteclum ti Saule, laj yilic ti yolon to snequeb comem yu'un ti israeletique.

²⁴Xi jac'bat scotolic yu'un ti Samuele: —¿Mi mu lajuc xa avilic c'u s'elan laj st'ujboxuc ajvalil avu'unic ti Diose? ¡Mi junuc israel ti xco'olaj jech c'u cha'al ti stuque! —¡Sc'otebal o ta ajvalilal! —xi avanic ti israeletique.

²⁵Ti Samuele lic yalbe ya'i ti jteclum smelol smantalil ti ventainel yu'un ti ajvalile. Laj sts'iba ta jpoc vun, ti laj yac' ta ch'ul cuarto yu'un ti Diose. Ts'acal to un, ti Samuele laj yal mantal ti ac'o suticuc ech'el ta sna scotolique.

²⁶Ti Saúl eque bat ta sna ti oy ta Gabaae. Oy jayibuc tsatsal viniquetic tijbat yo'ntonic yu'un ti Diose yo' jech ta xchi'inic ta xanobal ti Saule.

²⁷Ja'uc le' une, oy bu c'ot ta pasel ti mu ch'anuc xi ti ye'ique, ti xi lic yalique: “¿Mi ja' la ti jpojvanej cu'untic le'e?” Mu ja'uc laj sbisic ta vinic ta yich'el ta muc'. Ja'uc ti Saule, co'ol s'elan ti mu'yuc xc'ot ta yo'nton yilel spas sbae.