Read Tzotzil 1 Samuel 11 Bible Online

1 Samuel 11 - Tzotzil bible

1 Samuel 11

¹Ti Nahase, ajvalil yu'un ti Amone, bat ta Jabes ti oy ta Galaade, ti chapalic lec yu'un ti yaj'ac'-letotac yo' jech ta stsac ta leto ti jteclume. Ja'uc ti jnaclejetic ta Jabese xi laj yalbeique: —Ac'o ave ati', paso junuc trate ta jtojolcutic. Jech ta xcac' jbacutic ta tunel ta atojol.

²Ti Nahas ti amonitae xi laj staq'ue: —Xu' ta jpas trate ta atojolic mi ta xc'ot ta avo'ntonic ta jpitsboxuc loq'uel jbejuc abats'i satic ti jujunoxuque yo' jech q'uexlaltasbil ta xc'otic ti israeletique.

³Va'i un, ti moletic yu'un ti jteclum Jabese xi laj staq'uique: —Ch'ul abolajan, ac'buncutic vucubuc c'ac'al sjalil yo' jech ta jtaccutic batel a'yej ta sjunlej sbanomil ti israeletique. Ti mi mu'yuc buch'u junucal ta xtal scoltauncutique, ta xcac' jbacutic ta tunel ta atojol unbi.

⁴Ti j'al-mantal j'ich'-c'opetique c'otic c'alal to Gabaa ti bu nacal ti Saule. Lic spuquic ti lo'il a'yej ta stojol ti jnaclejetique. Lic smil sbaic ta oq'uel scotolic.

⁵Taje, ja' o sut talel ta abtel xchi'uc xvacax ta yosil ti Saule, ti xi laj sjaq'ue: —¿C'usi laj spasic ti jnaclejetique? ¿C'u cha'al ta x'oq'uic? Ti jnaclejetique lic yalic ti c'u s'elan yich'ojic talel lo'il a'yej ti viniquetic ti ta Jabese.

⁶C'alal laj ya'i ti Saúl ti va'i s'elan taje, u'ninat yu'un xcuxlejal ti Diose, ti lic socuc sjol ta j'ech'ele.

⁷Va'i un, laj stsac talel cha'cot tot vacax. Lic sbic'tal xet'olan ta bojel. Laj stac ech'el jujut'on ta yosilal ti Israele ta sventa jun chib j'al-mantal j'ich'-c'opetic ti xi ta xalique: “Ja' jech ta xich' pasbel xvacaxic ti buch'utic mu sts'acliic ta xchi'inel ta svolel sbaic xchi'uc ti Saule, xchi'uc ti Samuele.” Och jun muc' ta xi'el yu'unic ti jnaclejetique, ti co'ol s'elan jun no'ox vinic bat stsob sbaic xchi'uquique.

⁸C'alal lic xchap svinictac ti Saúl ta Bézeque, stsoboj xa sba oxib ciento mil (300,000) ta vo' israel viniquetic, xchi'uc lajuneb xcha'vinic mil (30,000) ta vo' viniquetic ti liquemic talel ta Judae.

⁹Laj taj une, xi albatic ti j'al-mantal j'ich'-c'opetic ti c'otique: —Albeic ya'i ti jnaclejetic ta Jabese, ta o'lol c'ac'al oc'om, ta jtic' jbatic ta spojelic. Ti j'al-mantal j'ich'-c'opetique bat xchapbeic ya'iic ti jnaclejetic ta Jabese. Xmuyubajic xa liquel,

¹⁰ti xi laj yalbeic ti Nahase: —Ta xcac' jbacutic ta avoc ta ac'ob oc'om yo' jech ta xlic apas ta jtojolcutic ti c'usi lec ta xava'ie.

¹¹Ta yoc'omal un, lic xchapan lec ta oxch'ac svinictac ti Saule. C'alal mu to ta sacube, ochic batel ti bu svoloj sbaic ti yajcontraique. Mu no'ox albajuc lic stsaquic ta milel ti amonitaetic ti jalij o'lol c'ac'ale. Tan puc jatvil batic ti buch'u cuxul to come, ti c'ot ta pasel jujuntic colic ech'ele.

¹²Laj taj une, oy jun chib yu'un ti jteclum ti xi laj yalbeic ti Samuele: —¿Buch'u ya'yel ti laj yalic ti mu xtun ta ajvalilal cu'untic ti Saule? Ac'o talel ta coc ta jc'obcutic ti viniquetic taje yo' jech ta jmilcutic.

¹³Ja'uc ti Saule xi laj spac ti c'ope: —Mi junuc oy buch'u ta xcham ti c'ac'al li'e. Avi li'e, ti Diose laj stic' sba ta spojel ti Israele.

¹⁴Ti Samuele xi laj yalbe ya'i scotolique: —Batic ta Gilgal yo' ta jliquesbetic sc'oplal ta sva'anel ti ajvalile.

¹⁵Ja' yu'un un, scotol ti jteclume laj stam batel sbeic c'alal to Gilgal. Ti ta sba ta sat ti Diose, laj sva'anic ta ajvalilal ti Saúl ti bu taje. Laj taj une, lic yac'beic milbil matanal ti Dios sventa ti lajesobil o'ntonale. Mu no'ox albajuc xmuyubaj ta j'ech'el ti Saule xchi'uc scotol ti israeletique.