Read Tzotzil 1 Samuel 13 Bible Online

1 Samuel 13 - Tzotzil bible

1 Samuel 13

¹Vulem xa xch'ulel ti Saúl ti c'alal lic ochuc ta ajvalilal yu'un ti Israele. C'alal oy xa ox sjayibal jabil yochel ta ajvalilale,

²lic st'uj oxmil (3,000) soldadoetic ta stojol ti israeletique. Cha'mil (2,000) com xchi'uc ta Micmas ta vitstic yu'un ti Betele. Ti jmile (1,000) com xchi'uc ti Jonatán ta Gabaa ti ja' yu'un ti Benjamine. Ja'uc ti c'u yepal come, albatic yu'un ti Saule ti ac'o suticuc batel ta snaique.

³Ti Jonatane laj stsutses ti jvoc' jchabivanej soldado filisteoetic ti oyic ta Gabaae, ti c'ot ta sni' xchiquinic yan filisteoetique. Va'i un, ti Saule laj yal mantal ti ac'o yich' oq'uisanel ti oq'ues ta sjunul ti lume yo' jech ta xcaj t'abbatic ti hebreoetic ti oy c'usi c'ot ta pasele.

⁴Laj ya'iic scotol ti israeletique ti laj xa stsutses jvoc' soldado filisteoetic ti Saule. Jech o xal ti filisteoetique mu lecuc ta sq'uelic ta j'ech'el ti israeletique. Jech ti soldadoetic une bat stsob sbaic ta Gilgal xchi'uc ti Saule.

⁵Ja'uc ti filisteoetic eque laj stsob sbaic yo' ta stsaquic ta leto ti israeletique. Oy yu'unic lajuneb xcha'vinic ta mil (30,000) carreta sventa ti ac'ob-letoe, vacmil (6,000) soldadoetic ti cajajtic ta ca'e, ti mu no'ox albajuc yepal oy yu'unic soldadoetic ti xvoletic batel co'ol s'elan jech c'u cha'al syi'al nab ta xanavic ta yoquique. Laj stam batel sbeic ta stuq'uil Micmas, ti c'ot slaman sbaic ta yeloval sloq'ueb c'ac'al yu'un ti Bet-avene.

⁶Lajem xa laj ya'iic ti israeletic ti c'alal laj yilic ti ta xc'ot ta pasel ti ta stsacatic ta leto yu'un ti filisteoetique, ti bat snac'an sbaic ta nail ch'enetique, ta lom ch'enetic, ta lican ch'entic, ta beo'etic, xchi'uc ta joq'uetic.

⁷Yepalic ta j'ech'el ti ech' xtuch'ic ti uc'um Jordáne, ti c'otic ta yosilal Gad xchi'uc ti ta Galaade. Ja'uc ti Saule com to ta Gilgal ti mu xa x'ech' ta xa'iic xi'el scotol ti yajsoldadotac ti xvoletic batel xchi'uque.

⁸Ti bu taje, vucub c'ac'al laj smala, yu'un ja' jech sjalil albil yu'un ti Samuele. Ti mu ja'uc xc'ot ta Gilgal ti Samuele, ti yacal xa ta sutic ech'el ti viniquetique,

⁹va'i un, ti Saule xi laj yal ti mantale: —Ich'ic talel ti chon bolometic ti ta xich' chiq'uele, ti ta xich' svocol ta milel ta sventa ti lajesobil o'ntonale. Stuc no'ox laj spas sba ta mantal ti laj yac' ti chic'bil matanale.

¹⁰C'alal ta xa xlaj yo'nton ta yaq'uel chic'bil matanal ti Saule, ja' o c'ot ti Samuele. Va'i un, ti Saule loc' batel, bat snup talel ta be yo' ta sc'opon.

¹¹Ja'uc le' une, xi albat yu'un ti Samuele: —¿C'u cha'al ti jech laj apas le' une? Ti Saule xi laj staq'ue: —C'alal laj quil ti yacal xa ta xbatic ti viniquetique, ti mu xavul ti c'usi ora albil sc'oplal avu'une, ti vololic xa xtoc ti filisteoetic ta Micmase,

¹²laj jnop ti ta xyalic talel ta stsaquelun ta leto li' ta Gilgal ti c'alal mu'yuc to jc'ubanoj jba ta stojol ti Diose. Ja' yu'un un, laj jsuj jba jtuc ta yaq'uel ti chic'bil matanal ti jech le'e.

¹³Xi tac'bat yu'un ti Samuele: —¡Toj chuvajot ta j'ech'el ti jech laj apas le'e! Ti lajuc ach'un ti c'u s'elan laj yalbot mantal ti Diose, ta j'ech'el ta sva'anot o ta ajvalilal yu'un ti Israele.

¹⁴Avi tana le' une, mu xajalij ta ajvalilal. Ja'uc ti Dios une ta sa' yan vinic ti bu lec ta xile, ti ta sva'an ta banquilal yu'un ti slumale. Yu'un ti c'u s'elan laj yalbot ti smantale, mu'yuc xach'unbe.

¹⁵Ta jech no'ox yepal, laj stam batel sbe ti loc' batel ta Gilgal ti Samuele. Sts'acliojic batel Saúl ti soldadoetic ti c'u yepal come yo' jech ta stsacvanic ta leto. Loq'uic batel ta Gilgal ti c'otic ta Gabaa ta yosilal ti Benjamine. Ti bu taje, lic xchap c'u yepal ti yajsoldado xchi'uc batele, ti c'ajomal xa no'ox nan vaquibuc ciento (600) ta vo'e.

¹⁶Ti Saule, ti Jonatán ti ja' xnich'one, xchi'uc ti soldadoetic ti xchi'inojic ech'ele, comic ta Gabaa ta yosilal ti Benjamine. Ja'uc ti filisteoetique vololic ta Micmas

¹⁷ac'o mi oxch'ac to loq'uic ech'el ti j'ac'-leto filisteoetic ti bu svoloj sbaique. Ta stuq'uil Orfa, laj stamic batel ti jvoc' ta yosilal ti Suale.

¹⁸Ti xcha'voc'ale laj stam ech'el ta stuq'uil Bet-horón. Ja'uc ti yox-voc'ale laj stamic ech'el ta stuq'uil vitstic ti oy ta yoc stenlejal yu'un Zeboím ti ta xc'ot ta sbajtical banomile.

¹⁹Ta scotol slumal ti Israele, mu'yuc jten-taq'uin. Yu'un laj snopic ti filisteoetique ti mu xmeltsaj yu'unic mi junuc espadae, mi ja'uc junuc lanza ti hebreoetic ti jech taje.

²⁰Yu'un scotol ti israeletic ti c'usi sc'an juxel ta xilique, jech c'u cha'al ti staq'uinal yabtejeb xvacaxique, ti yazaronaique, ti yeq'uelique, mi ja' ti spicoique, ta xbatic ta stojol ti filisteoetique.

²¹Ta stojic vucub gramo yalal taq'uin ti mi ja' ta xaq'uic ta juxel ti staq'uinal yabtejeb xvacaxique, ti yazaronaique. Ja' oxib gramo xchi'uc o'lol, ta stojic mi ja' ta xaq'uic ta juxel ti yeq'uelique, ti sni' staq'uinal yabtejeb xvacaxique.

²²Ja'uc le' une, ti c'u yepal xchi'inojan batel ti Saule xchi'uc ti Jonatane, mi junuc ti oy ti yespadaique, ti slanzaique ti c'alal c'ot sc'ac'alil ti letoe. C'ajomal no'ox chibic ti oy yu'unic

²³ti c'alal ja' o xvoletic talel jvoc' soldado filisteoetic ti tal macvanicuc ta be ta Micmase.