Read Tzotzil 1 Samuel 14 Bible Online

1 Samuel 14 - Tzotzil bible

1 Samuel 14

¹Oy jun c'ac'al, ti Jonatane, xnich'on ti Saule xi laj yalbe ti yajcoltaobbae: —Batic, ech' jtuch'tic jelavel ti uc'ume. Jtsactic ta leto ya'iic ti jvoc' soldado filisteoetic ti oyic le' ta jote. Ti Jonatane, mi ja'uc laj yalbe ya'i stot ti va'i s'elan taje.

²Ja'uc ti stote xi vololic ta jot xocon stenlej jol vits ta yolon jpets granada te' ta yavil ti bu ta xich' majel ti trigoe, ti chi'inbil ta jvoc' soldadoetic ti ja' vaquib ciento (600) ta vo' viniquetique.

³Ti buch'u sbainoj ta yich'el batel ti jayal luchbil saquil c'u'ile, ja' ti Ahías xnich'on ti Ahitobe, sjun-nich'on ti Icabod xnich'on ti Fineese, smom ti Elie, ti ja' yajpale Dios ta Siloe. Mi ja'uc sna'ic ti lum ti loq'uic xa batel ti Jonatane.

⁴Ja'uc ti stuque yac'ojbe ech'el yipal yo' ta xc'ot ti bu vololic ti jvoc' filisteo soldadoetique. Ti bu ta xjelavic ech'ele, oy ta chib muc' ta lican ch'entic ti sbiinoj Bosese xchi'uc ti Senee.

⁵Ti june, oy ta yeloval ta stuq'uil yolon ti yolon xocon sloq'ueb c'ac'al yu'un ti Micmase. Ti june, oy ta yeloval ta stuq'uil yolon ti yac'ol xocon sloq'ueb c'ac'al yu'un ti Gabaae.

⁶Ti Jonatane xi laj yalbe ti yajcoltaobbae: —Sujo aba, jelavcutic ech'el ta jot uc'um c'alal to bu vololic ti xnich'nab pucuje. Stac' nan oy c'usi lec ta spas ti Dios ta jtojoltique. Ti stuque mu ta vocoluc ta spas ta xijc'ot ta jtsalvanej yu'un mi ta yepal, mi ta jutuc no'ox ti jvinictique.

⁷—Paso scotol ti c'usi oy ta ajole. Chapalun xa ta jcoltaot ti c'usi oy ta avo'nton ta xapase —xi laj stac' ti yajcoltaobbae.

⁸Va'i un, ti Jonatane xi laj yalbee: —A'yio ava'i, ta xijelavotic batel le' ta jot ti bu vololic ti viniquetic le'e, ti cac' jbatic ta ilel ta stojolique.

⁹Mi ta xijyalbotic ti jmalatic ti ac'o yalicuc talel ti bu oyotique, comcutic unbi. Mi ja'uc ta xijmuyotic batel ti bu oyique.

¹⁰Yan ti mi ta xijyalbotic ti muycutic ech'ele, muycutic unbi. Ti jech taje, ja' xa svinajeb ti jtsalvanej ta xijc'ot yu'un ti Diose.

¹¹Ja' yu'un un cha'e, xchibalic laj yac' sbaic iluc ta stojol ti filisteoetic ti bu vololique. Ti c'alal jech ilvanic ti stuquique, xi laj yalique: “Q'uelo avilic, syac xa ta xloq'uic talel ti hebreoetic ti bu snac'oj sbaic ta nail ch'ene.”

¹²Ta jech no'ox yepal, xi lic avtaaticuc ti Jonatane xchi'uc ti yajcoltaobbae: —¡Muyanic talel li' ti bu oyuncutique, lo'ilajcutic la xcaltic ava'iic! Va'i un, ti Jonatane xi laj yalbe ti yajcoltaobbae: —Nablan talel ta jtojol, yu'un ti Diose laj xa stic' sba ta stojol ti israeletique yo' ta stsalvanic.

¹³Ti Jonatane stsoyet no'ox muyel ta sa' ti bu ta stec'an ti yoque. Ti bu ta stsac muyel ti yicobe, nabal muyel ec ti yajcoltaobbae. Ti Jonatane naca stacoltaan no'ox yalel ti xch'amoj ta xc'ot ta be ti yajcoltaobba ti ta stsutses o ta j'ech'ele.

¹⁴Ta jliquel no'ox, lajic jtob ta vo' viniquetic ti sliquebal to no'ox tsacvan ta leto ti Jonatán xchi'uc ti yajcoltaobbae.

¹⁵Scotolic ti bu vololique xchi'uc ti loq'uemic batele, bat xch'ulelic ta xi'el. Ti c'u yepal svoloj sbaic ti jvoc' jchabivanej soldadoetique, xchi'uc ti jvoc' ac'-letoetique, xi'ic ec. Ta yorail no'ox, xnicnun liquel ti banomile, ti spajebal xa no'ox ti xi'el c'ot ta pasel ta j'ech'ele.

¹⁶Ti jq'uel-osiletic yu'un ti Saúl ta Gabaa ti oy ta yosilal ti Benjamine, laj yilic ti xc'uletic no'ox ta jatobal ta jujujot ti filisteoetique.

¹⁷Va'i un, ti Saule xi laj yalbe ti yajsoldadotac ti xchi'inoj batele: —Q'uelic quic mi ts'acalotic, mi oy xa buch'u ch'abal cu'untic. C'alal laj sq'uelique, laj yilic ti ch'abal ti Jonatán xchi'uc ti yajcoltaobbae.

¹⁸Ti jech c'ac'al taje, ti xcaxa Diose oy ta stojolic ti israeletique, ti xi laj yal ti Saúl ta stojol ti Ahíase: —Ich'o talel ti xcaxa Diose.

¹⁹Ja'uc le' une, ti c'alal syaquil ta xlo'ilaj xchi'uc pale ti Saule, mu stac' a'yeluc ta xa'iic c'usi ta xc'ot ta pasel bu vololic ti filisteoetique. Va'i un, ti Saule xi laj yalbe ti palee: —Teque' xa, mu xa xavich' talel.

²⁰Ta jech no'ox yepal, ti Saule, ti yajsoldadotaque lic stsob sbaic ti xvoletic no'ox batel ta tsacvanej ta letoe. Mu xa no'ox stac' a'yeluc ta xa'iic ti c'usi ta xc'ot ta stojolique. C'ot ta pasel ti mu xa xojtiquin sbaic ti filisteoetic ti lic stsacan sbaic ta milel stuquique.

²¹Ma'uc no'ox taje, ti hebreoetic ti oy xa sc'ac'alil capalic xchi'uc ti filisteoetique, ti c'otemic ta yajsoldadotaque, jelavic batel ta stojol ti israeletic ti xvoletic ta spat ti Saule xchi'uc ti Jonatane.

²²Ti israeletic ti nac'alic ta vitstic ta yosilal ti Efraine ti laj ya'iic ti jatvilic xa ti filisteoetique, xbitic no'ox batel ta stael ta be ti laj stsaquic ta letoe.

²³C'ot c'alal to Bet-aven ti letovajele. C'ot ta pasel ti laj stic' sba ta spojel israeletic ti Dios jech yorail taje.

²⁴Manchuc mi jech un, ti jech c'ac'al taje, lubtsajemic ta j'ech'el ti israeletique. Mi junuc oy buch'u stic'oj ta ye ti ve'lil ta j'ech'ele, yu'un xi laj yal ti Saúl ta stojol ti jteclume: “Bisbil ta cotol chaval ta xc'ot ti buch'u ta xve' ti c'alal mu to ta xmal ti c'ac'ale, ti mi mu'yuc to tsalbil ta xc'ot cu'un ti cajcontrae.”

²⁵C'otic ta te'tic ti soldadoetique, ti bu mucul ta banomil ti ajapome.

²⁶C'alal ochic batel ta te'tic ti lume, xbein no'ox jech c'u cha'al junuc vo' ti ajapome. Mu junuc oy buch'u laj slec' jutebuc ta scoj xi'elal ti oy c'usi loc' ta alel yu'unique.

²⁷Ja'uc ti Jonatane mu'yuc ya'binoj ti oy c'usi sva'anoj sba ta yalel ti stot ta stojol ti yajsoldadotaque. Laj xul o talel ta snamte' ti oy ta sc'ob ti xpechequil ajapome, laj slo'. Ta jech to yepal xcuxet to batel ti banomil laj ya'ie.

²⁸Va'i un, ti jun ta scotol ti soldado israele, xi albat yu'une: —Ti atote sva'anoj sba ta yalel ta stojol ti yajsoldadotaque, ti mi oy buch'u oy c'usi ta slajes jutebuque, bisbil ta cotol chaval ta xc'ot. Jech o xal ti lume lubtsajemic ta j'ech'el.

²⁹Ti Jonatane xi laj stac'bee: —Ti jtote laj xa sta svocol yu'un ti muc' ta lume. Ti laj jlo' juteb ti ajapome, q'uel avil, xcuxet xa ta xca'i ti banomile.

³⁰X'ech' to, xcuxet ta xa'iic ti lum jechuc ti lajuc slajesic ti c'usi laj spojbeic ti yajcontraique. ¡X'ech' to tsalbil c'ot ti filisteoetic jechuque!

³¹Ti jech c'ac'al taje, ti israeletique laj stsalic ti filisteoetique, ti lic talel ta Micmase, ti c'ot c'alal to Ajalon ti xvoletic no'ox ta letovajele. Ja'uc ti soldado israeletic une lubtsajemic xa.

³²C'ot ta pasel ti vol xiic ech'el ta slajesel ti c'usitic laj spojbeic ti yajcontraique, ti jip xutic ta lum ta sc'ocbel snuc' ti chije, ti me' vacaxetique, xchi'uc ti ch'in vacaxetique, ti cuxul tse xchi'uc xch'ich'el laj sti'ic ti beq'uet scotolique.

³³Ja'uc le' une, oy jlom ti xi bat yalbeic ya'i ti Saule: —Ti lume laj xa sta smulic ta stojol ti Diose, yu'un syaquilic xa cuxul tse ta sti'ic ti beq'uet xchi'uc ti xch'ich'ele. Va'i un, ti Saule xi laj yale: —¡J'ac'vanejoxuc ta milel! Balalinbeicun talel jbejuc muc' ta ton li' to c'alale.

³⁴Ma'uc no'ox taje, c'oponic ti lume ti albeic ya'i ti ac'o yiq'uic talel jujucot stot xvacaxic, mi jujucot xchijic ti jujune, yo' jech ta xamil ati'ic. Mu xasa' amulic ta stojol Dios ta sti'el ti cuxul tseil beq'uet xchi'uc ti xch'ich'ele. Ta yac'ubalil no'ox taje, ta jujun laj yiq'uic batel ti stot xvacaxic ti laj sc'ocbeic snuc' ti bu taje.

³⁵Ja'uc ti Saule lic smeltsan jun altar ta sventa ti Diose, ti sba to velta jech laj spas ti stuque.

³⁶Ts'acal to un, xi lic yal ti Saule: —Ti ac'ubaltic tana li'e, yalcutic ech'el ta snutsel ti filisteoetique, ti quich'ojtic ta sacub ta xchajelic ta sa'elique, ti mu ja'uc junuc cuxul ta xcom cu'untique. Scotol xi laj staq'uique: —Paso ti c'usi lec ta xava'ie. Ja'uc ti palee xi laj yale: —C'alal mu to ta xich' pasel jech taje, ba'yel la' jac'betic ti Diose.

³⁷Va'i un, ti Saule xi lic sjac'be ti Diose: —¿Mi ta xbat jnuts ti filisteoetique? ¿Mi ta xavac'be ta yoc ta sc'ob ti israeletique? Ja'uc le' une, mu'yuc c'usi xtac'bat yu'un Dios ti jech c'ac'al taje.

³⁸Xi lic yal ti Saule: —Acotolic ti jujun banquilaloxuc yu'un ti jujuvoc' soldadoetique, nopajanic talel li'e. Lic t'unic buch'u laj sa' smulic ti c'ac'al li'e.

³⁹¡Jamal ta xcal ta stojol ti Dios ti jpojvanej yu'un ti Israele, ti buch'u jech laj spase, manchuc mi ja' ti jnich'on Jonatane, tsots sc'oplal ac'o chamuc! Mu junuc oy buch'u laj stac' ti ochemic ta soldadoile.

⁴⁰Jech o xal ti Saule xi laj yalbe ya'i scotol ti Israele: —Volo abaic xi ta jot ti vo'oxuque. Li' ta jote, ta jvol jbacutic xchi'uc ti jnich'on Jonatane. —Paso me ti c'usi lec ta xava'ie —xi laj staq'uic ti soldadoetique.

⁴¹Va'i un, ti Saule xi tsots avane: —Ajvalil, Dios yu'un ti Israele, ¿c'u cha'al ti mu'yuc laj atac'be sc'op ti avajtunel ti c'ac'al li'e? Mi vu'un laj jsa' ti mulile, mi ja' ti jnich'on Jonatane, ti c'alal ta xich' q'uelel ti buch'u ta xc'ot ta stojol ti oy smule, vinajuc ta q'uelel ti Urime. Yan mi ja' Israel ti laj sa' ti smule, c'alal ta xich' q'uelel ti buch'u ta xc'ot ta stojol ti oy smule, vinajuc ta q'uelel ti Tumime. Ti yorail ti laj yich' q'uelele, c'ot ta stojol ti Jonatán xchi'uc ti Saule. Mu'yuc smul c'ot ti jteclume.

⁴²Ta jech no'ox yepal xi lic yal ti Saule: —Q'uelic quic buch'u junucal ta xc'ot yorail cu'uncutic xchi'uc ti jnich'on Jonatane. Ti yoraile c'ot ta stojol ti Jonatane.

⁴³Jech o xal un, xi albat ti Jonatán yu'un ti Saule: —Jamal xaval ti c'usi laj apase. Xi jamal laj yal ti Jonatane: —Melel, laj jlo' juteb ajapom ti laj jxul talel ta sni' jnamte' ti quich'oje. Li' xa oyun ti chapalun xa ta xichame.

⁴⁴Xi lic avanuc ti Saule: —¡J'ech'el ta xacham, Jonatán, ac'o mi tsots ta xac'bun quich' jvocol ti Diose!

⁴⁵Ja'uc ti lum une xi laj stac'beic ti Saule: —¿C'u no'ox la xachi ta xcham ti Jonatane ti c'alal cajal xa c'ot sc'oplal yu'un ti Israele? ¡Mu sta o ma' taje! ¡Ta sba ta sat ti jech cuxul ti Diose, mi ja'uc jbejuc stsatsal sjol ta xbaj ta lum! Yu'un ti c'usi laj spas avie, coltabil yu'un ti Diose. Ja' jech c'ot ta pasel yu'unic ti lume ti laj spojic ti Jonatán ti mu'yuc xchame.

⁴⁶Ja'uc ti Saule laj yicta sba ta snutsel ti filisteoetique, sutic ech'el ta slumalic.

⁴⁷Ja' jech c'ot ta pasel ti choti ta ajvalil yu'un Israel ti Saule, ti buyuc no'ox tsal ech'el yu'un ti yajcontrataque, jech c'u cha'al ti Moabe, ti Amone, ti Edome, ti ajvalil yu'un ti Sobae, ti filisteoetique, ti naca stsal no'ox comel ti buyuc no'ox ta x'ech'e.

⁴⁸Lic stsob ti yajsoldadotaque, ti tsalbil c'ot yu'un ti Amaleque, ti c'ot ta pojel yu'un ti israeletic ta yoc ta sc'ob ti epal jmilvanej j'eleq'uetique.

⁴⁹Xi s'elan ma' ti squerem xnich'nab laj yil ti Saule: Ti Jonatane, ti Isvie, xchi'uc ti Malquisúae. Ma' ti chib stsebetique, xi s'elan laj yile: Ti vixile, Merab sbi. Ja'uc ti muquile, Mical sbi.

⁵⁰Sbi yajnil ti Saule, Ahinoam, yantsil nich'on ti Ahimaase. Sbi ti banquilal jpas-mantal yu'un ti yajsoldadotaque, Abner sbi, xnich'on ti Nere, sjuntot ti Saule.

⁵¹Ti Cise, ja' stot ti Saule, ja'uc ti Nere, ja' stot ti Abnere, xnich'nabtac ti Abiele.

⁵²Ti c'u sjalil cuxul ti Saule, tsots laj stsac sbaic ta leto xchi'uc ti filisteoetique. Jech o xal ti Saule laj snaban ta spat ta xocon ti tsatsaquil viniquetic ti c'ot ta yajsoldadotaque.