Read Tzotzil 1 Samuel 15 Bible Online

1 Samuel 15 - Tzotzil bible

1 Samuel 15

¹Oy jun c'ac'al ti xi albat ti Saúl yu'un ti Samuele: —Ti Diose laj stacun talel yo' ta jva'anot ta ajvalilal yu'un ti Israel ti ja' steclumale. Ja' yu'un un cha'e, a'yio lec ava'i ti c'usi ta xalbot ava'i ti Diose.

²Yu'un xi ta xal ti Dios ti scotol xu' yu'une: ‘Ta xcac'be yich' svocolic ti amalecitaetic ta scoj ti laj smac ta be ti israeletic ti mu'yuc xaq'uic ech'uc ti calal loq'uic talel ta Egiptoe.

³Ja' yu'un un cha'e, batan, ba tsaco ta leto. Tsutseso ta j'ech'el scotol ti c'usitic x'ayan yu'unique, ti mu ja'uc jutebuc xc'uxubaj avo'nton yu'une. Milo ta viniquetic, ta antsetic, ta muc'tic ololetic, ta jvoq'uel ololetic, ta vacaxetic, ta chijetic, ta camelloetic, c'alal ta burroetic.’

⁴Ti Saúl une laj sta ta iq'uel ti lume. Lic ta xchapel ta Telaím ti c'u yepal oye. Oy chib ciento mil (200,000) ta vo' j'ac'-leto viniquetic ti ta xanavic ta yoquique. Oy lajunmil (10,000) ta vo' viniquetic ti liquemic talel ta Judae.

⁵Laj taj une, ti Saule laj stam batel sbe c'alal to lum yu'un ti Amaleque, ti chapalic xa ta loc'obinvanej ta sts'el uc'um une.

⁶Va'i un, xi laj yalbe ti quenitaetique: —¡Pojo abaic! ¡Loc'anic ech'el ti jmoj capaloxuc xchi'uc ti amalecitaetique yo' jech mu jmojuc ta jtsutsesoxuc xchi'uquic! ¡Ti vo'oxuque mu'yuc c'usi chopol laj apasbeic ti israeletic ti c'alal loq'uic talel ta Egiptoe! Ti quenitaetique laj xch'ac sbaic loq'uel ta stojol ti amalecitaetique.

⁷Va'i un, ti Saule, ta Havila to, lic sliques stsaquel ta leto ti amalecitaetique, ti c'ot c'alal to ta ochebal yu'un Shur ta sti'il sts'aquil yosil ti Egiptoe, ti tsalbil c'ot yu'une.

⁸Xchucoj ech'el ti Agag ti ajvalil yu'un ti lume. Laj smil ta espada scotol ti jnaclejetic yu'une.

⁹Manchuc mi jech laj spas taj une, ti Saúl xchi'uc ti yajsoldadotaque, mu'yuc laj smilic ti Agage, ti c'upil sba chijetique, ti vacaxetique, ti ch'iom vacaxetic ti lec jubemique, ti chijetique. Mi ja'uc laj slilinic ti c'usitic toyol stojole ac'o mi laj slilinic scotol ti c'usitic mu tsotsuc sc'oplale.

¹⁰Laj taj une, xi c'oponat yu'un Dios ti Samuele:

¹¹—Ta jcha'na' ti laj jva'an ta ajvalilal ti Saule. Mu'yuc ta xc'ot ta pasel yu'un ti c'usi calojbee. Laj xch'ac sba ta jtojol. Mu xa x'ech' ta xa'i ti Samuele, ti sjunul ac'ubal xvocolet ta stojol ti Diose.

¹²Ti ta yoc'omal une, sob xa bat snup ta be ti Saule. Albat ti batem xa ta Carmel ta sva'anel loc'obbail ti bu taje, ti ta sjoy batel ta xc'ot ta loq'uel ta Gilgal ti bu taje.

¹³Va'i un, ti Samuele bat ti bu oy ti Saule, ti xi albat yu'une: —Ac'o sva'an sba ti Dios ta atojolale. Laj xa jpas ti c'usi ta sc'an ti Diose.

¹⁴—¿C'u cha'al ya'yel un cha'e ti xme'lajet ta xca'i ti chije, ti xmu'lajet ti vacaxe? —xi laj stac' ti Samuele.

¹⁵—Laj yiq'uic talel ta slumal ti Amaleque —xi laj stac' ti Saule—. Ja'uc ti lume laj st'ujic ti c'upil sba chijetique, ti c'upil sba vacaxetique yo' jech ta xchic'beic ta smoton ti Ajvalil Dios avu'une. Ja'uc ti jlome, laj jtsutsescutic ta j'ech'el.

¹⁶—¡Ts'ijlan to ca'itic, ta jchapbot ava'i c'usi laj yalbun ti Dios samel ta ac'ubale! —xi laj xtuch' ta be lo'il ti Samuele. —Alo ca'itic un cha'e —xi laj stac' ti Saule.

¹⁷Ti Samuele xi laj yale: —¿Mi mu'yuc xc'ot ta avo'nton ti peq'uel ac'oplale? Manchuc mi jech un, lac'ot ta banquilal yu'un snitilultac ti Israele. Laj sva'anot ta ajvalil ti Dios yu'un ti Israele.

¹⁸Lec un cha'e, ti mi laj stacot ech'el ti Dios ta stsutsesel ta j'ech'el ti jsa'mulil amalecitaetique, ta stsaquel ta leto ja' to ti c'uxi xlaj scotolique,

¹⁹¿c'u cha'al ya'yel un cha'e ti tselbuj avu'un ta xch'unel ti c'usi laj yalbote, ti lic avu'nin ti c'usi laj apojbe ti avajcontra ti c'ajomal no'ox chopol ta xapas ta sba ta sat ti Diose?

²⁰Ti Saule xi laj staq'ue: —Ti c'u s'elan laj yal ti Diose, c'ot ta pasel cu'un. Laj jch'unbe ti xi s'elan laj stacun ta spasele: Jchucoj talel ti Agag ti ajvalil yu'un ti Amaleque. Laj jtsutses ta j'ech'el ti amalecitaetique.

²¹Ja'uc ti soldadoetique, com ta stojolic ti vacaxetique, ti chijetique, ti c'upil sba ta j'ech'el ti ta jeche' no'ox ta xtub sc'oplale. Ja' lec ti c'otuc ta smoton ti Dios avu'un ti ta Gilgale.

²²Va'i un, ti Samuele xi laj yale: “Ja' jun yutsil ta xil ti Dios ti ta xch'unbat ti c'usi ta xale, ja' mu sta sc'oplal ta x'ac'bat ti milbil chic'bil matanale. X'ech' xjelav sc'oplal ti xch'unbate, ti ts'etel lec chiquinal ta xich' a'yibele, peq'uel sc'oplal ta xc'ot ti milbil matanale xchi'uc ti xepu'al chij ti ta xich' ac'bele.

²³Ti toyobbaile, co'ol smulilal xchi'uc ti jt'unvaneje. Ti buch'u ta sbajbeic smantal ti Diose, co'ol xchi'uc ti nijil chimil ta yich'el ta muc' ti c'usi meltsanbil ta c'abale. Ti jech laj abajbe ti smantale, avi tana une, ta stenot loq'uel ti jech ochemot ta ajvalilale.”

²⁴Ti Saule xi laj yalbe ti Samuele: —Melel ava'uc, laj xa jta jmul. Jelav ta jpat ta xocon ti c'usi laj yal ti Diose, ti c'u s'elan laj atojobtasune, yu'un lixi' yu'un ti lume. Laj jch'unbe ti sc'opique.

²⁵Ja'uc le' une, avocoluc, ch'aybun ti jmul jcolo'e. Chi'inun ech'el ta yich'el ta muc' ti Diose.

²⁶—Mi ja'uc xajchi'inot sutel —xi laj stac' ti Samuele—, yu'un laj xa abajbe smantal ti Diose. Avi tana une, ta xasloq'uesot ti jech ochemot ta ajvalilal yu'un ti Israele.

²⁷Ti Samuele joybij yo' ta stam batel ti sbee. Ja'uc ti Saule laj snitbe ti sti'il smochib c'u'e, ti jat loq'uel juteb yu'une.

²⁸Va'i un, ti Samuele xi laj yalbe ti Saule: —Ja' jech ta snitot loq'uel ti Dios ti ochemot ta ajvalilal yu'un ti Israele. Laj xa spojbot ti avabtele yo' ta xac'be jun avinquilel ti xa'ibe lec ti xchiquinale, ti mu sta ti vo'ote.

²⁹Yu'un ti Diose, ja' yutsil slequilalic ti Israele, jbel xc'opoj. Mi ja'uc sna' sutes sba. Mu xco'olaj jech c'u cha'al jeche' vinicuc no'ox ti xlic xcaj no'ox ti c'usi ta snope.

³⁰—Oy xa jmul —xi laj xcha'al ti Saule—. Ja'uc le' une, ta jc'anbot vocol ta sba ta satuc ti moletic yu'un ti Israele, ta sba ta satuc scotol ti jteclume, ti staojuc yav ich'bilucun ta muc' avu'un ti jech ajvalilune. Ja' yu'un un cha'e, sutan talel yo' chba quich' ta muc' ti Ajvalil ti ja' Dios avu'une.

³¹Va'i un, ti Samuele sut talel xchi'uc ti Saule. Lic yich' ta muc' Dios ti stuque.

³²Laj taj une, xi laj yal ti Samuele: —Ic'bun talel ta jtojol ti Agage, ajvalil yu'un ti lum Amaleque. Ti Agage mu'yuc xa xi'el ta xa'i tal ta stojol ti Samuele, ti snopoj xa van ti ech' xa sc'oplal ti svocol ta xlaje.

³³Ja'uc le' une, xi albat yu'un ti Samuele: —Ep antsetic ch'abal yalabic com avu'un xchi'uc ti avespada le'e. Ja' jech ta xc'ot ta stojol ti ame' jech c'u cha'al laj apasbe ti antsetique. Nax to ti Samuele, lic sbic'tal bojilan ta sba ta sat Dios ti ta Gilgale.

³⁴Ts'acal to un, sut batel ta Ramá. Ja'uc ti Saule sut batel ta sna ti oy ta Gabaae.

³⁵Ti Samuele ta j'ech'el mu xa bu laj yilbe sat ti Saule, ac'o mi ep laj svul yo'nton yu'un ti jbel laj yal ti Dios ti ma'uc xa ajvalil yu'un Israel ti Saule.