Read Tzotzil 1 Samuel 26 Bible Online

1 Samuel 26 - Tzotzil bible

1 Samuel 26

¹Ti jnaclejetic ta Zife xi bat yalbeic ya'i ti c'alal bat sc'oponic ti Saúl ti oy ta Gabaae: “Ti Davide snac'oj sba ta stsel-tselul vits yu'un Haquila ta yeloval sbajtical banomil.”

²Va'i un, ti Saule laj stam batel sbe ti chi'inbil batel yu'un oxmil (3,000) ta vo' soldado Israel ti buch'u ech'em xtojobique, ti bat ta sbajtical banomil yu'un Zif ta sa'el ti Davide.

³C'ot slaman sbaic ta vitstic yu'un Haquila ta nopol ti' be ta yeloval sbajtical banomil. Ti jech oy ta sbajtical banomil ti Davide, laj yil ti tijlibil batel yu'un ti Saúl c'alal to bu taje.

⁴Va'i un, laj stac batel jpa'ivanejetic yo' jech ta sna' ti bu to c'alal ta xc'ot ti Saule.

⁵Laj taj une, bat ti bu lamalic ti Saule. Laj stuc'ulan lec bu ta xvay ti Saule xchi'uc ti Abnere, xnich'on ti Nere, banquilal jpas-mantal yu'un yajsoldadotac ti Saule. Ja'uc le' une, lec joyobtabil ta o'lol yu'un svinictac ta xvay ti bu lamalique.

⁶Va'i un, ti Davide xi laj sjac'be ti Ahimeleque, ja' ti hititae, xchi'uc ti Abisaie, xnich'on ti Sarviae, xchi'uc ti xchi'il ta voq'uel ti Joabe: —¿Buch'u chapal ta xischi'inun batel yo' ta xic'ot ti bu lamalic ti Saule? —Vu'un ta jchi'inot yalel —xi laj stac' ti Abisaie.

⁷Ta ac'ubaltic taje, ti Davide xchi'uc ti Abisaie yalic batel ti bu lamalique. Ta yutil to ta xvay ti Saúl ti bu lamalique, ti quiquil ta lum yu'un ta sjolinab ti slanzae. Ti Abnere xchi'uc ti yajsoldadotaque puch'ul joyolic ta spat xocon.

⁸Va'i un, ti Abisaie xi laj yalbe ti Davide: —Ti Diose laj yac'bot ta avoc ta ac'ob ti avajcontrae. Ch'an to chan ca'itic xba jmil ya'i le'e. Ta slanza no'ox stuc ti pac'al ta xcom ta banomil cu'une, ti toj batel o ta jmoj no'oxe.

⁹Ja'uc le'e, xi tac'bat yu'un ti Davide: —Mu xamil, yu'un ta x'ac'bat stoj ti buch'u ta smil ti ajvalil ti ja' t'ujbil yu'un ti Diose.

¹⁰Ta jva'an jba ta rextico ta yalel ti ja' ta xtuch'bat xcuxlejal yu'un ti Dios ti c'alal ta sta yorail ta xchame, mi ja' o ta xcham ti c'alal ochem ta letovajele.

¹¹Ma'uc to calbe Dios ma' le' une ti ta jnop ta jmil ti ajvalil ti t'ujbil yu'une. Batic, jtamtic ech'el ti slanza ti oy ta sjolinabe, xchi'uc ti sjarrual vo'e.

¹²Ja' jech c'ot ta pasel ti laj stam ech'el David ti lanzae, ti jarru ti oy ta sjolinab ti Saule, loq'uic ech'el. Mu'yuc buch'u ilatic yu'un. Mu'yuc buch'u a'yiatic yu'un. Mi junuc oy buch'u julav, ja' ti j'ech'el ochesbat svayelic yu'un ti Diose.

¹³Laj taj une, jelav ech'el ta jot stenlej ti Davide. Laj sva'an sba ta toyol jol vits ti xi snatil xil sbaique. Nat liquil ta j'ech'el ta jujujot ti bu oyique.

¹⁴Va'i un, ti Davide xi tsots laj yavta ech'el ti Abnere xchi'uc ti soldadoetique: —¡Tac'avan, Abner! Ti Abnere xi laj staq'ue: —¿Buch'uot yo' ta xavavta ti ajvalile?

¹⁵Ti Davide xi laj yalbe ya'ie: —¿Mi mu vo'otuc jun vinic ti mu'yuc buch'u xco'olaj xchi'uc ta Israele? ¿C'u cha'al ya'yel un cha'e ti mu'yuc xatuc'ulan lec ta xchabiel ti ajvalil avu'un ti ja' ajvalile? Oy jun ta scotol ti jteclume och batel ti oy ox ta yo'nton ta smile.

¹⁶Mu'yuc stuq'uil ta j'ech'el ti c'usi laj apase. Jamal xcal ava'i, ta jva'an ta rextico ti Diose ti ja' xatunic o ti ac'o avich'ic milele. Mu'yuc bu laj atuc'ulanic ta xchabiel ti avajvalic ti t'ujbil yu'un ti Diose. ¡Sa'bo slanza ti ajvalile xchi'uc ti sjarrual vo' ti oy to ox ta sjolinabe! ¡Jq'ueltic quic mi xata ta sa'el!

¹⁷Xi avan ti Saúl ti c'alal laj yojtiquinbe sc'opojel ti Davide: —¡Vo'ot ca jnich'on David ti buch'u ta x'avtavane! Ti Davide xi laj staq'ue: —Ja' jech, Jcuch Abtel, vu'unun.

¹⁸Ja'uc le' une, Jcuch Abtel, ¿c'u cha'al ya'yel ochemot ta snutsel ti avajtunel li'e? ¿C'usi laj jpas? ¿C'usi ti jmul jtaoj ta atojole?

¹⁹Ta xajc'anbe vocol, Jcuch Abtel, ti a'yibo sc'op ti avajtunel li'e. Ti mi ja' ta xac'bot ana' ti Dios ti jech contra ta xiyil ti Jcuch Abtele, xu' to nan ta xich' ta muc' ti matanal ti ta xavac'bee. Ti mi ja' no'ox ta snop stuc ti vinique, bisatuc ta cotol chaval yu'un ti Diose. Avi tanae, laj ajipicun xa loq'uel ta sbanomil ti Diose yo' jech sujbil ta xibat ta snijanel xchimanel jba ta yich'el ta muc' ti yan diosetic une.

²⁰Ja'uc le' une, mu jc'an ti nom ta stojol Dios xba maluc ti jch'ich'ele. ¡Ti Jcuch Abtele xbitet ta sa'el jcot bitom no'ox, ti snutsoj ta vitstic ta sa'el jcot ube!

²¹Va'i un, xi laj stac' ti Saule: —¡Nich'on David, ta xca'i jba ti oy ti jmule! ¡Mu pochanun toyobba xca'i jba, ti mu albajuc xchopolal ta j'ech'el ti c'usi ta jpase! Ja'uc le' une, sutan ech'el. Mi ja'uc xa ta xquilbot ti avocole. Ti c'ac'al avie, laj avac' ta ilel ti mu'yuc ta avo'nton ta xamilune.

²²Xi laj stac' ti Davide: —Li' quich'oj ti alanzae, Jcuch abtel. Taco talel junuc amosov ta stamel ech'el.

²³Ti c'u s'elan ti slequile, ti yutsil ta spas ti jujune, ac'o tojbatuc yu'un ti Diose. Avie, ti Diose laj yac'bun ta coc ta jc'ob ti Jcuch Abtele, mu jc'an jyales coc jc'ob ta stojol ti ajvalil ti ja' t'ujbil yu'une.

²⁴Jech c'u cha'al mu'yuc laj jmil ti Jcuch Abtele, ja' jech ta jc'an ti ac'o xispasbun ti Dios ec une, ti pojbil coltabil ta xic'ot yu'un ti ilbajinel ti mu xnel ta xca'ie

²⁵Xi lic tsots avanuc ti Saule: —Lequil c'optabilucot, jnich'on David. Muc'tic no'ox ti avabtel ti c'usitic ta xlic apase, ti lec ta xc'ot ta loq'uel avu'un scotole. Laj taj une, ti Saule sut ech'el ta sna. Ja'uc ti Davide laj stam batel sbe.