Read Tzotzil 1 Samuel 28 Bible Online

1 Samuel 28 - Tzotzil bible

1 Samuel 28

¹Ti jech yorail ech'el taje, laj stsob yajsoldadotac ti filisteoetique yo' ta svolic ta scontrainel ti Israele. Ti Aquise xi laj yalbe ti Davide: —Ti vo'ot xchi'uc ti avinictaque, ta xijbat ta paxyal.

²Xi laj stac' ti Davide: —Lec oy, batic. Ja' to jech xana' tana, Jcuch Abtel, ti ta xavil ta aba asat ti c'usi lec xtojob ta spasel ti avajmosov li'e. —Ti jech taje, ta jva'anot ta cajchabivanej —xi laj stac'be David ti Aquise.

³Ja'uc ti c'alal jech c'ot ta pasel taje, chamem xa ox ti Samuele. Scotol ti israeletique laj yoq'uitaic ti chame. Mucbil xa com yu'unic ta Ramá ta slumal stuc. Ti Saule laj xa ox snutsan loq'uel ta jteclum ti buch'utic sna' xt'unvane, xchi'uc ti buch'utic sna' xic'beic talel xch'ulel ti animaetique.

⁴C'alal laj svol sbaic ta tsoblej ti filisteoetique, bat slaman sbaic ta volej ta Sunem. Ja'uc ti Saule laj stsob scotol ti Israele, bat xchapan sbaic ta volej ta Gilboa.

⁵Ja'uc ti c'alal laj yil ti vololic ti filisteoetique, lic tsic'uc yo'nton. Mu xa x'ech' ta xa'i ti xi'el ta j'ech'ele.

⁶Va'i un, lic sjac'be Dios ti c'usi xu' ta spase. C'u stu un, mu'yuc c'usi xtac'bat yu'un ti Diose, mi ja'uc ta vaichil, mi ja'uc ta sventa ti Urime, mi ja'uc ta sventa ti j'alc'opetique.

⁷Jech o xal xi laj yalbe ti yaj'opisialtaque: —Sa'ic mi oy bu xataic junuc ants ti sna' xic'be talel xch'ulel ti animae yo' jech ta jac' jba. Xi tac'bat yu'un ti yaj'opisialtaque: —Oy jun ants ta jteclum Endor ti ca'binojcutic sc'oplal ti sna' xic'be talel xch'ulel ti animae.

⁸Laj sjelta sba ti Saule. Laj slap yan o sc'u'. Xchi'inoj batel cha'vo' svinic ti bat ta ac'ubaltic ta svu'lanel ti antse, ti xi c'ot yalbel ya'ie: —Avocoluc, ch'ul abolajan, q'uelbun corail, ic'bun talel xch'ulel ti buch'u xi ta xcalbot ava'i ti sc'oplale.

⁹Xi laj stac' ti antse: —Xana' lec, ti buch'utic sna' xt'unvane, ti buch'utic sna' xic'beic talel xch'ulel ti animaetique, tenatic xa loq'uel ta jteclum yu'un ti Saule. ¿C'u cha'al xtal atic'un ta jun c'op, ti xu' xcac' o ti jol jbaquil yu'une?

¹⁰Ja'uc ti Saule xi laj yal ti laj sva'an ta rextico ti Diose: —Xil Dios ti mu jechuc ta xc'ot ta atojol taje.

¹¹—¿Buch'u ma' avaloj ta xquic'be talel ti xch'ulel une? —xi laj sjac' ti antse. —Ic'bun talel xch'ulel ti Samuele —xi laj stac' ti Saule.

¹²Ta jech to yepal, ti antse laj yilbe xch'ulel ti Samuele. Tsots avan, ti xi laj yalbe ya'i ti Saúl ta jech yepale: —¿C'u cha'al ya'yel ti laj alo'laune? ¡Saulot ca!

¹³Ja'uc le'e, xi tac'bat yu'un ti ajvalile: —Mu xaxi'. ¿C'usi laj avil? —Ta xquil jun ch'ulelal ti ta xmuy talel ta banomile —xi laj stac' ti antse.

¹⁴—¿C'u s'elan yilel? —xi laj sjac' ti Saule. —Mol vinic xa, xmochinoj jlic xmochib c'u' —xi laj stac' ti antse. Ti Saule laj sna' ta ora ti ja' Samuele. Snupilan xa banomil laj spatan sba ta lumtic.

¹⁵Va'i un, xi albat yu'un ti Samuele: —¿C'u cha'al ta xavilbajinun ti laj ataun talel ta iq'uele? Xi laj stac' ti Saule: —Mu xa stac' a'yeluc ta xca'i c'usi xu' ta jpas. Vololic ta scontrainelun ti filisteoetique. Laj xa sjipun stenun comel ti Diose. Mu'yuc xa ta stac'bun, mi ja'uc ta vaichil, mi ja'uc ta sventa ti j'alc'opetique. Jech o xal laj jtaot talel ta iq'uel yo' ta xavalbun ca'i c'usi stac' ta jpas.

¹⁶Xi tac'bat yu'un ti Samuele: —¿C'u cha'al ta xajac'bun ti c'alal laj xa stenot comel ti Diose, ti joybij xa ta avajcontrae?

¹⁷Ja' jech laj spas ti Dios ta atojol jech c'u cha'al yalojbot ava'i ti laj calbot ava'ie. Laj xa stenot loq'uel ta pas mantal, ja' xa laj stic' ochel ta pas mantal ti avinquilel Davide.

¹⁸Yu'un ti vo'ote mu'yuc xach'unbe smantal ti Diose. Mi ja'uc laj ach'unbe ti laj yalbot ti ac'o atubbe sc'oplal ti amalecitaetique. Jech o xal avi tana li' une, c'ot xa ta spasel yu'un ti Dios ta atojole.

¹⁹Ma'uc no'ox taje, ti vo'ote xchi'uc ti israeletique ta xa'ochic ta yoc ta sc'ob ti filisteoetic yu'un ti Diose. Ti oc'ome, ti vo'ote xchi'uc ti anich'nabe ta xtal achi'inicun. Ja' jech xtoc ta xc'ot ta pasel yu'un ti Diose, ti bu vololic ti israeletique ta x'och ta sc'obic ti filisteoetique.

²⁰Ta jech to yepal, yal ta lum ti Saule, ti jal telel come. Xi' ta j'ech'el yu'un sc'op ti Samuele, ti tub yic' yu'une. Ja' o to la xtoc, mu'yuc ve'em sjunul c'ac'al, sjunul ac'ubal.

²¹C'alal laj yil ti ants ti jeche' xa telel ti Saule, xi laj yalbe ti nopaj ech'el ta stojole: —Ti me' jtunel avu'un li'e, laj xa xcuch svocol ta spasel ti c'usi laj ac'anbee. Ac'o mi chapal jc'oplal xcac' o ti jol baquil xchi'uque, laj xa jch'unbot ti amantale.

²²Avi tana li' ec une, ch'unbun ti xi ta jc'anbot vocol ta atojole: Ta xcac'bot jutebuc avuni ve'el yo' jech ta x'ayan avip ti ta xatam ech'el abee —xi.

²³Ja'uc ti Saule mu'yuc xa ta yo'nton ti ve'ele. Va'i un, ti yaj'opisialetique xchi'uc ti antse, sujvanic ta j'ech'el. Jech laj xch'un ti Saule. Ta jech yepal laj stam sba liquel ti puch'ul ta banomile, choti ta ti' tem.

²⁴Ja'uc ti ants une lic smil jcot jubem ch'in vacax ti ta snae. Lic svots' ninal harina yo' jech ta spas pimiquil pan ti mu'yuc ac'bil spajubtasobile.

²⁵Laj taj une, laj yich' batel ta stojol ti Saule xchi'uc ti yaj'opisialtaque. Jech ti stuquic ti c'alal laj yo'ntonic ta ve'ele, laj yalbeic comel chabanuc ti antse, stam batel sbeic ta yac'ubalil no'ox.