Read Tzotzil 1 Samuel 4 Bible Online

1 Samuel 4 - Tzotzil bible

1 Samuel 4

¹Laj taj une, ti Samuele lic xchapbe ya'i scotol ti Israele. Ti jech yorail ta vo'ne taje, ti filisteoetique laj stsob sbaic yo' ta xbat stsaquic ta leto ti israeletique. Loq'uic batel ec ti israeletic ta stsaquel ta leto ti filisteoetic ti c'ot svol sbaic ta sts'el Eben-ézere. Ja'uc ti filisteoetique bat svol sbaic ta Afec

²ti xc'uletic no'ox batel ta stsaquel ta leto ti israeletique. C'alal xc'anobaj no'ox liquel ti leto yu'unique, tsalbil c'otic ti israeletic yu'un ti filisteoetique. Lajic ta milel chanmil (4,000) ta vo' viniquetic ti c'alal xyaquet ti letoe.

³C'alal sutic batel ti j'ac'-leto israeletic ti bu svoloj sbaique, xi laj yalic ti moletic yu'un ti Israele: “¿C'u cha'al laj yac' ye sti' ti Dios ti jech tsalbil lijc'ot yu'un ti filisteoetic avie? ¡Ba quich'tic talel ta Silo xcaxail strate ti Diose yo' jech poybil ta xbat ta o'lol cu'untic, ti mu tsalbiluc ta xijc'ot yu'un ti cajcontratique!”

⁴Ja' yu'un un, ti israeletique laj staquic batel jvoc' viniquetic ta Silo yo' jech ta xich'ic talel xcaxail strate ti Dios ti scotol xu' yu'une, ti ta spas mantal ta o'lol ti bu va'al chib sloc'obbail ti c'usi oy xiq'uique. Jech ti Ofnie xchi'uc ti Fineese, ti xchibal xnich'nab ti Elie, jmoj batic xchi'uc xcaxail strato ti Diose.

⁵C'alal c'ot xcaxail strate Dios ti bu tsobolique, c'ot ta pasel yu'un ti israeletique ti xnic no'ox banomil yu'unic ta muyubajel ti lic avanicuque.

⁶Xi laj yalic ti filisteoetic ti c'alal laj ya'iic ti yan no'ox sba x'avlajetique: “¿C'u cha'al ti mu no'ox albajuc xvochetic ti bu tsobolic ti hebreoetique?” Ja'uc ti c'alal laj ya'iic ti vul xa xcaxail strate ti Dios ti bu tsobolique,

⁷lic ochuc xi'el ta yo'ntonic ti xi laj yalique: “¡Vul xa diosetic ti bu vololique! ¡Mu xa no'ox cha'belucotic un! ¡Yu'un mu'yuc xquiltic o ti jech xc'ot ta pasel avi tana une!

⁸¡Teque' no'ox xch'a un! ¿Buch'u xa ta xispojotic mi lij'och ta yoc ta sc'ob ti diosetic ti scotol xu' yu'un taje? ¡Yu'un ja' ono'ox laj stsutses ti egipcioetic ti c'alal c'ot ta stojolic ti ep ta tos vocol ta sbajtical banomile!

⁹¡Tsatsajanic, pojo abaic, soldado filisteoetic. Vinicuc xava'i abaic ta tsacvanej ta letoe yo' jech mu xa'ochic ta mosovil yu'un ti hebreoetic jech c'u cha'al ti oy bu och ta mosovil avu'unique!”

¹⁰Va'i un, ti filisteoetique lic tsacvanicuc ta leto, ti tsalatic ti israeletique, ti jatvil batic c'alal to ti bu slamlebic ta voleje. Mu no'ox albajuc ti milbail c'ot ta pasel yu'unique. Lajic ta milel lajuneb xcha'vinic ta mil (30,000) j'ac'-leto israel viniquetic ti ta yoc ta xanavique.

¹¹Ja' jech xtoc och ta yoc ta sc'obic xcaxa ti Diose, xchi'uc laj smilic ti Ofnie, ti Fineese, ti xchibal xnich'nab ti Elie.

¹²Ja'uc le' une, oy to jun soldado snitilul ti Benjamine, ti cuch to yu'un loq'uel jatobal ti bu yacalic ta ac'-letoe, ti ta yorail no'ox xbitet xa c'otel ta anil ta Siloe, ti jatantic xa ti sc'u'e, ti balom ach'el ti sjole.

¹³Ti c'alal c'ote, chotol ta muc' ta chotlebal ti Elie ta nopol xocon ti'na ti yac'oj batel sat ta bee, ti oy xa ta vul o'nton xchi'uc ti xcaxa Diose. Ti vinic taje och batel ta jteclum ti laj xchap ti ya'yeje. Ta jech no'ox yepal ti jnaclejetique x'avlajetic xa liquel.

¹⁴C'alal laj ya'i ti Elí ti x'avlajetic xae, xi laj sjaq'ue: —¿C'usi c'ot ta pasel ti va'i s'elan xvochetic xa ta avlajetele? Ti vinic taje bat ta anil ta xchapbel ya'i Elí ti c'usi c'ot ta pasele.

¹⁵Yu'un ti Elie yich'oj xa vaxaclajuneb yo'vinic (98) jabil, ti j'ech'el maquem xa ti sate.

¹⁶Xi laj yalbee: —Naca to livul ti lilic talel ti bu xyaquet ti letoe. Avie, cuch to cu'un talel ti jatobal ti bu xyaquet ti letoe. —¿C'usi c'ot ta pasel un, nich'on? —xi laj sjac' ti Elie.

¹⁷—Jatavic ti israeletic yu'un ti filisteoetique —xi laj stac' ti buch'u yich'oj talel ti lo'ile—. Ma'uc no'ox taje, mu no'ox albajuc ta smilanic ti jnaclejetique. Capal chamic ec ti cha'vo' anich'nabe, ti Ofnie xchi'uc ti Fineese. Och ta yoc sc'obic filisteoetic xcaxa ti Diose.

¹⁸C'alal laj yalbe sc'oplal xcaxa Dios ti buch'u yich'oj talel ti lo'ile, toj jvalc'ujel batel ta svalopat ti Elí ti chotol ta muc' ta chotlebal ta xocon ti'nae. Ti jech mol xae, ti aluneb xa ti sbec'tale, toj c'asel c'ot snuc' cham. Cha'vinic (40) jabil sjalil laj sva'an sba ta spojel ti Israele.

¹⁹Ja'uc ti yalibe, yajnil ti Fineese, ti noj xa xch'ut yu'un ti yole, ti jutuc sc'an xc'ot yorail ta xvoq'ue, sjisluj liquel xc'uxul ti c'alal laj ya'ibe sc'oplal ti och xa ta c'abal xcaxa ti Diose, xchi'uc ti cham xa ti smu'alibe xchi'uc ti smalale. Xbalet xa liquel xchi'uc xc'uxul ti xch'ute, laj svoq'ues ti yole.

²⁰C'alal laj yilic ti jq'uelvanejetic ti ta xa xcham ti antse, xi laj yalbeique: “Ac'bo xa yipal, yu'un ta xavilbe sat jun aquerem.” Ja'uc ti stuque mu'yuc stac', ja' ti ma'uc xa ta yo'ntone.

²¹Icabod laj yac'be sbiin ti olole, yu'un xi laj yale: “Laj to sc'oplal ma' ti oy to yutsilal slequilal ti israeletique, yu'un och xa ta c'abal xcaxa ti Diose, ti cham laj ti smu'alibe xchi'uc ti cham ti smalal ta scoje.”

²²Jech o xal laj yal ti laj to sc'oplal ma' ti oy to yutsilal slequilal ti Israele, ja' ti ochem xa ta c'abal xcaxa ti Diose.