Read Tzotzil 1 Samuel 5 Bible Online

1 Samuel 5 - Tzotzil bible

1 Samuel 5

¹C'alal ochem xa ta c'abal xcaxa Dios ta Eben-ézere, ti filisteoetique laj yich'ic batel c'alal to ta Asdod.

²Va'i un, laj xchechic batel, bat stiq'uic ta xch'ulna ti dios Dagone. Laj sbejanic ta sts'el ti bu va'al ti diose.

³Ti jnaclejetic ta Asdode, ti c'alal c'otic ta yoc'omale, ja' to laj yilic ti telel xa ta banomil ti dios Dagón ta sts'el xcaxa ti Diose. Va'i un, laj stoyic liquel ti Dagone, bat sva'anic comel ti bu no'ox sva'lebe.

⁴C'alal c'otic yan velta ti jnaclejetic ta Asdod ta yoc'omale, ja' to laj yilic xtoc ti telel xa ta banomil ti Dagón ta sts'el xcaxa Dios laj staique. Nom xa bejel ti sjole. C'asem xa ti xchibal sc'ob javal ta lumtique. Ja' xa no'ox lec com jc'os ti xch'ut ta yavil ti bu va'al to oxe.

⁵Jech o xal ta Asdod avi tana le'e, c'alal ta x'ochic batel ta xch'ulna ti yajpaletac ti Dagone, mu ta x'ech' steq'uic bu ti sva'lebe.

⁶Ts'acal to un, tsots lic ac'baticuc svocolic yu'un ti Diose. Mu no'ox albajuc ta x'ac'batic xi'el ti jnaclejetic yu'un ti Asdod xchi'uc ti steclumale, ja' ti lic tsacaticuc ta chacale.

⁷Xi laj yalic ti c'alal laj yilic ti va'i s'elan c'ot ta stojolic ti jnaclejetic ta Asdode: “Ti xcaxa Dios yu'un ti Israele, altic ti li' ta xcom ta jtojoltique. Yu'un ja' ti Dios taje ta xiyac'botic tsots vocol ti jmoj ta xquich'tic xchi'uc ti Dagón ti ja' dios cu'untique.”

⁸Ja' yu'un un, laj staquic batel mantal ta stojol ti banquilaletic yu'un ti filisteoetic ti ta stsob sbaic xchi'uquique, ti xi ta sjac'beique: —¿C'usi ta xcutic ti xcaxa Dios yu'un ti Israele? —Ba aq'uic ta jteclum Gat —xi laj yalic. Ti filisteoetique bat yaq'uic ti bu taje.

⁹Ta ts'acal to un, ti c'alal bat xa yaq'uique, mu no'ox albajuc lic yac' xi'el ti Dios ta jteclume. C'alal ta biq'uit ta muc', tsacatic ta chacal ti jnaclejetic taje.

¹⁰Va'i un, ti filisteoetic une laj yaq'uic batel ta Ecrón ti xcaxa Diose. Ja'uc c'alal c'ot ti caxa une, ti jnaclejetic ta Ecrone xi x'avlajetic xa liquele: “¡Ti lijtacbat talel ti xcaxa Dios yu'un ti Israel li'e, ja' xa jmileltic jcotoltic!”

¹¹Ti jech tanijem xa batel ta scotol jteclum ti chamel ti xi'bal sba ta scoj ti tsots vocol ta x'ac'batic yu'un ti Diose, xi laj yalic ta stojol ti c'alal laj staic ta iq'uel ti banquilaletic yu'un ti filisteoetique: “Chechic loq'uel ti xcaxa Dios yu'un ti Israel ti li' oye. Ba sutesic ta yavil ti bu ono'ox oye yo' jech mu xismilotic jcotoltic.”

¹²Yu'un c'alal to vinajel ta xc'ot ti x'avlajet no'ox ti jnaclejetic ti ta jteclume. Yu'un ti buch'utic mu'yuc ta xchamique, noj ta chacal ti sbec'talique.