Read Uab Meto KEJADIAN 1 Bible Online

KEJADIAN 1 - Uab Meto bible

KEJADIAN 1

¹Anbi un-unun, fe Uisneno anfatan ma anmepu neno tunan ma pah pinan nok in nesan,

²pah pinan fe ka mahuma fa ma ka mamasa fa, ma ka maloitan ma ka mabalab fa. Tasi naek le an oki ma anpes, es ankub ma tobe nan ale sa'-sa', ma nahenu nok mes'okan mes alkun smanaf Uisneno es na'oin-oin son anbi oe in fafon.

³Uisneno namolok nak, “Anmu'i meosine nai!” Oke te meusine anbol esan.

⁴Uisneno anmalin leka In nit lasi nane. Oke te In anbeti meosine nane na'ko mes'okan,

⁵ma In nakanab meusine nane “Manas” ma mes'okan nane “Fai”. Fai ankon ma nok-noka anbol. Le nane neno ahunut.

⁶Nalali te Uisneno namolok nak, “Kubat mese anhake nai he nati' anbeti oe nane anfani nua, ma an eka anfani bale nua le anbaitsok.” Oke te lasi nane anbol onan. Uisneno anmo'e kubat nane le anbati oe le anbi kubat in nupun na'ko oe le anbati in fafon.

⁸In nakanab kubat le nane nak “Neno tnanan”. Fai ankon ma nok-noka anbol. Le nane neno nua.

⁹Nalali te Uisneno namolok nak, “So' oe le anbi neno in nupun nane ansai ma nabua anbi bale mese, talantia atkiso tit nain.” Oke te lasi nane anbol onan.

¹⁰Uisneno nakanab nain nane “Pah meto”, ma oe le In nabua nane In nakanab “Oe tasi”. Ma Uisneno In nekan anmalin leka In nit lasi nane.

¹¹Uisneno namolok anteni nak, “So nain nane napoitan ale luet, esle' masaf le napoitan fini ma masaf le napoitan fuan.” Oke te lasi nane anbol onan.

¹²Onle nane nain napoitan ale luet. Ma Uisneno In nekan anmalin leka In ankiso nit lasi nane.

¹³Mes'okan ankon ma nok-noka anbol. Nane neno tenu.

¹⁴Nalali te Uisneno namolok nak, “So anmu'i sa'-sa' apinat anbi neno tnanan he nati' antana pah pinan, he nati' anbatis manas ma fai, he nati' naton ma anfatan neno, ton, ma neno naek neu to ma nonot afnekat ma apalsait.” Ma lasi nane anbol onane.

¹⁶Uisneno anmo'e atana anaek nua, esle' manas he nati' ankuas ne-neno, ma funan he nati' ankuas fa-fai, ma nessi na'ko nane In anmo'e afkun-afkun amsa.

¹⁷Uisneno antao atana-atana nane anbi neno tnanan he nati' antana pah pinan,

¹⁸ma ankuas manas ma fai, ma an eka meusine ma mes'okan. Ma Uisneno In nekan anmalin leka In ankiso nit lasi nane.

¹⁹Fai ankon ma nok-noka anbol. Le nane neno ha.

²⁰Nalali te Uisneno namolok nak, “So anmu'i ale mu'it masnasa le nane'o anbi oe in nanan, ma ale kolo at'eles abit neno tnanan.”

²¹Es nane to Uisneno anmo'e mu'it-mu'it anaek anbi tasi, ma ale mu'it masnasa le anmoni anbi oe in nanan, ma ale kolo. Ma Uisneno In nekan anmalin leka In ankiso nit lasi nane.

²²Uisneno anfe tetus neu sin oke ma In anfe plenat neu ale mu'it masnasa le anmoni anbi oe in nanan he nati' anpe' ma namfau ma nahenu oe tasi, ma neu ale kolo-kolo he nati' ansato ma namfau piut.

²³Fai ankon ma nok-noka anbol. Le nane neno nima.

²⁴Nalali te Uisneno namolok nak, “So pah pinan napoitan ale mu'it fui ma aem anaet ma abaut.” Oke te lasi nane anbol onan.

²⁵Uisneno In anmo'e sin onane ma In nekan anmalin leka In ankiso nit lasi nane.

²⁶Nalali te Uisneno namolok nak, “Tabu le i Hit of atmo'e mansian le of anfani ma namas on Hit amsa. Sin of ankuas ale ika, ale kolo, ma ale mu'it bian, leka he fui ai he aem, ai leko he anaet ai he a'baut.”

²⁷Uisneno anmo'e mansian onane, ma In anmepu sin onle In aon anmes kun. In anmo'e sin atoni ma bife.

²⁸Nalali te In anfe nanin sin tetus nok molok nak, “Misuf ma mimfau nai he nati' hi sufam ma hi ka'um nane natua ma ankuah pah pinan anfunam natef. Au fe neu ki sutais he nati' ampinote ale ika, ale kolo, ma ale mu'i fui.

²⁹Au fe ani neu ko ale luet, esle' ale masaf le napoitan fini ma ale masaf le napoitan fuan anfani on ho mnahat.

³⁰Mes neu ale kolo ma mu'it fui bian, Au fe ani hun ma hau in non anfani sin amnahat.” Ma lasi nane anbol onane.

³¹Uisneno ankiso ale sa' le In anmepu nalali nane naleko ma namas. In namlil. Fai ankon ma nok-noka anbol. Le nane neno ne'.