Read Uab Meto KEJADIAN 12 Bible Online

KEJADIAN 12 - Uab Meto bible

KEJADIAN 12

¹UISNENO nak neu Nai Abram nak, “Musaitan ho pah, ma ho ini sin ma ho ama in ume, ma amnao neu pah le of Au lek ma lulu neu ko.

²Au of umfauba ho sufam ma ho ka'um ma sin of anfani uf anaet. Of Au fe ani ko tetus ma ho kanam nane of mateka talantia ho of amfani tetus.

³Of Au fe ani tetus neu atoni le anfe ko tetus, ma of Au sukat atoni-atoni le ansukat ko. Ma natuin ho of Au fe tetus neu ale uf anbi pah pinan.”

⁴Nai Abram in nan ton 75 anbi tabu in nasaitan pah Haran, matom nok UISNENO In aplenat neune. Nai Abram in nao neu pah Kanaan nok bi Sarai in fenai, ma Nai Lot in upuf, ma ale in mu'in ma in ate-ate sin le sin napeni anbi pah Haran. Leka sin antia pah Kanaan,

⁶Nai Abram anfun natef pah nane ma antia hau fuat anbi More, esle' bale luli-besa anbi Sikhem. (Anbi tabu nane atoni Kanaan fe natua pah le nane.)

⁷UISNENO natonon neu Nai Abram ma nak neune nak, “Pah le i of Au fe ani neu ho sufam ma ho ka'um.” Oke te Nai Abram nahakeb nani baki tulu mese anbi nane neu UISNENO le nakli'lon nalali neune.

⁸Nalali onane te in nao anfin neu kabenan bian a'ne'u, neu bale tubu anbi neno saen na'ko kot Betel, ma nahakeb in um-ume anbi Betel ma Ai sin atnanan: Betel bi aon neno tesan ma Ai bi aon neno saen. Ma anbi nane amsa in nahakeb baki tulu ma naluli nabes neu UISNENO.

⁹Nalali onane te in anfen ma nao na'ko bale nane neu bale bian, in nao nok salit neu pah Kanaan in kabenan ne'u.

¹⁰Mes amnahas anaek anbol anbi pah Kanaan, talantia Nai Abram in nao lo anteni neu pah Mesir in kabenan ne'u ma namaika anbi nane antia snama nane anfin ma ankon.

¹¹Anbi tabu leka in he nao anfini nakat ma hen tam neu pah Mesir in nak neu in fenai bi Sarai nak, “Au fenai, ho bife amasat ko.

¹²Leka atoni Mesir sin ankiso nit ko, sin of natenab nak ho le nane au fenai ma of sin namate kau ma nafetin ko ho moni.

¹³Es nane so' leko ho mutonan sin mak ho le nane au olif, he nati' sin kaisa namate kau ma antao ma anmo'e kau nok leko natuin ho.”

¹⁴Ma namneo, leka Nai Abram in anao anfini nakat ma antia pah Mesir, atoni Mesir sin nit nak bi Sarai nane in bife amasat kun.

¹⁵Ma leka ameput bian abit sonaf sin nit in ma naton neu usif neu bife nane lo amasat kun; es nane te neki in neu uiskesel in sonaf.

¹⁶Natuin bi Sarai, uiskesel anmo'e alekot neu Nai Abram ma anfe neune ate-ate, pukan bibi kase, ma bibi, bijae, bikase luke mnanu, ma bikase paha snaen.

¹⁷Mes natuin uiskesel naiti bi Sarai, UISNENO nasanut menas-menas le neki amtaus neu uiskesel ma atoni-atoni le' anbi sonaf in nanan.

¹⁸Oke te uiskesel no'en Nai Abram ma natoti in nak, “Ho mo'e mulali sa' neu kau ka? Nansa' es ho ka muton kau fa neu in le nane ho fenai?

¹⁹Nansa' es ho mak in le nane ho olif ma ho mufetin kau he au aiti anfani au fenai? In le i, ho fenai, maiti ma amnao nai!”

²⁰Kesel naplenat in ameput sin fauk-fauk, ma sin neki Nai Abram nok in fenai ma ale in mu'in anpoi nasaitan pah nane.