Read Uab Meto KEJADIAN 13 Bible Online

KEJADIAN 13 - Uab Meto bible

KEJADIAN 13

¹Nai Abram nasaitan pah Mesir ma in nao ansali aon bian a'li, anbi pah Kanaan in bian a'ne'u nok in fenai ma ale in mu'in ma nok Nai Lot amsa.

²Nai Abram nane atoni amu'it nae le'uf kun; in anmu'i bibi kase, bibi, bijae, noni muti ma mnatu.

³In anfen na'ko bales nao neu bale bian, in nao ansali Betel ma Ai, anbi bale fuat le anbi ahunut in nahakeb

⁴in um-ume ma nahakeb baki tulu. Anbi nane in naluli ma nabes neu UISNENO.

⁵Nai Lot amsa in anmu'i kun in ume nanan, ma ate-ate nok ale bibi kase, bibi ma bijae.

⁶Es nane te pah nane ka na noka fa in bale hun he nati' sin nua sin namaika nabua, natuin sin mu'it amfau le'uf kun.

⁷Oke te matoes anbol anbi Nai Abram ma Nai Lot sin atukus sin. (Anbi tabu nane atoni Kanaan ma atoni Feris sin fe natua pah le nane.)

⁸Nai Abram nak neu Nai Lot nak, “Hit le i at ma oil-tatan, ka leko fa leka ho atoni-atoni sin ma au atoni-atoni sin anmabanan es nok es.

⁹Es nane te leko nesi hit atmabaitsok. Ambeti nai aon bian me na'ko pah le i es hom lomi. Leka hom nao neu aon bian i, au of anao eu aon bian teta.”

¹⁰Nai Lot ankiso anfun natef ma in nit nak Anonof Yordan ok-oke, talantia kot Zoar anmu'i oe naek, onle Etu UISNENO ai onle pah Mesir. (Nahun na'ko UISNENO nale'un kot-kot Sodom ma Gomora bale nane alekot kun.)

¹¹Amsoput Nai Lot in anbeti kun mnela anbi Anonof Yordan, oke te in anfen ma in nao neu neno saen. Onle nane atoin nua'eun nane sin anbaitsok.

¹²Nai Abram nabalah anbi pah Kanaan, mes Nai Lot anmo'e um-ume anbi kot-kot anbi mnela anpaumak nok Sodom.

¹³Kot Sodom nane atoni-atoni amaufinut le nasanab neu UISNENO sin es natua anbine.

¹⁴Leka Nai Lot in nao nalali, UISNENO nak neu Nai Abram nak, “Na'ko bale le hom hake ambine, amkiso leko-leko nai neu neno in kabenan sin;

¹⁵Au of a'fe ani neu ko ma neu ho sufam pah le hom kiso le i anfun natef anfani ho ini tal nabal-bal.

¹⁶Au of umfaub ho sufam ma ho ka'um nane talantia atoni of kan so'i nabe'i fa sin. Onle atoni kan so'i fa afu skuku anbi nain, onane amsa ho sufam of kan so'i nabe'i fa.

¹⁷Tabu le i, hom nono pah le i anfun natef, natuin of Au fe ani neu ko.”

¹⁸Nalali onane te Nai Abram natnanib in um-ume, ma namaika anhaumak ale hau fuat bale luli-besa anbi Mamre anhaumak Hebron, ma anbi nane in nahakeb baki tulu neu UISNENO.