Read Uab Meto KEJADIAN 14 Bible Online

KEJADIAN 14 - Uab Meto bible

KEJADIAN 14

¹Kesel sin ha esle': Nai Amrafel na'ko Babilonia, Nai Ariokh na'ko Elasar, Nai Kedorlaomer na'ko Elam, ma Nai Tideal na'ko Goyim

²sin anmaken ma anlaban kesel nim bian, esle': Nai Bera na'ko Sodom, Nai Birsya na'ko Gomora, Nai Syinab na'ko Adma, Nai Semeber na'ko Zeboim, ma kesel na'ko Bela le antek in nak Zoar.

³Kesel nim sin nabua ma nibun sin solalus sin anbi Nonof Sidim, le tabu i antek nak Tasi Maten.

⁴Anbi ton bo'es am nua Kesel Nai Kedorlaomer, es naplenat sin, mes anbi ton bo'es am tenu, sin maken ma anlaban in.

⁵Anbi ton bo'es am ha, Kesel Nai Kedorlaomer ma sin le nabua nok in sin nem nok sin solalus sin ma anmaken ma sin nani atoni Refaim anbi Asyterot-Karnaim, atoni Zuzim anbi Ham, atoni Emim anbi Syawe-Kiryataim,

⁶ma atoni Hori anbi tubu-tubu Edom, ma anli'u sin antia El-Para anbi mnela snaen in ninen.

⁷Nalali onane te ali'ut-ali'ut nane anfani nem neu En-Mispat le tabu i antek nani nak Kades. Sin nis ma anbe'u pah Amalek anfun natef ma anli'u atoni Amori le namaika anbi Hazezon-Tamar.

⁸Namuni te kesel-kesel na'ko Sodom, Gomora, Adma, Zeboim ma Bela sin naloitan sin solalus anbi Nonof Sidim oke te sin anmaken

⁹ma anlaban kesel-kesel na'ko Elam, Goyim, Babilonia, ma Elasar; kesel nim anlaban kesel ha.

¹⁰Anonof nane nahenu nok nopu ai bola' aspal ai min afu ini ka'in, ma leka kesel-kesel na'ko Sodom ma Gomora sin nahelnok ma naen na'ko makenat, sin anmofu antam neu bola'-bola' nane sin nanan. Kesel tenu es nafetnok ma sin naenan neu tubu.

¹¹Kesel ha le sin nisan sin nasik ale sa'-sa' anbi Sodom ma Gomora, ma nok ale' mnahat, oke te sin anao.

¹²Nai Lot Nai Abram in upuf in namaika anbi Sodom, es nane te musu neki in nok ale in a mu'in.

¹³Mes atoni mese le in nafetnon in naton ale lasi nane neu Nai Abram, atoni Ibrani nane. Nai Abram natua anhaumak hau fuat bale luli-besa Nai Mamre, atoni Amori in-ini. Nai Mamre ma in benuf sin, esle' Nai Eskol ma Nai Aner nane sin anfani Nai Abram in soba sin nabuan mese.

¹⁴Leka Nai Abram in nen nak in upuf amsa sin anheke, in anibun ale atoni anbi in um-ume nanan, esle' anmanoe anbi makenat, sin amfaun atoni 318, ma sin anli'u natuin kesel ha in nane antia kot Dan.

¹⁵Anbi nane Nai Abram anbati atoni sin pukan fauk-fauk, le anmaken ma anlaban musu sin nane anbi fai. In anli'u natuin sin antia Hoba anbi kot Damsyik.

¹⁶Nai Abram nasik nan nafani ale blua le sin neki, ma Nai Lot nok in mu'in ma ale bife ma bian anteni.

¹⁷Ma leka sin anbe'u nalali Kesel Nai Kedorlaomer nok usif-usif le nabua nok in, Nai Abram anao anfani. Oke te kesel Sodom ansenu in anbi Anonof Syawe le antek amsa nak Nonof Kesel.

¹⁸Nai Melkisedek kesel Salem le anfani on Ana' fuat knino Uisneno Amnanut Afin-finit, in neki utunu' ma tua min kase neu Nai Abram,

¹⁹oke te Nai Melkisedek anfe nani tetus neu Nai Abram ma namolok nak, “So nati' Uisneno Amnanut Afin-finit, le anmepu nalali neno tunan ma pah pinan, anfe nani tetus neu Nai Abram!

²⁰Pules ma liatas neu Uisneno Amnanut Afin-finit, le anfe nalali mnisat ma nana'at nani ho musu sin neu ko.” Nalali onane te Nai Abram anfe nani neu Nai Melkisedek batis bo' mese na'ko ale blua le in nasik nafani ma neki nani.

²¹Oke te kesel Sodom nak neu Nai Abram nak, “Maiti nai blua mnisat nane, mes so nati' amfe mufani kau ale au atoni-atoni sin.”

²²Mes Nai Abram natae nak, “Au aiti supat anbi UISNENO In human In matan, Uisnneo Amnanut Afin-finit, Ameput neno tunan ma pah pinan.

²³Nak au of ka aiti fa sa'-sa' na'ko ho mu'im, maski nak abas nono mese ai pen haef in tani tuk es amsa kahaf. Nok nane of ho ka mumolok fa mak, “Au es umu'ib Nai Abram anfani atoni amu'it.”

²⁴Au ka lomi fa he aiti sa'-sa' es neu au aok. Mes maut he nati' au soba sin le namesbok nok kau, esle' Nai Aner, Nai Eskol, ma Nai Mamre sin naiti kuk sin ini.”