Read Uab Meto KEJADIAN 2 Bible Online

KEJADIAN 2 - Uab Meto bible

KEJADIAN 2

¹Neno tunan ma pah pinan nok in nesan In mepu natis ma namno'u kun onane.

²Uisneno nasopu nani In mepu anbi neno hitu, onane te In nasnas.

³Es nane te In anfe nani tetus neu neno hitu nane ma In anbeti nani neno le nane, natuin anbi neno nane Uisneno In nasnas leka In nasopu nalali In mepu.

⁴Uisneno anfatan ma anmepu neno tunan ma pah pinan nok in nesan onane. Leka UISNENO anmepu neno tunan ma pah pinan,

⁵kan mu'i fa fini le natol ma kan mu'i fa luet anbi pah pinan, natuin UISNENO fe ka nasanut fa tuaf he nati' anmepu nain le nane.

⁶Mes oe nasum na'ko pinan ma napeteb pah anfunam natef.

⁷Nalali te UISNENO naiti afu ma nabuab anfani atoni mese, ma antao snasaf amonit neu in, nao natuin in panan; es nane te atoni le nane anmoni.

⁸Nalali onane te UISNENO anmo'e nani etu mese anbi Eden, anbi neno saet, ma In antao nani atoni le In anmepu nalali nane.

⁹UISNENO namonib ale hau amasat, le nafua fuan alekot. Anbi etu in atnanan, In namonib hau le neki honis, ma hau le anfe hinet neu alekot ma amle'ut.

¹⁰Noe mese ansai na'ko Eden ma napet etu nane; ma anbi etu le nane in kotin noe nane anbation soluf ai sekif ha.

¹¹Le ahunut in kanan Pison; noe nane ansai anfun natef pah Hawila.

¹²Anbi bale nane anmu'i mnatu nesaf, ma hau fomeni le ka napeni fa anbi bale bian, ma fatu aklima.

¹³Noe nono nua in kanan Gihon; in oe ansai anfun natef pah Kus.

¹⁴Noe le nono tenu in kanan Tigris in ansai anbi pah Asyur in aon bian neno saen. Ma noe le nono ha in kanan Efrat.

¹⁵Nalali onane te UISNENO antao atoni nane anbi etu Eden he nati' anmepu ma anpanat etu le nane.

¹⁶UISNENO namolok neu atoni nane nak, “Na'ko hau-hau le anbi etu le i in nanan sin fuan nabe'i ho muah,

¹⁷mes neu hau le anfe hine neu alekot ma amle'ut in fuan kaisa ho muahan; kalu ho muah in fuan, namneo of ho mate anbi neno le nane amsa.”

¹⁸Oke te UISNENO Uisneno nak, “Ka naleko fa leka atoni nane anmoni anmes. Of Au mo'e ani biaf ai benuf mese le natai nokan hen tuntaku in.”

¹⁹Es nane te In naiti afu kle'o ma anmo'e ale mu'it anbi meto ma kolo anbi neno atnanan. Uisneno neki sin nem neu atoni le nane he nati' in ankiso ma kanaf sa' es of in hen fe nani neu mu'it-mu'it le nane. Le i kanaf le anfatan nani neu mu'it anbi meto ma anbi neno atnanan es nok es.

²⁰Atoni le nane antek nani ale mu'it anbi meto ma anbi neno atnanan onane. Mes anbi sin atnanan kan mu'i fa esle' he natai ma anfani biaf ai benuf hen tuntaku in.

²¹Oke te UISNENO anmo'e atoni nane antup anfin, ma anbi in tupas le nane, UISNENO napoitan bnapa mese na'ko atoni nane in aon, ma an obe nafani in balan neki nesa.

²²UISNENO anmo'e nani bife mese na'ko nui bnapa nane, ma In neki nem neu atoni nane.

²³Ma atoni nane namolok nak, “Namneo lo in, tuaf le namnes nok kau — nuif na'ko au nuif, ma nesa na'ko au nesa. Au ukanab in bife, natuin naiti in na'ko atoni.”

²⁴Nok lasi nane te atoni of nasaitan in amaf ma in ainaf, ma nabua nok in fenai, oke te sin nua sin anfani mese.

²⁵Atoni ma bife nane sin aonmonas kun, mes sin ka natenab fa lasi mae es nok es.