Read Uab Meto KEJADIAN 21 Bible Online

KEJADIAN 21 - Uab Meto bible

KEJADIAN 21

¹UISNENO anfe tetus neu bi Sara, onle In anba'an nalali.

²Anbi tabu le Uisneno anlek nalali, leka Nai Abraham in namnasi nalali, bi Sara naapu ma nahonis li'anmone mese.

³Nai Abraham nakanab li'ana nane Nai Ishak;

⁴ma leka Nai Ishak in nan neno fanu, Nai Abraham anhapi ma anheli in, matom nok Uisneno In plenat.

⁵Nai Abraham in nan ton natun mese leka nahonis Nai Ishak.

⁶Bi Sara namolok nak, “Uisneno anhalin kau es nane te au mani ulali. Atoni mese-mese le sin nen lasi le i of sin anmani natuin sin namlil nok kau.”

⁷Nalali te in namolok anteni nak, “Sekau es nabe'i namolok neu au mone nakof au ususu li'ana? Mes au uhoni ulalien amsa, maski nak au mone namnasi nalali.”

⁸Li'ana nane antu'an ma nanae piut, ma anbi tabu ansole in, Nai Abraham anmo'e fesat a'naek.

⁹Anbi neno mese, Nai Ismael, Nai Abraham ma bi Hagar bife na'ko Mesir nane sin anah, in na'bae nok Nai Ishak bi Sara in anah.

¹⁰Bi Sara in nit lasi nane oke te in nak neu Nai Abraham nak, “Amli'u ate bife nane nok in anah. Ka nabe'i fa he nati' ate bife nane in anah ansimo ho mu'im le of ho musanut mani neu Nai Ishak.”

¹¹Nai Abraham in kan malin fa nok han totis le nane, natuin Nai Ismael nane in anah amsa.

¹²Mes Uisneno namolok neu Nai Abraham nak, “Kaisa ho muoelbom natuin ho ate bi Hagar ma in anah le nane. Mutuin bi Sara in lomin, fun anao natuin Nai Ishak of Au umfauba ho sufam le Au ta'en ulali nane.

¹³Onane amsa neu bi Hagar in anah, of Au sato in anah ma in upuf sin he nati' sin anfani uf mese. Natuin in le nane ho anah amsa.”

¹⁴Anbi neno nokfa fe nok-noka, Nai Abraham anfe neu bi Hagar mnahat ma boit pasu le natua nani neki oe anfani bukae anbi lanan. In antutnaiba li'ana nane neu bi Hagar in kotin, ma anlenu bife nane anao. Oke te bi Hagar in fen ma nao ma in namaika anbi mnela snaen Bersyeba.

¹⁵Leka in bukae ma in oe oke, bi Hagar natupa li'ana nane anbi nasi in nanan,

¹⁶oke te in nao ma antok oni meter natun mese na'lo na'ko bale nane. In namolok anbi in nekan nanan nak, “Au ka ube'i fa he kiso li'ana nane hen mate.” Oke te in ankae.

¹⁷Uisneno In anen Nai Ismael in hanan, ma ahake neno tunan namolok neu bi Hagar nak, “Ho mususbom neu sa' ka, Hagar? Kaisa ho mumtau. Uisneno In anen nalali ho anah in hanan.

¹⁸Amnao nai neu ho anah, maiti in ma mumelak in. Of Au umfauba in sufan nane anfani uf naek mese.”

¹⁹Oke te Uisneno anfai bi Hagar in matan, talantia in ankiso nit oe nopu mese. In nao oke te in nalai oe neu in boit pasu nane, ma nalali te in nainut in anah.

²⁰Uisneno nokan Nai Ismael. Li'ana nane anfonat ma nanae piut, ma in namaika anbi mnela snaen Paran, ma anfani atoni ali'ut mu'it ahinet.

²¹In ainaf anmafeba in nok bife Mesir mese.

²²Anbi tabu nane Kesel Nai Abimelekh ma Nai Pikhol, in mo'e pa'e, nem neu Nai Abraham ma namolok nak, “Uisneno antuntaku ko anbi ale sa' le ho mo'e.

²³Es nane te, anmo'e nai supat anbi bale i anbi Uisneno In matan, nak of ho ka mo'e fa amle'ut neu kau, ma neu au anah-anah sin, ai neu au sufak. Onle au mo'e ulali alekot neu ko, anmo'e nai onane amsa neu kau ma neu pah le ho mumaika ambine le i.”

²⁴Nai Abraham namolok nak, “Au mo'e ani supat.”

²⁵Mes namuni onane Nai Abraham in antofon natuin Nai Abimelekh in ate sin nasik nan oe nopu mese.

²⁶Nai Abimelekh namolok nak, “Au ka uhin fa neu sekau es anmo'e nani. Ho fe ka muton mit kau fa, ma es fe au nen lasi nane.”

²⁷Oke te Nai Abraham anfe bibi kase, ma bijae puknes neu Nai Abimelekh, ma atoni nua in nane sin anmo'e lasi manta'en.

²⁸Nai Abraham anbeti nan bibi kase hiut na'ko bibi kase pukan sin,

²⁹ma Nai Abimelekh natoti neune nak, “Nansa' es ho mo'e mani lasi nane?”

³⁰Nai Abraham natae nak, “Amsimo nai bibi kase hitu sin le i hen fani takaf nak Usi ho amsa amtebes neu au es a'hani oe nopu le i.”

³¹So leko bale nane nakanab nak Bersyeba, natuin anbi bale nane atoni nane nua sin naiti supat.

³²Leka sin anmo'e nalali lasi manta'en anbi Bersyeba, Nai Abimelekh ma Nai Pikhol sin anfani neu atoni Filistin sin pah.

³³Oke te Nai Abraham ansenan hau tamariska anbi Bersyeba ma naubon na'ko tabu nane bale nane anfani bale luli-besa neu UISNENO, Uisneno talantia nabal-bal.

³⁴Nalali onane te Nai Abraham in namaika klobes anbi atoni Filistin sin pah.