Read Uab Meto KEJADIAN 23 Bible Online

KEJADIAN 23 - Uab Meto bible

KEJADIAN 23

¹Leka bi Sara in nan ton 127,

²in anmate anbi Hebron anbi pah Kanaan. Nai Abraham nasusab in nekan ma in ankae ma ankul in fenai.

³Nalali onane te Nai Abraham nasaitan in fenai in nitun ma in nao neu atoni-atoni Het, le natua pah le nane. In nak,

⁴“Au le i atoni anao amnemat kau le umaika anbi hi atnanam; amfe sona neu kau he au sos an afu pis es he au sub au fenai.”

⁵Sin natae nak,

⁶“Hai mibes neu ko Usi anfani atopus abe'it anbi kai, es nane te amsub ho fenai anbi hai naukel alekot. Hai alkai mimlil ma miloitan naukel neu hai Usi ko ho fenai.”

⁷Nalali te Nai Abraham anlitu ma nabes anbi sin matan,

⁸ma in namolok nak, “Kalu au bia ki nok nek menuan him lomi he nati' au sub ani au fenai anbi bale i, amtuntaku kau hem toti Nai Efron, Nai Zohar anmone,

⁹he nati' in nasosa neu kau in Nuat Makhpela abit in lene ninen. So leko in nasosa afu nane anbi i, he au bia ki hi mit ma mihine. Of au baen in upan nane, he nati' afu nane anfani au ini.”

¹⁰Anbi tabu nane Nai Efron antok nabua nok atoni-atoni Het anbi bale buat Eno naek kot nane. Oke te anbi atoni-atoni nane sin atnanan, in natae nak,

¹¹“Au uf anmes anfani on saksi neu lene nane nok in nuat au fe ani neu au Usi ko he nati' au Usi ko amsub ho fenai.”

¹²Nai Abraham anlitu ma nabes anbi atoni-atoni Het nane sin matan,

¹³ma ale atoni sin nen, in namolok neu Nai Efron nak, “Au toti ki he him nen kau. Au lomi he sos lene nane oke. Amsimo nai in noni, he nati' au sub au fenai anbi nane.”

¹⁴Nai Efron in natae nak,

¹⁵“Afu pisa mese le in upan noni muti natun ha sa' ka in otan neu hit nua kit? Au Usi ko amsub ho fenai anbi nane.”

¹⁶Nai Abraham in ansimo upaf nane. In anso'i noni muti onle Nai Efron antek nani, esle' noni muti natun ha, namnes nok atoni asosa sin atnais. Es nane te in anbaen neu Nai Efron, ma ale atoni Het nane sin anfani on saksi.

¹⁷Onle nane Nai Efron in mnuke le anbi Makhpela anbi Mamre, in aon neno saen anfani Nai Abraham ini. Anbi afu nane in atnanan anmu'i mnuke ma nuat ma ale hau-hau ma hau anbi in nakat nane anfani Nai Abraham ini.

¹⁸Ale atoni Het le sin nok anbi buat anbi kot nane in eno naek sin alsin nahin neu Nai Abraham ini kun.

¹⁹Nalali onane te Nai Abraham ansub in fenai bi Sara anbi Nuat Makhpela anbi pah Kanaan.

²⁰Esle' nane mnuke nok in nuat le afi ahunut atoni Het sin ini, anfani Nai Abraham in-ini anfani bale naukel.