Read Uab Meto KEJADIAN 24 Bible Online

KEJADIAN 24 - Uab Meto bible

KEJADIAN 24

¹Nai Abraham in namnasi, ma UISNENO anfe tetus neu in anbi ale lasi.

²Anbi neno mese Nai Abraham in nak neu in ate le namnasi nesi, le anpanat in maus sin nak, “Amtao ho nimam anbi au pusuk sin atnanan.

³Amsup nai natuin UISNENO, le naplenat neno tunan ma pah pinan, nak of ho ka mami fa fenai neu au anah Nai Ishak anbi atoni-atoni pah Kanaan le i sin atnanan.

⁴Ho mes amfani neu bale le nahonis kau anbine he mami fenai mese neu in anbi au in-ini sin atnanan.”

⁵Oke te ate nane natoti neu in nak, “Onme ka kalu fetnai nane kan lomi fa he nasaitan in ume ma kan lomi fa he nok kau neu pah le i? Au mes he eki au Usi no anah neu au Usi ho pah ka?”

⁶Mes Nai Abraham natae nak, “Ampantom! Kaisa ho meki au anah neu bale nane!

⁷UISNENO, le naplenat neno tunan, in es neki kau na'ko au amaf in ume ma na'ko au olif ma au tataf sin pah, ma ansup nalali neu kau nak In of anfe nani pah le i neu au sufak. In of anlenu In ahake he nati' antuntaku ko, he ho mupeni fenai mese na'ko bale nane neu au anah.

⁸Mes kalu bife nane kan lomi fa he natuin ko, ho of mufetnom na'ko supat nane. Anmo'e onme amsa kaisa ho mok au anah neu bale nane.”

⁹Nalali onane te ate nane in antao in niman neu in usin Nai Abraham in pusun atnanan, ma in ansup he nati' nanaoba sa' le Nai Abraham anlenu.

¹⁰Ate nane neki bikase luke mnanu bo'mese ma blua human namfau ma blua maupa le in usin in-ini, ma in nao neu kot le Nai Nahor afi namaika anbine; anbi pah Mesopotamia in aon bian a'li.

¹¹Leka in antia bale nane, in nasnasab ale bikase luke mnanu anbi oe nopu le anbi kot in kotin. Neno anmaben, ma nane tabu neu li'feto sin nem he nati' sin nahenu oe.

¹²Oke te ate nane in an onen toti nak, “UISNENO, le au usi Nai Abraham, ambab kau, he nati' au sutais anbi neno le i anmu'i in osan; musanut Ho athoen neno neu au usi Nai Abraham.

¹³Amkiso nai, au hake haumak oe le i. Ka lo fa anteni ale li'feto na'ko kot in nanan of sin nem ma ansote oe.

¹⁴Au of umolok neu esle' na'ko sin ak, ‘Musanut ho nai ma amfe neu kau oe he au inu.’ Kalu in natae nak, ‘Minu nai, ma au of u'inut Ama ho bikase paha snaen sin amsa!’ in le nane UISNENO es anbeti nani neu ho ate Nai Ishak. Kalu lasi nane anbol, of au uhin ak UISNENO nane In nek au usi Nai Abraham.”

¹⁵Leka fe in an onen onane, bi Ribka, li'feto amasat ma ao teme, in antia oe nane in neki nai anbi in benan. In le nane Nai Betuel in anah, ma Nai Betuel in amaf ma in ainaf es Nai Nahor ma bi Milka; Nai Abraham in tataf nane es Nai Nahor. Bi Ribka in nao neu oe nane ma nahenu oe neu in nai ma oke te in nao anfani.

¹⁶

¹⁷Nai Abraham in ate naen natuin in ma anhaumak ma namolok nak, “Ambab man kau fa, Anah, amfe kau fa oe he au inu na'ko ho na'i nane.”

¹⁸Li'feto nane natae nak, “Minu nai, Am,” oke te nok mande' in nasanut na'i nane na'ko in benan, ma in an na' ana'i nane ma Nai Abraham in ate ninu oe.

¹⁹Leka ate nane ninu nalali te; li'feto nane nak neune nak, “Of au sote oe neu Ama ho bikase snaen sin amsa, he nati' ho bikase snaen sin ninu talantia namsen.”

²⁰Ma nok manapat in an op oe na'ko na'i nane in nanan neu bikase snaen sin bale mninut, oke te in naen anfani neu oe ma nahenu anteni oe he nati' mu'it sin ninu talantia namsen.

²¹Ma Nai Abraham in ate ankiso in piut ma in ka namolok fa sa'-sa'. In ansali he nahin ai UISNENO anmo'e in he in mepu nane manesa in kahaf.

²²Leka ale bikase snaen sin ninu talantia namsen ok-oke, Nai Abraham in ate naiti falo mnatu maupa ma antao neu li'feto nane in panan. Ma antao nani niti mnatu maupa nane pasan mese neu in nukun.

²³Oke te ate in nak, “Ati ho muton kau fa, ho amaf nane es sekau ka. Anmu'i bale ka anbi in ume he nati' au ma au ate sin mimaika ambine?”

²⁴“Au amaf es Nai Betuel, Nai Nahor ma bi Milka sin anah,” li'feto nane natae onane.

²⁵“Anbi hai ume anmu'i bale maika neu Ama ma anmu'i aen ta'u namfau ma mnahat neu mu'it sin.”

²⁶Ma ate nane anlitu ma nabes neu UISNENO.

²⁷In nak, “Pules liatas neu UISNENO, au Usi Nai Abraham in Uisneno. Namneo UISNENO nane In aki'at kun ma In nek leko kun neu au Usi Nai Abraham. In es antopu kau neu in biaf ma in benuf sin.”

²⁸Ma li'feto nane in naen ma anao anfani neu in ainaf ume ma nanu'un ale lasi le anbol nalali.

²⁹Bi Ribka in tataf mese in kanan Nai Laban. In anen in olif nanu'un ale' sa' le ate nane natoti nani. In amsa nit falo anbi in olif panan ma niti le anbi in olif in niman nane. Es nane te Nai Laban anpoi na'ko ume ma in nao naeku nok Nai Abraham in ate nane le fe anhake nok in bikase paha snaen sin anhaumak nok oe nopu nane.

³⁰

³¹Oke te Nai Laban nak, “Amaf atoni le napeni tetus ma athoen neno na'ko UISNENO! Kaisa mumaika ambi mone i. Aum he tam teu hai ume. Hai miloitan milali ke'an neu ko Ama ma bale neu Ama ho bikase paha snaen sin amsa.”

³²Oke te ate nane natuin ma antam neu ume in nanan. Nai Laban nasanut baut na'ko bikase paha snaen sin tunan, ma anhao mu'it-mu'it nane neki aen ta'u. Nalali onane te in neki oe hen boe Nai Abraham in ate ma atoni-atoni nane sin haen.

³³Leka naloitan nalali bukae, ate nane in namolok nak, “Au of ka bukae fa nahun na'ko au fe ka utiaba fa fef ba'an le au eki.” Nai Laban nak, “Mukua a'am”.

³⁴Ma Nai Abraham in ate namolok, nak, “Au le i Nai Abraham in ate kau.

³⁵UISNENO anfe nani In athoen neno neu au usi nane ma namu'ib in nae le'uf kun. UISNENO anfe nalali neu in pukan bibi kase, bibi, bijae, bikase paha snaen, bikase luke mnanu, ma noni muti, mnatu, ma ate atoni ma bife.

³⁶Ma in fenai bi Sara anbi tabu in namnasi in nahonis li'anmone mese, ma au usi nane nasanut ale ini bnak ma in mu'in neu in anah nane.

³⁷In anlenu kau ma manta'en eki supat he nati' utuin in aplenat. Ma in nak, ‘Kaisa hom beti fenai neu au anah na'ko li'anfeto-li'anfeto anbi pah Kanaan le i,

³⁸somak ho maiti na'ko au amaf in sufan. Es nane te amnao neu bale nane nok manoe.’

³⁹Oke te au utoti neu in ak, ‘Onme ka kalu li'anfeto nane kan lomi fa he natuin kau?’

⁴⁰Oke te in natae nak, ‘UISNENO le au utuin In piut, In of anlenu In ahake neno hen tuntaku ko talantia ho mepu nane naton in nesan. Ho of mupeni fenai mese neu au anah na'ko au ini sin esle' au bia-benu na'ko au amaf in sufan.

⁴¹Mes leka sin antite ko, ho of mufetnom na'ko ho han supat nane.’

⁴²Ma leka au tia ulali oe nopu nane, au onen toti anbi au nekak nanan ak, ‘UISNENO, le au Usi Nai Abraham in Uisneno, so leko UISNENO Ho es muton kau au mepu in nesan.

⁴³Of au hake ubalah haumak anbi oe nopu le i. Leka li'anfeto mese nem he nahenu oe, of au toti oe mninut na'ko in.

⁴⁴Leka in anlomi ma anmo'e natuin, ma in anlomi he na'inut au bikase paha snaen sin, in le nane es UISNENO anlek ma anlulu nalali hen fani fenai neu au usi in anah.’

⁴⁵Leka au fe ka usopu fa onen totis nane anbi au nekak nanan, bi Ribka in nem neki in na'i le antao anbi in benan ma nahenu oe na'ko oe nopu nane. Nalali te au umolok neune ak, ‘Amfe kau fa oe he au inu.’

⁴⁶Nok manoe in nasanut na'i nane na'ko in benan ma in nak, ‘Minu nai, ma au of u'inut Ama ho bikase paha snaen sin.’ Oke te au inu ma nalali te in na'inut au bikase paha snaen sin.

⁴⁷Nalali onane te au utoti in ak, ‘Ho Ama nane sekau ka?’ Ma in natae nak, ‘Au Ama Nai Betuel, Nai Nahor ma Milka sin anah.’ Oke te au upakeb in mnatu neu in panan ma niti neu in niman.

⁴⁸Au ubes ma pules unaeb UISNENO, le au Usi Nai Abraham in Uisneno. In es antopu kau neu bale i, neu au usi in biaf-benuf sin talantia au u'eku oke li'feto mese neu in anah.

⁴⁹Tabu le i, leka hi mo'e alekot neu au usi ma hi mikonab hi lasi sutais neu in anfani hi ini, au toti he miton neu kau, mes kalu kahaf, miton kau amsa, he nati' au uhin sa' ka es au he mo'e.”

⁵⁰Nai Laban ma Nai Betuel sin natae nak, “Natuin ale lasi le i anbol na'ko UISNENO, hai of ka maiti fa fekat.

⁵¹Bi Ribka es i; maut he nati' in nok ko Ama ma anfani fenai neu ho usi in anah onle UISNENO naton nalali.”

⁵²Leka Nai Abraham in ate nane in nen nalali sin namolok in anlitu ma nabes neu UISNENO.

⁵³Oke te in napoitan blua pake, blua amasat na'ko noni muti ma mnatu, ma anfe sin oke neu Ribka. Ma neu in tataf ma neu in ainaf in anfe bale maupa amsa.

⁵⁴Nalali onane te Nai Abraham in ate nok in atoni sin anbukae ma namaika anbi nane. Leka sin anfen anbi nokfa nok-noka, ate nane in nak, “Amkolan kau he au fani neu au usi.”

⁵⁵Mes in tataf ma bi Ribka in ainaf nak, “Maut he nati' bi Ribka namaika anteni nok kai klei es ai neno bo'mese anteni, ma oke onane te nabe'i in anao.”

⁵⁶Mes ate nane in nak, “Kaisa him eka kau. UISNENO anmo'e nalali au naot le i naton in nesan; amkolan kau he au fani neu au usif.”

⁵⁷Sin natae nak, “Aum he hit athone bi Ribka ma tatoti in tenab.”

⁵⁸Oke te sin anboin bi Ribka ma natoti in nak, “Hom lomi ka he mutuin atoni le i?” Li'feto nane natae nak, “Namneo, au lomi.”

⁵⁹Es nane te sin ankolan bi Ribka nok in ain apafa sin nao nok Nai Abraham in ate ma in atoni sin. Oke te sin anfe tetus neu bi Ribka neki uab a'at le i, “So leko ho, Ribka amfani ainaf atoni hotun-hotun! So leko ho sufam natau musu sin kot-kot nane!”

⁶⁰

⁶¹Nalali te bi Ribka in naloitan nok ale bife munif sin le anfani in ate, oke te sin ansae bikase paha snaen ma sin nao natuin Nai Abraham in ate nane.

⁶²Anbi tabu nane amsa Nai Ishak in nem nalali na'ko mnela snaen, in anao natuin oe nopu le antek nak, “In es Anpanat Kau” ma namaika anbi Kanaan aon bian a'ne'u.

⁶³Anbi neno mabe mese in anpoi na'ko in um-ume he nao neu in lene, oke te in ankiso nit bikase paha snaen sin anao neman.

⁶⁴Leka bi Ribka ankiso nit Nai Ishak, in ansanu na'ko in bikase paha snaen,

⁶⁵ma in natoti Nai Abraham in ate nane nak, “Atoni abit lene le anao mat nem neu kit nane sekau ka?” “In le nane au usi,” ate nane natae in. Oke te bi Ribka in naiti in amu nakaf ma ankub nan in human.

⁶⁶Nalali onane te ate nane natonan Nai Ishak ale sa' le in anmo'e nalali.

⁶⁷Nalali te Nai Ishak neki bi Ribka antam neu in ainaf bi Sara in um-ume, ma in naiti bi Ribka anfani in fenai. Nai Ishak in nek nis bi Ribka; ma Nai Ishak in nekan anmalin na'ko nu'ut natuin in ainaf le anmate nalali.