Read Uab Meto KEJADIAN 25 Bible Online

KEJADIAN 25 - Uab Meto bible

KEJADIAN 25

¹Nai Abraham in anmafe anteni bife mese in kanan bi Ketura.

²In fenai nane nahonis li'ana-li'ana le sin kanan: Nai Zimran, Nai Yoksan, Nai Medan, Nai Midian, Nai Isybak, ma Nai Suah.

³Nai Yoksan nane anfani amaf neu Syeba ma Dedan, ma Nai Dedan nane in sufan esle' atoni Asyur, atoni Letus, ma atoni Leum.

⁴Nai Midian in anah sin esle': Nai Efa, Nai Efer, Nai Henokh, Nai Abida, ma Nai Eldaa. Sin alsin nane bi Ketura in sufan.

⁵Maski nak Nai Abraham nasanut in bnak ma in mu'in nane neu Nai Ishak,

⁶mes anbi tabu in fe anmoni in anbati neu in anah-anah le in napeni sin na'ko fenai-fenai bian sin pa' mese-mese. Nalali te in anlenu li'ana-li'ana le nane sin natnani neu pah Kanaan in aon neno saen, he nati' sin na'lo Nai Ishak in anah.

⁷Nai Abraham in anmate anbi ua mnanu, esle' in nan ton 175.

⁹In anah sin, esle' Nai Ishak ma Nai Ismael es ansub in anbi Nuat Makhpela anbi mnuke Mamre in aon neno saen. Anbi ahunut Nai Efron Nai Zohar anmone, atoni Het sin ini,

¹⁰mes Nai Abraham ansos nan nalali na'ko atoni Het nane. Bi Sara, Nai Abraham in fenai, ansub in anbi nane amsa.

¹¹Leka Nai Abraham anmate, Uisneno anfe tetus neu Nai Ishak, Nai Abraham in anah. Anbi tabu nane Nai Ishak namaika anhaumak oe nopu le antek nak, “In es Anpanat Kau.”

¹²Nai Ismael nane anmone na'ko Nai Abraham ma bi Hagar, bife na'ko Mesir, bi Sara in ate nane.

¹³Nai Ismael in anah sin bo'es am nua le antek sin natuin tabu nahonis sin: Nai Nebayot, Nai Kedar, Nai Adbeel, Nai Mibsam, Nai Misyma, Nai Duma, Nai Masa, Nai Hadad, Nai Tema, Nai Yetur, Nai Nafis, ma Nai Kedma. Li'ana-li'ana le nane anfani amaf neu uf bo'es am nua, ma kuan ma um-ume antek sin natuin sin kanan.

¹⁷Nai Ismael in nan ton 137 anbi tabu in anmate.

¹⁸In sufan nane namaika anbi pah Hawila ma Syur sin atnanan anbi Mesir in aon neno saen lanan nao neu Asyur. Sin anmoni anpais na'ko Nai Abraham in sufan bian.

¹⁹Le i nu'un antom Nai Ishak Nai Abraham in anah.

²⁰Nai Ishak in nan ton bo'ha leka' in anmafe nok bi Ribka, Nai Laban in olif, Nai Betuel atoni Aram na'ko Mesopotamia nane in anah.

²¹Natuin bi Ribka ka nahoni fa anah, Nai Ishak an onen toti neu UISNENO antom neu in fenai. UISNENO ansimo Nai Ishak in onen totis, talantia bi Ribka naapu.

²²In naapus ankuan li'ana, ma nahun na'ko nahonis li'ana-li'ana nane, sin anmaban anbi in apun. Bi Ribka in nak, “Nansa' es lasi le i anbol anbi au aok?” Oke te in antoti lekat lulut na'ko UISNENO.

²³UISNENO nak neune nak, “Uf nua es ho apum in nanan; ho of muhonis uf nua le anmamusun es nok es; in olif of nabe'i nesin in tataf ma le anae of antuthae le akliko.”

²⁴Bi Ribka in tabu antia he nahoni, ma in nahonis li'anmone nua le ankuan sin.

²⁵Le anaet in aon amtasa, ma in pasun onle sobalu ma'nafu. Es nane te nakanab in Nai Esau.

²⁶Leka nahonis anmone kliko, in niman ana' Nai Esau in haen tikan. Es nane te nakanab in Nai Yakub. Nai Ishak in nan ton bo'ne anbi tabu nahonis sin.

²⁷Li'anmone nua eun nane anfonat ma nanae piut. Nai Esau anfani ali'ut ahinet ma in anlomi he namaika anbi mnela hufui, mes Nai Yakub nane in atainine ma in lomi he namaika anbi ume.

²⁸Nai Ishak in nekan nesin Nai Esau, natuin Nai Ishak anlomi hen bukae sisi mu'i fui. Mes bi Ribka in nekan nesin neu Nai Yakub.

²⁹Anbi neno mese leka Nai Yakub fe nahan utan fua mtasa, Nai Esau in fani nem na'ko mnela. In namnah.

³⁰Ma in nak neu Nai Yakub nak, “Au umnah is. Amfe man kau fa ho fua mtasa kle'o.” (Es nane te antek in nak Edom.)

³¹Nai Yakub natae nak, “Leko, mes hom fe muhunun neu kau ho kanam on anmone nael.”

³²Nai Esau natae nak, “Kanaf nael nane in otan sa' neu kau. Au umnah nae le'uf kun!”

³³Nai Yakub in namolok anteni nak, “Hom sup muhun fe mak hom fe ho kanan anmone nael nane neu kau.” Nai Esau in ansup ma in anfe in kanan anmone nael neu Nai Yakub.

³⁴Nalai onane te Nai Yakub anfe neune utunu' ma utan fua mtasa nane bian. Nai Esau in nah ma ninu oke te in nao kun. Onle nane Nai Esau in nanebet in kanan anmone nael.