Read Uab Meto KEJADIAN 27 Bible Online

KEJADIAN 27 - Uab Meto bible

KEJADIAN 27

¹Anbi neno mese, leka Nai Ishak namnasi nalali ma in matan anfolo, in anboin Nai Esau, in anmone nael, oke te nak neune nak, “Au anah ko!” Ma Nai Esau natae nak, “Koi, au Ama.”

²Nai Ishak nak neune nak, “Ho muhin mulali nak au umnasi ma au of ka moni fa lo anteni.

³Es nane te maiti ho aklaot ma ho anef, meki sin amnao nai amli'u man mu'it mese anbi mnela.

⁴Muhan in nai nok aminat onle au lomi ani, ma meki nem neu kau. Leka au bukae ulali te, of au fe ani tetus neu ko nahun na'ko au fe ka mate fa.”

⁵Bi Ribka in nen Nai Ishak ma Nai Esau sin molok nane. Es nane leka Nai Esau in nao hen li'u mu'i fui,

⁶bi Ribka in nak neu Nai Yakub nak, “Au le amnen ulali ho Ama nak neu Nai Esau nak, on i,

⁷‘Amli'u man mu'i fui mese ma muhan nok aminat neu kau. Leka au bukae ulali, of au fe ani neu ko tetus anbi UISNENO In human In matan, nahun na'ko au fe ka mate fa.’

⁸Es nane, au anah ko,” bi Ribka in nak anteni “amnen nai ma mo'e nai sa' le of au ak neu ko le i.

⁹Amnao nai neu hit bibi kase sin o'of, ma amheke man bibi kase nua le apokat, he nati' au uhan anfani mnahat aminat le ho ama anlomi.

¹⁰Nalali te ho meki neu in he in anbukae, ma oke onane te in of anfe neu tetus nahun na'ko in fe kan mate fa.”

¹¹Mes Nai Yakub nak neu in ainaf nak, “Ain, Nai Esau nane in aon nane manafu, mes au kahaf?

¹²Kaisa-kaisa ama in anpoe au aok ma in nahin nak au fuli in; ma of in kan fe neu kau fa tetus, mes in ansukat kau.”

¹³In ainaf natae nak, “Au anah, kaisa ho mumtau. Maut he au sutai in sukat nane. Anmo'e nai sa' le au lenu ulali neu ko, amnao nai ma maiti bibi-bibi le nane.”

¹⁴Nai Yakub in anao ma naiti bibi-bibi nane ma in neki sin neu in ainaf, oke te bi Ribka in nahan bukae le Nai Ishak anlomi nani.

¹⁵Nalali te bi Ribka naiti Nai Esau in blua pake amasat sin, le nabelak sin anbi ume, ma in napakeb neu Nai Yakub.

¹⁶In an amu amsa Nai Yakub in niman ma in to'an ai in neon le ka mafunu fa nane, neki bibi in pasun.

¹⁷Oke te in anfe mnahat aminat nane nok utunu' le in mo'e nani nane neu Nai Yakub.

¹⁸Nalali te Nai Yakub anao neu in amaf ma in nak, “Ama!” Nai Ishak natae nak, “Ho sekau ko, Nai Esau ai Nai Yakub?”

¹⁹Nai Yakub natae nak, “Au Nai Esau kau, au ama ho anmone nae; au ama ho totis nane au mo'e ulali. Amtoko nai ma ambukae nai sisi na'ko mu'i fui le au eki, he nati' au ama amfe mani tetus neu kau.”

²⁰Nai Ishak nak, “Au anah, ho mupeni labah mnahat le i.” Nai Yakub natae nak, “Natuin UISNENO le au ama ho Uisneno le ho mubes neune es antuntaku kau.”

²¹Oke te Nai Ishak nak neu Nai Yakub nak, “Ho aum amhaumak kau he au poe ko. Namneo ka ho Nai Esau ko ka?”

²²Nai Yakub anhaumak in amaf anpoe in ma in nak, “Ho hanam on Nai Yakub in hanan, mes ho niman on Nai Esau in niman.”

²³Nai Ishak ka nahin fa Nai Yakub natuin in niman manafu on Nai Esau in niman. Mes anbi tabu in hen fen Nai Yakub tetus,

²⁴in fe natoti anteni haefes nak, “Namneo ho Nai Esau ko ka?” Nai Yakub natae nak, “Namneo.”

²⁵Oke te Nai Ishak nak, “Amfe kau sisi nane. Leka au bukae ulali of au fe au tetus neu ko.” Nai Yakub anfe sisi nane neune ma in anfe nani tua min kase kle'o amsa he in ninu.

²⁶Oke te in amaf nak neune nak, “Aum amhaumak kau nai, au anah ko, ma amnek kau nai.”

²⁷Leka Nai Yakub anhaumak he nek in, Nai Ishak nafoi Nai Esau in bael pake in fon, oke te in anfe nani tetus neu in. Nai Ishak namolok nak, “Au anah in fomenin nane onle mnela in fomenin le UISNENO anfe nalali tetus.

²⁸So nati' Uisneno anfe nani oe tene na'ko neno tunan, ma napokab ho lene-lene sin! So In anfe nani neu ko aen kase ma tua min kase nok athoes!

²⁹So ale pah nane anfani ho ate, ma ale uf-uf pah nane nabes neu ko. So nati' ho muplenat ho olif ma ho tataf sin, ma ho ainaf in sufan nane nabes anbi ho humam ma ho matam. Sukat neu ale atoni le ansukat ko, ma tetus athoe neno neu ale atoni le anfe ko tetus.”

³⁰Leka Nai Ishak anfe nalali tetus neu in, ma Nai Yakub in nao kun, Nai Esau in anfani nem na'ko bale li'ut.

³¹In amsa nahan mnahat aminat oke te in neki neu in amaf, ma in nak, “Amfen ma amtoko nai ma ambukae sisi le' au eki neu ko, he nati' ho amfe kau tetus.”

³²Nai Ishak natoti nak, “Ho sekau ko ka?” In natae nak, “Au Nai Esau kau le au Ama ho anmone nael.”

³³Nai Ishak in aon anlilitai ok-oke, ma in natoti nak, “Kalu onane, sekau es anli'u nalali mu'i fui ma lelon in neki nem neu kau? Au aiti ma au bukae ulali nahun na'ko ho aum amtia. Oke te au fe ulali au tetus amsoput neune, ma tabu le i tetus nane anfani in-ini talantia nabal-bal.”

³⁴Leka Nai Esau in nen lasi nane, in ankae nahel-helnon ma nahenu nok nek nu'ut, oke te in nak, “Amfe neu kau tetus amsa, koi Ama!”

³⁵Nai Ishak in namolok nak, “Ho olif in nem nalali ma anfuli kau. In ansimo nalali tetus le namneo au he fe ani neu ko.”

³⁶Nai Esau in nak, “Le i hae nua le in anfuli kau. Es nane te namneo in kanan Nai Yakub. In nasik nani au pa' anfani li'anmone nael, ma tabu le i in ansimo nani tetus le anfani au ini. Au Ama oin ho ka mu'im teni fa tetus bian neu kau ka?”

³⁷Nai Ishak natae nak, “Au mo'e ulali in anfani on ho usi, ma in olif tataf sin au mo'e sin anfani in ate. Au fe ulali neune aen kase ma tua min kase. Tabu le i kan mu'in teni fa sa'-sa' le au he mo'e neu ko, au anah!”

³⁸Nai Esau ka nas-nas fa hen toti neu in amaf nak, “Ai al ho mu'i tetus mese Ama? Amfe neu kau tetus amsa, Ama!” Oke te in ankae anteni.

³⁹Oke te Nai Ishak nak neune nak, “Of kan mu'i teni fa oe tene na'ko neno tunan neu ko, ma ho lene of ka maafa fa.

⁴⁰Of ho moni mu'ko ho suni, mes of hom aetnom neu ho olif, mes leka ho maban mok in, of ho mufetnom mu'ko in kuasat.”

⁴¹Es nane te Nai Esau in nek nanan Nai Yakub natuin in anfe nalali tetus neu in olif. In natenab nak, “Ka lo fa anteni Ama of anmate ma leka haim kae ma amkul milali, of au umate Nai Yakub!”

⁴²Leka bi Ribka in nen Nai Esau in sali' nane, in anlenu ma no'en Nai Yakub ma nak, “Amnen nai, ho tataf Nai Esau natenab hen seunbanin in nek nanan ma he namate ko.

⁴³Anmo'e nai sa' le au lenu ko le' i. Amnao nai neu au tataf Nai Laban anbi Haran,

⁴⁴ma mumaika mok in tabu fauk-fauk in nanan, talantia ho tataf in to'as nane anain,

⁴⁵ma in nikan sa' le ho mo'e mulali neu in. Nalali te of au lenu atoni he neki ko amfain aum. Au ka lomi fa he uneku au anah sin nuasin anbi neno mese.”

⁴⁶Es nane te bi Ribka nak neu Nai Ishak nak, “Au len ma makan leka au kiso Nai Esau in fenainu na'ko uf atoni anao amnemat nane. Leka Nai Yakub amsa in anmafe anteni nok li'feto Het, leko nesi au mate nai.”