Read Uab Meto KEJADIAN 28 Bible Online

KEJADIAN 28 - Uab Meto bible

KEJADIAN 28

¹Namuni onane te Nai Ishak in no'en Nai Yakub, oke te anfe neune tetus ma in nak, “Kaisa ho mafe li'feto na'ko Kanaan.

²Amnao nai meu Mesopotamia, neu Nai Betuel in-ini sin, ma ho amafe li'anfeto mese na'ko ho bab uf Nai Laban.

³So nati' Uisneno Akuasat Afin-finit anfe nani tetus neu ho mafet nane, ma namfaub ho anah upuf sin, talantia hom fani am uf neu uf namfau!

⁴So nati' UISNENO anfe tetus neu ko ma ho sufam onle In anfe nalali tetus neu Nai Abraham, ma so nati' pah le ho mumaika ambine le i anfani ho ini kun, le Uisneno anfe nalali neu Nai Abraham!”

⁵Onle nane Nai Ishak nafetin Nai Yakub ma nao neu Mesopotamia, neu Nai Laban, Nai Betuel atoni Aram nane in anah. Nai Laban nane tataf na'ko bi Ribka le Nai Yakub ma Nai Esau sin ainaf.

⁶Nai Esau in nen nak Nai Ishak anfe nalali tetus neu Nai Yakub ma nafetin in anao neu Mesopotamia he nati' nami bife anbi nane. Ma anbi tabu Nai Ishak anfe tetus neu Nai Yakub in anba'an Nai Yakub, he nati' kaisa anmafe li'feto Kanaan.

⁷Ma nes na'ko nane amsa Nai Esau in nahin nak, Nai Yakub natuin in amaf ma in ainaf sin uab ma in anfen ma nao nalali neu Mesopotamia.

⁸Es nane te Nai Esau in nekan nahin nak Nai Ishak, in amaf nane, kan lomi fa bife na'ko Kanaan,

⁹es nane te Nai Esau in nao neu Nai Ismael, Nai Abraham in anah ma in anmafe nok Nai Ismael in anfeto le' in kanan bi Mahalat, Nebayot in olif.

¹⁰Nai Yakub nasaitan Bersyeba ma in nao neu Haran.

¹¹Leka neno antes in antia bale mese, oke te in antup anbi nane. Leka in hen tup; in an'aika nunu fatu mese.

¹²Nalali te in na nanai nak in nit el fatu mese le anhake anbi pah pinan ma in panan bian nane antia neno tunan ma ahake neno tunan sin ansae ma ansanu nao natuin el fatu nane.

¹³Ma anbi in aon bian UISNENO anhake ma namolok nak, “Au le Usi, UISNENO Nai Abraham ma Nai Ishak le nabes neune. Of Au fe ani neu ko ma neu ho sufam pah bale le hom tup ambine le i.

¹⁴Of ho sufam nane in amfaun onle afu anbi pah pinan. Sin of anhanua sin pah neu neno kabenan oke, ma nanet natuin ho sufam, of Au fe tetus neu ale uf anbi pah pinan.

¹⁵Mumnai nai, of Au panat ko ma uneo ma ahofa ko, leko ho hem nao neu me, ma of Au eki ufani ko neu pah le' i. Of Au ka usaitan ko fa talantia Au mo'e ale sa' le Au ta'en ulali neu ko.”

¹⁶Oke te Nai Yakub anfen na'ko in tupas ma in nak, “UISNENO es i, anbi bale le i, mes fe na' anbi tabu le' i au uhin!”

¹⁷In namtau ma in namolok nak, “Bale le i lo matain le'uf kun! Namneo bale le'i ume Uisneno, ma le i eno naek neno tunan.”

¹⁸Anbi nokfa fe nok-noka Nai Yakub anfen, ma naiti fatu le in anpake anfani aka'nunu ma nahakeb in anfani fatu mnaut. In anponin mina bub fua mina neu fatu nane in fafon ma anbeti nani neu Uisneno.

¹⁹Ma in nakanab bale le nane Betel. (Anbi ahunut bale nane in kanan Lus.)

²⁰Oke te Nai Yakub ansup nak, “Kalu UISNENO antuntaku kau ma naneo ma nahafo kau anbi au lanan le i ma anfe neu kau mnahat ma blua pake

²¹talantia au fani neu au ama in ume nok aomina, UISNENO of anfani au Uisneno.

²²Ma au of u'tulu ani neu UISNENO batis bo'mese na'ko ale au sa' le UISNENO anfe nani neu kau. Fatu mnaut le' au uhakeb ani le i of anfani bale luli-besa neu UISNENO.”