Read Uab Meto KEJADIAN 29 Bible Online

KEJADIAN 29 - Uab Meto bible

KEJADIAN 29

¹Nai Yakub anfen ma in nao neu pah Kanaan in aon neno saen.

²Nok askeken in ankiso nit oe nopu mese anbi mnela, ma anhaumak in bibi kase pukan tenu le ninu na'kone antup anbi nane. Oe nopu nane antobe nani neki fatu naek.

³Kalu ale pukan bibi kase nabua nalali anbi bale nane, ale atukus bibi sin tuila' fatu nane neu in aon bian, ma nainut bibi kase nane. Nalali onane te ale' atukus bibi sin antobe nafani oe nopu nane.

⁴Oke te Nai Yakub in natoti ale atukus bibi le anbi bale nane nak, “Hoi soba, hi mi'ko me ka?” Sin natae nak, “Hai mi'ko Haran.”

⁵Nai Yakub natoti anteni nak, “Ai hi mihin Nai Laban le Nai Nahor in anmone?” Sin natae nak, “Hai mihin.”

⁶Nai Yakub natoti anteni nak, “In onme ka?” Sin natae nak, “In es aomina.” “Amkiso nai, nane in anfeto le in kanan bi Rahel. In nem neki in amaf pukan bibi kase sin.”

⁷Nai Yakub nak, “Fe neno ma fe kan tia fa tabu bibi kase he natam sin neu o'of in nanan. Nansa' es hi ka mi inut fa mu'it-mu'it nane ma hi mifetin sin he neku anteni hun ka?”

⁸Sin natae nak, “Bibi kase sin le nane of hai mi inut sin leka ale pukan bibi kase nabua ok-oke anbi i ma fatu obet nane na'oiba nani.”

⁹Leka Nai Yakub fe namolok nok sin, bi Rahel in nem antia neki in pukan bibi kase sin.

¹⁰Leka Nai Yakub in nit bi Rahel nok in pukan bibi kase sin, Nai Yakub in nao neu oe nopu nane, ma natnanib fatu obet neu in aon bian ma in na'inut pukan bibi kase nane.

¹¹Nalali te in anek bi Rahel, ma in ankae natuin in nekan antu'.

¹²In nak neu bi Rahel nak, “Au le i bi Ribka in anah, ho ama in tataf.” Es nane te bi Rahel anao anfani neu in ume he naton lasi nane neu in amaf.

¹³Leka Nai Laban innen hanaf neu Nai Yakub, in moen feuf nane, in anao ma natef nok in. Nai Laban anhonan Nai Yakub ma anek in, oke te nokan ma antam neu in ume nanan. Leka Nai Yakub etu ma naton ale lasi nane neu Nai Laban,

¹⁴Nai Laban nak neune nak, “Namneo tebes, ho malut ma matalu ma ho mese mok kau.” Nai Yakub in namaika anbi ume nane funan mese.

¹⁵Anbi neno mese Nai Laban nak neu Nai Yakub nak, “Ka nabe'i fa he ho mepu neu kau son-sona, al natuin ho le nane au in-ini. Hom lomi upaf fauk na'ko kau?”

¹⁶Nai Laban in mu'i anfeto nua; le anaet in kanan bi Lea ma in olif kanan bi Rahel.

¹⁷Bi Lea nane in matan ka naleok fa, mes bi Rahel in aon naleko ma in human namas.

¹⁸Nai Yakub in nekan anmofu neu bi Rahel, es nane te in natae Nai Laban nak, “Au lomi he mepu ton hitu leka au Baba ko ho mufetin kau he au mafe oke bi Rahel.”

¹⁹Nai Laban nak, “Leko nesi au fe in neu ko na'ko au fe neu atoni bian; es nane te ho mumaika ambi i.”

²⁰Nai Yakub anmepu ton hitu he nati' napeni bi Rahel, ma neu in ton-ton nane anfin onle neno mese kun, natuin in anek nis li'feto nane.

²¹Nalali onane te Nai Yakub nak neu Nai Laban nak, “Ton hitu anfini nalalien; es nane te mufetin kau he au mafe oke au Baba ho anah.”

²²Oke te Nai Laban anmo'e fesat anmatom nok sin mafet mamonet nane ma anhone ale atoni anbi kot nane in nanan.

²³Mes anbi fai nane, ka bi Rahel fa mes bi Lea es Nai Laban anfe nani neu Nai Yakub, ma Nai Yakub antup nabua nok in. (

²⁴Nai Laban anfe in ate bife kanan bi Zilpa neu bi Lea, hen fani in ate.)

²⁵Anbi nokfa Nai Yakub fe nahin nak in anmafe nok bi Lea. Oke te in nao neu Nai Laban ma in nak, “Nansa' Baba ho mo'e kau onle i? Ai au ka mepu fa neu he nati' upeni bi Rahel? Nansa' Baba es hom fuli kau?”

²⁶Nai Laban natae in nak, “Namnes nok halat anbi i, olif ka nabe'i fa hen mamone nahunun tataf.

²⁷Ampao fe neno hitu anfini he fesat neu hi mafet mamonet le' i namsopu, of au fe Rahel neu ko amsa, al he nati' hom lomi he mepu ton hitu anteni.”

²⁸Nai Yakub anlomi ma leka fesat nane anfini, Nai Laban anfe bi Rahel anteni neune anfani in fenai. (

²⁹Nai Laban anfe in ate bife mese kanan bi Bilha neu bi Rahel, anfani in ate.)

³⁰Nai Yakub antup nabua nok bi Rahel amsa, mes in anek anesin bi Rahel na'ko bi Lea. Namuni onane te in anmepu ton hitu anteni.

³¹Leka UISNENO ankiso nak in nek nanesin bi Rahel na'ko bi Lea, UISNENO nafetin bi Lea he nahoni li'ana, mes bi Rahel ka napeni fa anah.

³²Bi Lea naapu oke te nahonis li'anmone mese. In nak, “UISNENO ankiso kau anbi au nukat, ma tabu le' i au mone of in anek kau.” Es nane te in nakanab in anah nane Nai Ruben.

³³Bi Lea naapu anteni oke te in nahonis li'anmone mese. Bi Lea nak, “UISNENO anfe nalali kau li'ana le i natuin In nen nak Nai Yakub ka nek kau fa.” Oke te in nakanab li'ana nane Nai Simeon.

³⁴Bi lea naapu anteni oke te in nahonis li'anmone mese. In nak, “Tabu le i au mone of na'ki neu kau natuin au uhonis ulali li'anmone tenu.” Oke te in nakanab li'ana nane Nai Lewi.

³⁵Namuni te bi Lea naapu anteni ma nahonis li'anmone mese. In nak, “Haef le i of au uliatas UISNENO.” Oke te in in anah nane Nai Yehuda. Oke onane te bi Lea ka nahoni anteni fa.