Read Uab Meto KEJADIAN 30 Bible Online

KEJADIAN 30 - Uab Meto bible

KEJADIAN 30

¹Mes bi Rahel fe ka napeni fa li'ana amsa. Es nane te in nek tinon in tataf, ma in nak neu Nai Yakub nak, “Amfe neu kau li'ana, kalu kahaf, of au mate.”

²Nai Yakub in nato'an bi Rahel ma in nak, “Au le i ka Uisneno kau fa. In es anmo'e ko talantia ho ka mupeni fa li'ana.”

³Oke te bi Rahel nak, “I au ate bi Bilha; amtup mok in he nati' in nahoni. Nao natuin in au fani ainaf neu in.”

⁴Oke te in anfe bi Bilha neu in mone, ma Nai Yakub antup nabua nok ate nane.

⁵Bi Bilha naapu ma nahonis li'anmone mese.

⁶Bi Rahel namolok nak, “Uisneno anlefi nalali lasi neu au sutais. In nen au onen totis ma in anfe nalali li'anmone mese neu kau.” Oke te in nakanab li'ana nane Nai Dan.

⁷Bi Bilha naapu ma nahonis li'anmone mese anteni.

⁸Bi Rahel in nak, “Au mabe'u nok matani laban au tata, ma au is,” es nane te in nakanab li'ana nane Nai Naftali.

⁹Leka bi Lea in nahin nak of in ka napeni anteni fa li'ana, in anfe in ate bi Zilpa, neu Nai Yakub hen fani in fenai.

¹⁰Bi Zilpa nahonis li'anmone mese.

¹¹Bi Lea in nak, “Au is ulalien,” oke te in nakanab li'ana nane Nai Gad.

¹²Bi Zilpa nahonis li'anmone mese anteni,

¹³ma bi Lea in nak, “Au ua alekot nae le'uf kun! Tabu le i ale bife of namolok nak au ua alekot kau.” Es nane te nakanab li'ana nane Nai Asyer.

¹⁴Anbi tabu anlefi aen kase, Nai Ruben in nao neu mnela, in napeni hau sena le anfani malo, oke te in neki neu bi Lea in ainaf. Bi Rahel nak neu bi Lea nak, “Amfe kau hau sena le anfani malo nane kle'o le ho anah napeni nane.”

¹⁵Bi Lea natae nak, “Au fe ka noka fa neu ho musik man au mone ka? Es tabu le i ho he maiti amteni malo le au anah napani.” Bi Rahel in nak, “Kaluhom lomi hem fe neu kau hau sena le anfani malo le ho anah napeni nane, nabe'i hom tup mubua mok Nai Yakub anbi fai le i.”

¹⁶Leka Nai Yakub anfani nem neu ume anbi neon mabe nane, bi Lea ansenu in ma nak neune nak, “Amtup mok kau anbi fai le i natuin au baen ulali eki hau sena le anfani malo na'ko au anah.” Oke te Nai Yakub antup nabua nok in anbi fai le nane.

¹⁷Uisneno ansimo bi Lea in onen totis, ma in naapu ma nahonis li'anmone no nima.

¹⁸Bi Lea in nak, “Uisneno anfe nalali upa neu kau natuin au una'at ulali bi Zilpa neu au mone,” es nane te in nakanab li'ana nane Nai Isakhar.

¹⁹Bi Lea naapu anteni ma nahonis li'anmone no ne'.

²⁰In nak, “Uisneno anfe nalali neu kau pa' amasat. Leku le i au mone of naupab kau, natuin au uhonis ulali li'anmone ne',” es nane te in nakanab li'ana nane Nai Zebulon.

²¹Nalali onane te bi Lea nahonis li'anfeto mese ma in nakanab in bi Dina.

²²Oke te Uisneno namnau bi Rahel; Uisneno ansimo in onen totis ma anfe neune tabu sona he in napeni li'ana.

²³Ma Rahel naapu ma nahonis li'anmone mese. Bi Rahel in nak, “Uisneno naneku nalali au nek mae.

²⁴So nati' UISNENO anfe neu kau li'anmone mese anteni.” Es nane te in nakanab li'ana nane Nai Yusuf.

²⁵Leka bi Rahel nahonis nalali Nai Yusuf, Nai Yakub nak neu Nai Laban nak, “Mufetin kau he au nao fani Neu au pah.

²⁶Mufetin kau he au nao oke au fenai nua sin ma au anah-anah sin. Au upeni sin natuin au mepu neu au Baba ko. Au Baba ko ho muhin, au mepu ulali nok ma'tani le'uf.”

²⁷Nai Laban nak neune nak, “Amnen nai fe: Au upeni mnitas nak UISNENO anfe nalali kau tetus nao natuin ko.

²⁸Muton kau nai hom toti fauk.”

²⁹Nai Yakub natae nak, “Au Baba ko ho muhin mulali neu au mepu nok mafena, ma ho mu'it sin ansato piut natuin au es apanat sin.

³⁰Nahun na'ko au fe ka aum fa, au Baba ho mu'im nane al faukah, mes tabu le i au Baba ko hom fani atoni amu'it. UISNENO anfe nalali ko tetus nao natuin kau. Tabu le i antia nalali in eti he au mepu neu au in-ini sin.”

³¹Nai Laban nak, “Es nane te sa' es of au he fe neu ko?” Nai Yakub natae nak, “Ka nabe'i fa au Baba ho hem fe kau sa'-sa'. Of au panat au Baba ho mu'it sin piut, al he nati' au Baba hom lomi au han totis le i:

³²Mufetin kau anbi neno le i he au ka'oinsok anbi au Baba ho pukan bibi kase sin atnanan, ma au aiti bibi ankase metan, ma bibi ana le a'koto'. Nane anfani upa' le au lomi.

³³Anbi neno amunit nok manoe au Baba ho muhin neu au mepu nok nek muti. Leka Baba ho aum he nati' amtae au upa' ma hom kiso bibi le ka koto' fa, ai bibi kase le ka metan fa, of Baba ho muhin nak mu'it nane au ubak ulali.”

³⁴Nai Laban natae nak, “Au lomi! Hit of tanaoba sa' le hom toti nane!?”

³⁵Mes anbi neno nane Nai Laban anbeti ale bibi keso koto' ma ale bibi aina koto', ai le in a'koton muti; in amsa anbeti bibi kase metan. Nalali te in anlenu in anah-anah sin natuku mu'it-mu'it nane,

³⁶oke te sin nao neki mu'it-mu'it nane na'lo na'ko Nai Yakub, in a'lon atnao tan neno tenu. Pukan bibi kase nane sin nesin anfani Nai Laban ini ma Nai Yakub es natuku sin.

³⁷Namuni te Nai Yakub naiti hau no mate na'ko hau onle fenu kase, timu ma nunuh, ma an is nani in a'po'an talantia na'kot'on.

³⁸In antao hau tlaefin nane anbi pukan bibi kase sin matan, natuin mu'it-mu'it nane na'teli anbi tabu sin ninun.

³⁹Es nane te leka bibi-bibi nane na'teli anbi hau tlaef-hau tlaef nane sin matan, in anah sin of na'kot'ok natuin onan.

⁴⁰Namuni te Nai Yakub naiti bibi kase-bibi kase ma in nabaina sin neu bibi-bibi le tui'eun ma metneun. Nok lanan nane in napeni pukan bibi kase neu in ma anbatisok na'ko pukan bibi kase Nai Laban in-ini.

⁴¹Ma leka mu'it-mu'it le anmatani fe na'teli, Nai Yakub antao hau tlaef-hau tlaef le in an'isi nane anbi sin bale mninut in nanan.

⁴²Mes hau tlaef-hau tlaef nane in kan tao sin fa anbi mu'it-mu'it a'olet sin matan. Es nane, ale mu'it le in nafun muti nane an'ole, ma nane Nai Laban in-ini, mes ale mu'it le metan nane, tui'eun ma koto' le anmatani, le nane Nai Yakub in-ini.

⁴³Nok nane Nai Yakub anfani atoni amu'it abainesit kun. In anmu'i pukan bibi kase namfau, bikase paha snaen, bikase luke mnanu ma ate-ate.