Read Uab Meto KEJADIAN 31 Bible Online

KEJADIAN 31 - Uab Meto bible

KEJADIAN 31

¹Nai Yakub in anen Nai Laban in anah sin namolok nak on i, “Nai Yakub nasik nan hit ama in a'mu'in. Ale in mu'in nane na'ko hit ama in amaus.”

²Anbi Nai Yakub in kisot amsa nak Nai Laban kan mahoe anteni fa on afi ahunut.

³Oke te UISNENO nak neu Nai Yakub nak, “Amnao amfani nai neu ho ama in pah ma neu ho in-ini sin. Au of uneo ma uhafo ko.”

⁴Nalali te Nai Yakub anlenu atoni he natonan bi Rahel ma bi Lea he nati' naeku nok in anbi mnela, bale in pukan bibi kase sin.

⁵Oke te Nai Yakub nak neu sin nak, “Anbi au kisot hi ama kan mahoe fa anteni neu kau; mes Uisneno le au ama nabes neune naneo ma nahafo kau.

⁶Hi nua ki mihin amsa neu au mepu ulali neu hi ama eki au be'ik ma au matanik oke.

⁷Maski nak onane amsa in anfuli kau ma in nabaina au upa' talantia haef bo'mese. Mes Uisneno ka nafetin fa in hen mo'e maufinu neu kau.

⁸Anbi tabu hi ama namolok nak, ‘Bibi koto sin nane of anfani ho upa',’ es nane te ale bibi kase nane nahonis ana koto'. Leka in namolok nak, ‘Ale bibi tuif nane of anfani ho upa',’ es nane te ale pukan bibi nahonis ana tuif.

⁹Uisneno naiti hi ama mu'in onane ma anfe nani neu kau.

¹⁰Ma leka antia tabu mu'it-mu'it nane na'teli, au unanai it ale bibi kase le in na'teli nane, tuif, ma koto'.

¹¹Ma Uisneno nahumbon anfani ahake neno namolok nok kau anbi nanait In nanan nak, ‘Yakub!’ Au amsa utae ak, ‘Koi Usi’.

¹²Ahake neno nane namolok anteni nak, ‘Amkiso nai, ale bibi le na'teli nane koto' ma tuif. Au es a'lek ma lulu ulali neu ko, natuin Au it ulali ale sa' le Nai Laban anmo'e nalali neu ko.

¹³Au le i Uisneno le Au uton ulaliok neu ko anbi Betel. Anbi bale nane ho mutulu mulali fatu mnaut mese', ma hom ponin mulali min fomeni neu in fafon. Anbi bale nane amsa hom sup mulali neu Kau. Tabu le i muloitan ma amfani nai neu le' nahonis ko anbine.’ ”

¹⁴Oke te bi Lea ma bi Rahel sin natae nak, “Kan mu'in teni fa pa' na'ko hai ama in mu'in le of he nasanut neu kai.

¹⁵Hai le' i in ankiso kai onle atoni anao amnemat. In nasosa nalali kai ma ale sa' le in ansimo antom lasi nane in nah nani amsa.

¹⁶Ale amaus le Uisneno naiti nalali na'ko hai ama namneo nane hai ini ma hai anah sin. Munaoba sa' le Uisneno naplenat nalali neu ko.”

¹⁷Oke te Nai Yakub naloitan ma nabalab he nati' anao anfani neu in amaf anbi pah Kanaan. In nasaeba in fenai sin ma in anah sin neu bikase paha snaen, ma in anpo' in pukan bibi kase sin, ma ale sa' le in napeni anbi pah Mesopotamia.

¹⁸

¹⁹Anbi tabu nane Nai Laban ankateli bibi kase sin funun anbi mnela, ma anbi tabu nane bi Rahel nabak nan fatu le'u le anpanat Nai Laban in ume nanan.

²⁰Nai Yakub anfuli Nai Laban ma ka natonan fa neu in he nao anfani.

²¹Nok manapat in naiti in mu'in ma in nao kun. In anlak anfini Noe Efrat ma in nao neu paha tubu Gilead.

²²Anbi neno tenu namuni te Nai Laban fe in nahin nak Nai Yakub in naen nalali.

²³Oke te Nai Laban in annibun atoni-atoni sin ma sin anli'u natuin Nai Yakub ma anbi neno hitu in nanan sin natuin in anbi pah tubu Gilead.

²⁴Anbi fai Uisneno nem neu Nai Laban anbi nanait, ma In nak, “Ampantom, kaisa talantia ho mule'uf Nai Yakub anbi ho molok.”

²⁵Anbi tabu nane Nai Yakub nahakeb nalali in um-ume anbi tubu mese. Ma anbi tubu nane in aon bian anbi pah nane amsa Nai Laban nok in atoni sin nahakeb sin um-ume.

²⁶Nalali onane te Nai Laban nak neu Nai Yakub nak, “Nansa' es hom fuli kau ma ho maen meki au anah sin, onle hom heke man atoni-atoni anbi makenat nanan?

²⁷Nansa' es hom fuli kau ma ho amnao amnes-amnes, ma kam toti fa fetin? Oni bati ho hem toti fetin, namneo of au ufetin ko hem nao nok malinat meki sit, sena ma heo'!

²⁸Ma hom kam fe kau fa sona he nati' au nek au anah sin ma au upuf sin anfani taka' mabatis es nok es. Namneo ho mo'et nane mono kun!

²⁹Au be'ik matanik nanokbon neu he mo'e maufinu neu ko, mes anbi fini fai i Uisneno le ho ama nabes neune namnaub kau he nati' kaisa au u'uab amle'ut neu ko.

³⁰Au uhin nak hom fen ma amnao nane natuin hom sali hem nao amfani. Mes nansa' es ho mubak meki fatu le'u le anpanat au ume nanan?”

³¹Oke te Nai Yakub in natae nak, “Au fen ma nao nok amnes-amnes natuin au umtausan ko Baba neu of ho ka mufetin ma ho anah sin.

³²Antom fatu le'u nane, leka ho mupeni anbi atoni mese anbi i in es nabak, of mumate in. Amtae nai, kaisa-kaisa au Baba ho mu'im es i. Kalu esan, so ho maiti nai. Ma maut he hit atoni-atoni sin nit ma ansaksi nani.” Nai Yakub in ka nahin fa neu bi Rahel es nabak fatu le'u nane.

³³Oke te Nai Laban antam neu Nai Yakub in um-ume ma anpukai; nalali te in nao neu bi Lea in um-ume, ma neu in ate bifenu nua sin, mes in ka napeni fa fatu le'u le nane. Anbi amunit in antam neu bi Rahel in um-ume.

³⁴Anbi tabu nane bi Rahel in naiti fatu le'u nane ma natam neu in peni bikase paha snaen in alun, ma in antok anbi peni nane in fafon. Nai Laban in anpukai bi Rahel in um-ume funam natef, mes in ka napeni fatu le'u nane.

³⁵Oke te bi Rahel nak neu in amaf nak, “Kaisa muto Ama, au ka fena hake fa he utef ko natuin au upeni funan.” Nai Laban in nami nok amnutu-mnutu, mes in ka napeni fatu le'u nane.

³⁶Es nane Nai Yakub in nato' ma in nak, “Amle'ut sa' ka es au mo'e ulali?” in natan nok nek maputu. “Au usanab sa' talantia Baba hom li'u kau?

³⁷Tabu le i, leka hom pukai mulali ale blua sin, ho mupeni blua le au Baba ho ini? Mupoitan blua nane nai ma amtao nai anbi i, he nati' au atoni sin ma Baba ho atoni sin nabe'i sin nit ma sin nafek neu sekau ka es namneo anbi hit nua kit.

³⁸Au umaika oke ko anbi ton bo'nua afinit. Pukan bibi kase ma bibi anpe' ma namfau piut ma au ka uah it fa bibi kase mese amsa na'ko Baba ho mu'it sin.

³⁹Le' anmate natuin meo asu anheke au ka eki fa neu ko Baba, mes au es a'sekan in. Le atoni nabak anbi manas ai fai Baba, ho museke kau he nati' au seka.

⁴⁰Manas anhoi kau piut anbi ne-neno ma mainikin in oe tene neu kau anbi fa-fai. Ma anbi hae-hae au ka nabe'i fa he tup amsa.

⁴¹Au monit onle' nane tabu au mepu anbi ko Baba anbi ton bo'nua in nanan. Anbi ton bo'es am ha in nanan au mepu he upeni au Baba ho anfeti sin nane — ma ton ne' anteni au upeni pukan bibi ma bibi kase nane. Ma anbi tabu nane amsa Baba ho muklelo' au upa' talantia haef bo'mese.

⁴²Oni bati au na'if sin Uisneno he ka naneo ma nahafo kau fa, esle' Nai Abraham ma Nai Ishak sin Uisneno, namneo Baba oni hom lenu kau ma au fani nok nim luman. Ma Uisneno antuntaku ma anpanat kau anbi au susat sin, ma mepu le au mepu ulali, ma anbi fini fai In anfe nalali In fekat.”

⁴³Oke te Nai Laban natae Nai Yakub nak, “Bife nua in nane au anah sin; ma sin anhin nane au ini sin, ma pukan bibi kase nane au ini sin. Namneo, ale sa' le ho mit anbi le i nane au ini. Mes au ka nabe'i fa he mo'e sa'-sa' he nati' au utau au anah ma au upuf sin.

⁴⁴Es nane te aum he hit atmo'e fef bela ma taketi fatu-fatu nane hen fani takaf neu fef bela nane.”

⁴⁵Nalali te Nai Yakub in naiti fatu mese ma nahakeb anfani fatu mnaut.

⁴⁶Oke te in anlenu in atoni-atoni nabuab fatu talantia anfani bata' nalali onane te sin nabua ma anbukae anhaumak fatu atupu nane.

⁴⁷Nai Laban nakanab fatu atupu nane Yegar-Sahaduta, mes Nai Yakub nakanab in nak Galed.

⁴⁸Nai Laban nak neu Nai Yakub nak, “Fatu atupu le i anfani mnaut neu hit nua kit.” Es nane bale nane nakanab nak Galed.

⁴⁹Nai Laban in namolok amsa nak, “So nati' UISNENO anpanat ma anpao kit anbi tabu hit atmoni maka'lon es nok es.” Es nane bale nane antek nani amsa nak Mizpa.

⁵⁰Nai Laban namolok anteni nak, “Kalu ho mo'e amle'ut neu au anah-anah sin ai ho mafe amteni bife bian, maski nak es ka nahin fa, mumnai nai, Uisneno In anpanat kit.

⁵¹Le i fatu-fatu le au tupu ulali sin, ma le i anfani fatu mnaut.

⁵²Leko fatu atupu le i, ma leko fatu mnaut nane namnauba kit nak au ka nabe'i fa he tanhai fatu atupu le i ma maken oke ko, ma ho amsa ka nabe'i fa hem tanhai fatu atupu le i ma fatu mnaut le i he maken mok kau.

⁵³Uisneno le Nai Abraham nabes neune ma le au ama Nai Nahor nabes neune of anfani alef lasi neu kit.” Oke te Nai Yakub ansup natuin Uisneno le Nai Ishak nabes neune he nati' natiab in han manta'en.

⁵⁴In anlolo mu'it mese ma in natulu nani anbi tubu nane in tunan. Oke te in anhone in atoni-atoni sin he nati' sin anbukae nabuan. Leka sin anbukae nalali sin antupan anbi tubu nane.

⁵⁵Anbi noka fa nok-noka, Nai Laban in nek in anah ma in upuf sin, ma in anfen sin tetus, oke te in nao anfani neu in balan.