Read Uab Meto KEJADIAN 35 Bible Online

KEJADIAN 35 - Uab Meto bible

KEJADIAN 35

¹Anbi neno mese Uisneno nak neu Nai Yakub nak, “Au le i Uisneno le Au ulil'ok neu ko leka ho maen mu'ko ho tataf Nau Esau. Amnao nai nok labah neu Betel. Mumaika anbi nena ma muhakeb baki tulu neu Kau.”

²Oke te Nai Yakub nak neu in ume nanan sin ma neu ale atoni le nok in nak, “Hit of atfen ma atpoi ta'ko bale le i ma atnao neu Betel. Au of uhakeb baki tulu mese neu Uisneno le antuntaku nalali kau anbi tabu au tam anbi nukat ma le' naneo ma nahafo kau leka au nao bi me-me. Es nane te ampolin nai fatu le'u ma hau le'u atoni mata teme; ma miknino hi aom ma ampake nai blua aknino.”

⁴Oke te sin nana'at nani neu Nai Yakub ale fatu le'u ma hau le'u atoni mata teme le anbi sin ma sin falo sin. Ale blua nane Nai Yakub ansub sin anbi hau naek in anhaumak nok kot Sikhem.

⁵Anbi tabu Nai Yakub nok in ume nanan sin anfen ma nao, Uisneno antao nekaf amtaus neu ale atokos anbi kot-kot anaek nane, talantia sin kan li'u natuin fa Nai Yakub nok in ume nanan sin.

⁶Oke te sin antia pah Kanaan anbi kot Betel le anbi ahunut in kanan Lus.

⁷Anbi nane Nai Yakub nahakeb baki tulu ma nakanab bale nane “El-Betel”, natuin anbi nane Uisneno nalil'on nalali neu in anbi tabu in naen na'ko in tataf.

⁸Anbi nane amsa bi Debora, bi Rahel in ainaf apafa, in anmate oke te ansub in anbi hau naek in un anbi kot nane in kabenan li. Es nane te hau naek nane nakanab nak “Hau kulut kaet.”

⁹Leka Nai Yakub anfani nem na'ko Mesopotamia, Uisneno nalil'on anteni neu in ma anfe tetus neu in.

¹⁰Uisneno nakua a'an nak, “Ho of kan tek anteni ko fa nak Nai Yakub, mes Israel.” Onle nane Uisneno nakanab in Israel.

¹¹Oke te Uisneno nakua a'an anteni nak, “Au le i Uisneno Akuasat Afin-finit. So nati' pe' ma mumfau nai! Ho of musufan uf-uf ma amfani am uf neu usif-usif.

¹²Pah le Au fe ulali neu Nai Abraham ma Nai Ishak, of Au fe ani neu ko ma neu ho sufam.”

¹³Oke onane te Uisneno nasaitan Nai Yakub.

¹⁴Anbi bale le Uisneno namolok neu Nai Yakub nane, in nahakeb fatu mnaut mese. Oke te in natulu fatu nane neu Uisneno ma in an op tua min kase ma mina bub fua mina anbi in fafon.

¹⁵In nakanab bale nane “Betel”.

¹⁶Oke te Nai Yakub nok in ume nanan sin nasaitan Betel. Leka sin fe na'lo na'ko Efrata, bi Rahel in tabu antia neu he nahoni. Mes bi Rahel nahonis li'ana nane nok susal.

¹⁷Leka men mahonit nane antu'an ma nao piut, apalolit nane nak neune nak, “Mumepan ho nekam, Rahel, ho anah nane li'anmone anteni.”

¹⁸Mes bi Rahel anhaumak he naeku nok in tabu maten, ma anbi tabu in he napoitan nafinib in asnasan amsoput, in nakanab li'ana nane Ben-Oni mes in amaf nakanab in nak Benyamin.

¹⁹Leka bi Rahel in uan namsopu nalali, ansub in anbi lanan anao neu Efrata in ninen, le' tabu i in kanan Betlehem.

²⁰Nai Yakub nahakeb fatu mnaut anbi bale nane, ma antia neno le i amsa fatu nane in anfani fatu takaf neu bi Rahel in naukel.

²¹Nalali te Nai Yakub in nao piut, ma in nahakeb in um-ume anbi bale mese anao anfinin fatu Elak Eder.

²²Leka' sin fe anbin bale nane Nai Ruben antup nabua nok bi Bilha, in amaf in ate. Nai Yakub in nen lasi nane, talantia in nato' nae le'uf kun. Nai Yakub in anmu'i li'anmone bo'es am nua.

²³Bi Lea in anah sin esle' Nai Ruben (Nai Yakub in anmone nael), Nai Simeon, Nai Lewi, Nai Yehuda, Nai Isakhar, ma Nai Zebulon.

²⁴Bi Rahel in anah sin esle' Nai Yusuf ma Nai Benyamin.

²⁵Bi Bilha bi Rahel in ate in anah sin esle' Nai Dan ma Nai Naftali.

²⁶Bi Lea in ate bi Zilpa in anah sin esle' Nai Gad ma Nai Asyer. Li'ana-li'ana le nane nahonis sin anbi Mesopotamia.

²⁷Oke te Nai Yakub in nem antia in amaf Nai Ishak, anbi Mamre anhaumak Hebron bale in natua anbine. (Anbi ahunut Nai Abraham sin na'if natua anbi nane amsa.)

²⁸Nai Ishak in ua mnutu kun, es in amoni nan ton 180, oke te in anmate nalali te Nai Esau ma Nai Yakub, in anah sin ansub in.