Read Uab Meto KEJADIAN 36 Bible Online

KEJADIAN 36 - Uab Meto bible

KEJADIAN 36

¹Le i Nai Esau le nakanab in nak Edom in sufan.

²Nai Esau in anmafe nok bife tenu na'ko Kanaan, esle': bi Ada, Nai Elon atoni Het nane in anah; bi Oholibama, Nai Ana in anah ma Nai Zibeon atoni Hewi upuf;

³bi Basmat, Nai Ismael anah ma Nai Nebayot in olif.

⁴Bi Ada nahonis Nai Elifas, bi Basmat nahonis Nai Rehuel,

⁵ma bi Oholibama nahonis Nai Yeus, Nai Yaelam ma Nai Korah. Li'ana-li'ana nane nahonis sin anbi Kanaan.

⁶Namuni te Nai Esau in nao nasaitan Nai Yakub ma in nao neu pah bian nok in fenai sin, in anah sin ma ale atoni le' anbi in ume nanan, nok ale in mu'it sin ma in amaus le in napeni sin anbi Kanaan.

⁷Nai Esau anbatison na'ko Nai Yakub natuin sin amaus nane amfau le'uf talantia sin ka nabe'i fa sin hen moni nabua. Nansa' anteni pah le sin namaika anbine kan mu'i fa amnahat neu sin mu'it le amfaun nane.

⁸Nai Esau le nakanab in nak Edom, in namaika nabalah anbi pah tubu Seir.

⁹Le' i Nai Esau in sufan, le anfani atoni Edom sin na'if.

¹⁰Nai Esau in fenai le in kanan bi Ada in nahonis li'anmone mese, in kanan Nai Elifas. Ma Nai Elifas nahonis li'anmone nim, esle': Nai T'eman, Nai Omar, Nai Zefo, Nai Gaetam ma Nai Kenas. Nai Elifas in ate kanan bi Timna. In nahonis li'anmone mese in kanan Nai Amalek. Nai Esau in fenai le in kanan bi Basmat nahonis li'anmone mese kanan Nai Rehuel. Ma Nai Rehuel nahonis li'anmone ha, esle': Nai Nahat, Nai Zerah, Nai Syama ma Nai Miza.

¹⁴Nai Esau le in kana bi Oholibama, esle' Nai Ana in anah ma Nai Zibeon in upuf, nahonis li'anmone tenu, esle': Nai Yeus, Nai Yaelam ma Nai Korah.

¹⁵Le' i nakaf neu nonot Nai Esau sufan: Nai Elifas, Nai Esau in anmone nael, anfani na'if neu nonot le i: T'eman, Omar, Zefo, Kenas,

¹⁶Korah, Gaetam ma Amalek. Sin alsin nane bi Ada, Nai Esau in fenai sufan.

¹⁷Nai Rehuel, Nai Esau anah, anfani na'if neu uf-uf: Nai Nahat, Nai Zerah, Nai Syama, ma Nai Miza. Sin alsin nane bi Basmat Nai Esau in fenai sufan.

¹⁸Uf-uf le i anteni Nai Esau nok in fenai bi Oholibama Nai Ana anah in sufan, esle': Nai Yeus, Nai Yaelam, ma Nai Korah.

¹⁹Ale uf-uf le i Nai Esau in sufan.

²⁰Pah tuaf anbi Edom anbation anfani uf-uf na'ko Seir, atoni Hori. Uf-uf nane esle': Lotan, Syobal, Zibeon, Ana, Disyon, Ezer ma Disyan.

²²Lotan nane anfani na'if Hori ma Heman. (Nai Lotan in fetof, es bi Timna.)

²³Syobal nane anfani na'if neu uf: Alwan, Manahat, Ebal, Syefo ma Onam.

²⁴Zibeon in anmone sin nua esle' Nai Aya ma Nai Ana. (Nai Ana le i es napeni oe mata maputu anbi pah snaen, anbi tabu in natuku in amaf in bikase luke mnanu sin.)

²⁵Nai Ana nane Nai Disyon in amaf le anfani na'if neu uf: Hemdan, Esyban, Yitran ma Keran. Nai Ana in anmu'i li'anfeto mese in kanan bi Oholibama.

²⁷Nai Ezer anfani na'if neu uf: Bilhan, Zaawan, ma Akan.

²⁸Nai Disyan anfani na'if neu uf Us ma Aran.

²⁹Le i uf-uf Hori anbi pah Edom: Lotan, Syobal, Zibeon, Ana, Disyon, Ezer ma Disyan.

³¹Nahun na'ko fe kan mu'i fa kesel le he naplenat anbi Israel, kesel sin le i naplenat anbi pah Edom maseka es nok es: Nai Bela Nai Beor in anah na'ko Dinhaba. Nai Yobab Nai Zera in anah na'ko Bozra. Nai Husyam na'ko pah Teman. Nai Hadad Nai Bedad in anah na'ko Awit (in es anbe'u atoni Midian anbi makenat anbi pah Moab). Nai Samla na'ko Masreka. Nai Saul na'ko Rehobot anbi noe ninen. Nai Baal-Hanan Nai Akhbor in anah. Nai Hadar na'ko Pahu (in fenai kanan bi Mehetabeel, Nai Matred in anah ma Nai Mezahab in upuf).

⁴⁰Nai Esau anfani na'if neu uf-uf Edom le i anteni: Timna, Alwa, Yetet, Oholibama, Ela, Pinon, Kenas, T'eman, Mibzar, Magdiel, ma Iram. Uf mese-mese nakanab in pah neki in kanan neu bala le in namaika anbine.