Read Uab Meto KEJADIAN 37 Bible Online

KEJADIAN 37 - Uab Meto bible

KEJADIAN 37

¹Nai Yakub natua nabalah anbi pah Kanaan, bale in amaf natua anbine,

²ma le i lasi monit na'ko Nai Yakub in ume nanan: Nai Yakub in anah Nai Yusuf leka in nan ton bo'es am hitu, in natuku pukan bibi kase nok in tataf sin esle': bi Bilha ma Zilpa, in amaf in ate sin nua sin anah. In natonan in amaf neu mo'et-mo'et le in tataf sin anmo'e.

³Nai Yakub in nek nanesin Nai Yusuf na'ko in tataf-tataf bian, natuin nahonis Nai Yusuf, leka in amaf namnasi nalali. Anbi neno mese in anmo'e sobalu betkone amasat mese neu Nai Yusuf.

⁴Leka Nai Yusuf in tataf sin ankiso nak sin amaf in nek anesin Nai Yusuf na'ko sin, sin anek nanan Nai Yusuf, talantia sin molok ka naleko anteni fa nok in.

⁵Nai Yusuf in nanai anbi fai mese, ma leka in an etun in nanai nane neu in tataf sin, sin anek nanan nane ansaton piut neu in.

⁶Nai Yusuf nak neu sin nak, “Aiti hi mitnin!

⁷Au unanai nak hit alakit atfutu ane kase anbi lene, oke te au ane kase anhake namnanu. Hi ane kase sin anfun natef nan au ane kase oke te sin naluli nabes neu in.”

⁸“Anbi ho tenab ho of amfani kesel ma muplenat kai ka?” in tataf sin nabokan in. Oke te sin nek nanan in piut anmatom nok in nanait-nanait sin le nane ma anmatom nok sa' le in naton nalali.

⁹Namuni te Nai Yusuf nanai anteni, ma in nak neu in tataf sin nak, “Au unanai ateni, au kiso it manas, funan ma afkun bo'es am mese naluli nabes neu kau.”

¹⁰Nanait nane in natonan in amaf amsa, ma in amaf nabokan in, nak, “Nanai sa' esle' nane? Oni anbi ho tenab au, ho aina ma ho biaf sin of hai miluli mibes neu ko ka?”

¹¹Nai Yusuf in tataf sin nek menan in, mes in amaf natenab nanait nane piut.

¹²Anbi neno mese leka Nai Yusuf in tataf sin nao neu Sikhem he natuku sin amaf in pukan bibi kase sin,

¹³Nai Yakub nak neu Nai Yusuf nak, “Amnao nai neu Sikhem, bale ho tataf sin natuku hit bibi kase sin,” Nai Yusuf natae nak, “Leko, Ama.”

¹⁴In amaf nak, “Amkiso mit fa ho tataf sin ma pukan bibi kase sin, oke te amfain aum he muton neu kau.” Nalali te in nafetin Nai Yusuf anao nasaitan Anonof Hebron. Ka lo fa onane te Nai Yusuf in antia Sikhem.

¹⁵Leka in fe naoin-oinson anbi mnela, in naeku nok atoni mese le natoti in nak, “Ho mami sa' ka?”

¹⁶“Au tataf sin. Sin natuku pukan bibi kase,” Nai Yusuf in natae, “Ama ai ho muhin sin eseun bale me ka?”

¹⁷Atoni nane nak, “Sin anfen ma sin nao nalali na'ko bale le i. Au nen sin nak sin he nao neu Dotan.” Oke te Nai Yusuf in nao natuin in tataf sin ma in naeku nok sin anbi Dotan.

¹⁸Sin nit nalali Nai Yusuf na'ko lo, ma leka in fe ka nem antia fa sin, sin namolok nafek nalali he namate in.

¹⁹Ma sin nak es neu es nak, “Amkiso nai, ananait nane in nem.

²⁰So hit tamate in ma atpolin in nitun nane neu oe mata in nanan le anmeto nalali. Nati' hit taton taka' mu'i fui es anpisu in. Ma hit atkiso in nanait sin nane of anbol onme.”

²¹Nai Ruben in neu sin salit nane, oke te in nami lanan he nafetin Nai Yusuf. In nak, “Kaisa tamate in.”

²²“Hit atpolin tatam in neu oe mata anbi pah asnaen le i, mes kaisa hit atepo ai tapapa in.” In namolok onane natuin in ansali he nafetin Nai Yusuf ma anlenu in hen fani neu ume.

²³Leka Nai Yusuf in nem antia in tataf sin, nok nek maputu sin ankasu Nai Yusuf in sobalu betkone amasat le nane.

²⁴Oke te sin ankini in ma anpolin natam in neu oe mata le anmeto nalali.

²⁵Leka sin fe anbukae, nok askeken sin ankiso nit atoni Ismael sin pukan mese le sin nem na'ko Gilead he nao neu Mesir. Sin nasaeb min fomeni ma klali neu sin bikase pah asnaen sin.

²⁶Oke te Nai Yehuda nak neu in biafin nak, “Maota sa' neu hit tamate hit olif ma hit ta'tolo lasi malolot nane?

²⁷Aim he hit tasosa in neu atoni Ismael nane. Kaisa hit tamenab in. Maski onme amsa in le nane hit olif kun.” In biafin anlomi natuin,

²⁸ma leka atoni asosa Midian sin fauk-fauk anfinin, Nai Yusuf in tataf sin napoitan in na'ko oe mata ma nasosa in neu atoni Ismael nane nok in upan noni muti bo'nua. Nalali te atoni asosat sin nane neki in neu Mesir.

²⁹Leka Nei Ruben nem neu oe mata nane in ka naeku nok fa Nai Yusuf anbi nane, in anpisu blua pake sin natuin in nekan antu'.

³⁰In nao anfani neu in biafin ma in nak, “Li'ana nane ka tite fa anteni anbi nane! Tabu le i of au he mo'e sa' ka?”

³¹Oke te sin anlolo bibi mese ma sin anlep Nai Yusuf in sobalu betkone neu bibi nane in na'.

³²Nalali te sin anlenu neki sobalu betkone nane neu sin amaf nok han ba'an nak, “Hai mieku sobalu betkone le i. Le i Ama ho anah in-ini ka?”

³³Nai Yakub nahin sobalu batkone nane, ma in nak, “Namneo, au anah in sobalu betkone esle' i! Namneo mu'i fui anpisu nalali in. Mu'it nane anpisu ma namate nalali au anah Nai Yusuf!”

³⁴Nai Yakub anpisu in blua pake sin natuin in nekan antu', ma in nakiu blua pake kulut kaet. Ma in ankul ma ankae neu in anah anbi neno fauk-fauk in nanan.

³⁵Ale in anah sin leko li'mone ma li'feto sin nem hen halin in mes in kan lomi fa hen simo halinat nane. In nak, “Talantia au mate of au kae piut neu au anah.” Onle nane in ankae ma ankul piut natuin Nai Yusuf in anah nane.

³⁶Mes anbi tabu nane amsa, anbi Mesir, atoni-atoni Midian sin nasosa nalali Nai Yusuf neu Nai Potifar, meo nakaf mese na'ko kesel le anfani nakaf neu ale apaot anbi kesel in sonaf.