Read Uab Meto KEJADIAN 38 Bible Online

KEJADIAN 38 - Uab Meto bible

KEJADIAN 38

¹Oin anbi leku nane Nai Yehuda nasaitan in biafin ma natua nabua nok Nai Hira, atoni mese na'ko kot Adulam.

²Anbi bale nane Nai Yehuda anmahine nok li'feto Kanaan mese, Nai Sua in anah, oke te in anmafe nokan.

³Sin anah ahunut li'mone, in amaf nakanab Nai Er.

⁴Li'ana no nua li'mone amsa, nakanab in Nai Onan.

⁵Li'ana no tenu li'mone amsa, nakanab in Nai Syela. Leka nahonis Nai Syela Nai Yehuda in anbi Kezib.

⁶Nai Yehuda anmafeb Nai Er, in anmone nae nane nok bi Tamar.

⁷Nai Er in monin nane maufinu naek kun, talantia UISNENO nato'an in ma namate in.

⁸Oke te Nai Yehuda nak neu Nai Onan Nai Er in olif, nak, “Hom nao nai neu ho tataf in fe banu nane, ma amtup mubua mok in. Mutis ho salit mok in, natuin olif na'ko in mone es ho; nok nane ho tataf of napeni in sufan.”

⁹Mes Nai Onan in nahin nak in anah sin le nane of kan fani fa in-ini. Es nane te, anbi leku in antup nabua nok in tataf in fe banu nane, in nafetin in onen nane nat'op anbi mone he nati' in tataf kaisa napeni sufa ka'uf.

¹⁰In mo'et nane nato'ab UISNENO, ma UISNENO namate in amsa.

¹¹Nalali te Nai Yehuda nak neu bi Tamar in nanef nane nak, “Amfani nai neu ho ama in ume mumaika ambi nane amfani on bife banu ampao talantia au anah Nai Syela in nanae.” In namolok onle nane natuin in namtau kaisa-kaisa UISNENO namate Nai Syela amsa, onle in tataf sin nua sin. Es nane te bi Tamar in nao anfai neu in amaf in ume.

¹²Anbi leku fauk namuni onane te Nai Yehuda in fenai anmate. Leka tabu kulut kaet nane na msopu Nai Yehuda in fenai anmate. Nai Hira, in soba na'ko Adulam nane, sin nao neu Timna, bale ankateli in bibi kase sin funun.

¹³Bi Tamar napeni hanaf nak in babaf nane of nem neu Timna hen kateli in bibi kase sin funun.

¹⁴Es nane te in anseka in blua pake banu sin neki blua pake bian. In an amu in human neki obet, oke te in antoko anbi kot Enaim in eno naek, le anbi lanan nao neu Timna. Bi Tamar nahin nok amneot nak Nai Syela, Nai Yehuda in anmone kliko, in nanae nalali, mes in fe kan mamone fa nok atoni munif nane.

¹⁵Leka Nai Yehuda in kiso nit bi Tamar, in nak oin bife amapaisa mese, natuin in nasaklub nan in human.

¹⁶Oke te Nai Yehuda anhaumak in anbi lanan nane in ninen, ma nak neune nak, “Ho hem toti fauk ka?” Fun in ka nahin fa nak bife nane in nanef kun. Bi Tamar natae nak, “Neu et kun ho Usi.”

¹⁷Nai Yehuda namolok anteni nak, “Of au fe neu ko bibi tipu' mese.” Bi Tamar natae nak, “Leko, alkun anmu'i sa' es ho mubelak anfani mafutus, talantia au Usi hom sonu kau bibi nane.”

¹⁸“Mafutus sa'?” Nai Yehuda in natoti. Bi Tamar natae nak, “Amfe kau Usi ho taka plenat nok in tani ma tias le anbi Usi ho nimam.” Nai Yehuda anfe ale blua nane neune, oke te sin antup nabua, ma bi Tamar in naapu.

¹⁹Bi Tamar in nao anfani neu in ume ma in ankasu nani pilu le an amu in human, oke te in anpake nafani in blua pake bife banu anteni.

²⁰Anbi leku fauk namuni te Nai Yehuda anlenu Nai Hira, in soba, he nao hen fe bibi nane ma antoti nafani ale blua le anfe nalali sin on mafutus, mes Nai Hira ka naeku nok fa bife nane.

²¹Nai Hira natoti neu atoni-atoni anbi Enaim nak, “Bife amapaisa le antoko ma anpao anbi lanan ninen nane in es me ka?” Sin natae nak, “Kan mu'i fa amapaisa anbi i.”

²²Oke te Nai Hira in nao anfani neu Nai Yehuda ma in nak, “Au ka u'eku oke fa bife nane. Atoni-atoni anbi nane sin nak anbi nane kan mu'i fa bife amapaisa.”

²³Nai Yehuda nak, “Maut he ale blua nane in anpal sin, alkun kaisa hit tamaebok. Au amu ulali he nati' a'baen in, mes ho ka mueko mok fa in.”

²⁴Oin funan tenu namuni onane te Nai Yehuda napeni hanaf nak bi Tamar in nanef nane anfani bife amapaisa ma in naapu nalali. Oke te Nai Yehuda naplenat nak, “Amheke in ma motu in talantia anmate!”

²⁵Leka fe neki bi Tamar anpoi, in ansonu hanaf neu in babaf, nak, “Atoni le nana'at ale in blua sin le i es naapub kau. So amtae nai sekau in takaf plenat nok in tani ma tias esle' i.”

²⁶Nai Yehuda nahin ale blua nane ma in nak, “Bife nane ka nasanab fa. Au es ka utisi fa au sutais neu in; namneo so au he mamoneb in nok au anah Nai Syela.” Nai Yehuda in ka nabua anteni fa nok bi Tamar.

²⁷Leka tabu antia neu bi Tamar he nahoni, in nahonis ankuan li'ana nua.

²⁸Leka in fe nahoni li'ana es napoitan in niman, oke te apalolit anfutun ab me' neu in niman. In nak, “Li'ana le i anpoi nahun.”

²⁹Mes li'ana nane anhel nafani in niman, ma li'ana es anteni es anpoi nahun. Namuni te apalolit nane nak, “Kaisa ho musik hem poi muhun onane!” Es nane te li'ana le nahonis nahunun nane nakanab in Nai Peres.

³⁰Nalali onane te nahonis in olif le anfutu in niman neki ab me'. Nakanab in Nai Zerah.