Read Uab Meto KEJADIAN 39 Bible Online

KEJADIAN 39 - Uab Meto bible

KEJADIAN 39

¹Atoni-atoni Ismael nane sin neki nalali Nai Yusuf neu pah Mesir, ma nasosa in Nai Potifar, kesel in meo pa'e le anfani nakaf neu ale apao sonaf sin.

²UISNENO antuntaku Nai Yusuf talantia anbi ale in mepu in napeni in nesan. In namaika anbi usif, atoni Mesir nane in ume.

³In usif nane nit nak UISNENO antuntaku Nai Yusuf ma es nane te in mepu sin manesa.

⁴Nai Potifar anmalines Nai Yusuf ma in naiti in anfani in atuthaes; ma in anfe kuasat neu Nai Yusuf hen painote in ume nanan ma ale in amaus.

⁵Naubon na'ko leku nane, natuin Nai Yusuf, UISNENO in anfe In athoe neno neu atoni Mesir sin ume nanan ma neu ale sa' le sin anmu'i, leko le anbi ume ma le anbi lene.

⁶Ale sa' le anfani Nai Potifar in-ini in nana'at nani neu Nai Yusuf. Nok nane te Nai Potifar in ka namnau anteni fa hen painote in ume nanan, alkun in bukae anmes. Nai Yusuf in naleko ma namas kun.

⁷Anbi leku fauk namuni te, Nai Potifar in fenai ansinmakan Nai Yusuf, oke te in anpaisa atoni munif nane hen tup nabua nok in.

⁸Nai Yusuf kan lomi fa ma nak neune nak, “Kaisa, ain, au usif Nai Potifar nana'at nalali ale in amu'in nane neu kau. In ka natenab anteni fa sa'-sa' neu ume le i.

⁹Au kuasat nane namnes nok in kuasat. Kau mu'i anteni fa sa' le in ka nana'at fa neu kau alkun ho Aina. Nansa' es au he mo'e taos amle'ut le nane ma mo'e sanat neu Uisneno?”

¹⁰Maski nak Nai Potifar in fenai anfuli Nai Yusuf neno-neno, mes atoni munif nane kan lomi fa hen tup nabua nok in.

¹¹Anbi neno mese leka Nai Yusuf antam neu ume nanan he nanaoba in mepu, mes kan mu'i fa es amsa anbi nane.

¹²Nai Potifar in fenai anhel Nai Yusuf neu sobalu bet kone ma in nak, “Aum he hit atup tabua.” Nai Yusuf anfikol nani ma nafetnon, oke te in naen anpoi, mes in sobalu bet kone nane nabalah anbi bife nane in niman.

¹³Leka Nai Potifar in fenai ankiso nak Nai Yusuf in naen nalali in sobalu betkone nabalah,

¹⁴in no'en ale atuthaes sin ma namolok neu sin nak, “Aiti him kiso! Atoni Ibrani le au mone neki neu ume le i, in nanebet kit. In antam neu au ke'an ma he nale'un kau, mes au hunun uhel-helnok.

¹⁵Leka in anen au han hunun nane, in naen anpoi ma in sobalu betkone nabalah.”

¹⁶Oke te Nai Potifar in fenai nabelak sobalu betkone nane talantia in mone anfani nem.

¹⁷Leka in mone anfain nem, nok labah in naton lasi nane neune, nak, “Atoni Ibrani le ho meki nem nane, in antam neu au ke'an he namaeb kau.

¹⁸Mes leka in nen neu au hunun in naen anpoi ma in sobalu betkone nabalah.”

¹⁹Nai Potifar in nato' nae le'uf.

²⁰Ma in anfe plenat he nati' anheke Nai Yusuf nok manoe ma natam in neu o'of, bale anheke ma natam usif sin anbine.

²¹Mes UISNENO antuntaku Nai Yusuf ma an nek in piut, talantia nakaf anbi o'of nane anlomi in.

²²In nana'at atoni o'of sin bian nane neu Nai Yusuf ma Nai Yusuf es anfani asutais neu ale mepu anbi o'of nane in nanan.

²³Nakaf anbi ume o'of nane kan panat anteni fa ale sa' le nana'at nalali neu Nai Yusuf, natuin UISNENO anbab in talantia ale in mepu nane anmu'i in nesan.