Read Uab Meto KEJADIAN 4 Bible Online

KEJADIAN 4 - Uab Meto bible

KEJADIAN 4

¹Namuni onane te Nai Adam nabua nok bi Hawa, in fenai, ma bife nane in naapu. In nahonis li'anmone mese ma in namolok nak, “Nok UISNENO In matakun au upeni li'anmone mese.” Es nane te in nakanab li'ana nane Nai Kain.

²Oke te bi Hawa nahonis anteni li'anmone mese, in kanan Nai Habel. Nai Habel nane anfani atukus bibi kase, mes Nai Kain anfani amepu lene.

³Anbi neno fauk namuni te Nai Kain naiti kle'o na'ko in lene in afan ma natulu nani neu UISNENO.

⁴Ma Nai Habel naiti bibi kase mese in ana' le nahonis nahunun, in anlolo in, ma in natulu pa' alekot abainesit neu UISNENO. UISNENO anmalin neu Nai Habel ma in fua tulu,

⁵mes In antite Nai Kain nok in fua tulu. Nai Kain in nato' nae le'uf, ma in human anputu.

⁶Es nane te UISNENO namolok neu Nai Kain nak, “Nansa' ho muto'? Nansa' ho humam anputu?

⁷Kalu ho mo'e alekot, namneo of hom huma mo'e; mes kalu ho mo'e amle'ut, es nane te sanat anpao ko hen tam neu ho nekam nanan. Sanat hen kuas ho aom, mes of ho hem be'u mani.”

⁸Oke te Nai Kain nak neu Habel, in olif nak, “Aum het nao teu lene.” Leka sin antia bale nane, Nai Kain antepo ma namate in olif Nai Habel.

⁹UISNENO natan Nai Kain nak, “Ho olif, Nai Habel, esme ka?” Nai Kain natae nak, “Au ka uhin fa. Ai au he fani apaot neu au olif?”

¹⁰Oke te UISNENO namolok nak, “Nansa' es ho mo'e lasi le neki amtaus nane? Ho olif in na' ansanane neu Kau na'ko afu in nanan, onle hanaf le ansakoi ma antoti seunbanin.

¹¹Sukat neu ko, talantia of ho kam painote amteni afu. Afu le anmusi ho olif in na', in onle anfai in fefan hen simo ho olif in na' anbi tabu le ho mumate in.

¹²Leka hom sen ma amlua, afu of ka napoitan fa sa'-sa'; ma of hom fani atoni anaot le kan mu'i fa bale maika anbi pah pinan.”

¹³Es nane te Nai Kain namolok neu UISNENO nak, “Kasat nane ma'fen le'uf kun, ma au ka sutai ube'i fa.

¹⁴Ho mupoitan kau na'ko afu le i, ma u'lo u'ko Ho humam Ho matam. Of au fani anaot le kan mu'i fa bale maika anbi pah pinan, ma sekau am sekau le au u'eku okan of namate kau.”

¹⁵Mes UISNENO namolok nak, “Kahaf. Kalu sekau namate ko, anfani on in seunbanin, atoni sin ta'uf hitu nok atoni le namate ko nane, of mamate amsa.” Nalali te UISNENO antao nani takaf neu Nai Kain he nati' sekau am sekau le naeku nokan kaisa namate in.

¹⁶Oke te Nai Kain in nao na'ko UISNENO In human In matan ma namaika anbi pah mese le antek nak, “Anaot” anbi Eden in aon neno saen.

¹⁷Nai Kain nok in fenai sin nahoni li'anmone mese, ma sin nakanab Nai Henokh. Namuni onane te Nai Kain nahakeb kot mese ma nakanab kot le nane natuin in anah kanan.

¹⁸Nai Henokh anfani amaf neu Nai Irad. Nai Irad anfani amaf neu Nai Mehuyael. Nai Mehuyael anfani amaf neu Nai Matusael, ma Nai Metusael anfani amaf neu Nai Lamekh.

¹⁹Nai Lamekh in fenainu sin nua esle' bi Ada ma bi Zila.

²⁰Bi Ada nahonis Nai Yabal, ma Nai Yabal in sufan le nane anfani uf le anpanat ma natuku mu'it ma namaika anbi um-ume in nanan.

²¹In olif kanan Nai Yubal, na'ko Nai Yubal in sufan es na'bae heo ma feku.

²²Bi Zila nahonis Nai Tubal-Kain, ma in sufan nane es anmo'e ale blua, na'ko niti molo ma besi. Nai Tubal-Kain in olif feto kanan bi Naama.

²³Nai Lamekh namolok neu in fenai sin nua sin nak, “Ada ma Zila, amnen ma mitnin nai! Au umate atoni munif mese natuin in anmaban nok kau.

²⁴Kalu namate atoni hitu anfani seunbanin neu namate Nai Kain, es nane te of namate atoni bo'hitu ma hitu leka' kalu namate kau.”

²⁵Nai Adam nok in fenai sin napeni anteni li'anmone mese. Bi Hawa namolok nak, “Uisneno anfe neu kau li'anmone mese anfani aseka neu Nai Habel, le Nai Kain namate nalali in.” Es nane te bi Hawa nakanab li'ana nane Nai Set.

²⁶Nai Set napeni li'anmone mese ma nakanab in Nai Enos. Anbi eti ma tabu nane atoni anfatan luli-besa ma antek UISNENO In kanan.