Read Uab Meto KEJADIAN 40 Bible Online

KEJADIAN 40 - Uab Meto bible

KEJADIAN 40

¹Tabu fauk namuni na'ko nane te kesel Mesir in atuthaes sin, esle' atuthaes tua min kase ma atuthaes utunu', sin anmo'e sanat neu sin kesel.

²Es nane te kesel in nato'an in ate atuthaes nua sin,

³oke te natam sin neu o'of anbi nakaf apao sonaf in ume, anbi bale Nai Yusuf antam anbine.

⁴Natam sin anbi o'of le nane lo amsa, ma nakaf apao sonaf nane nana'at sin neu Nai Yusuf he anti antuthae sin.

⁵Anbi fai mese atuthaes mninut ma atuthaes utunu' nane es-es napeni nanait. Ma sin nanait nane in oten ka namnes fa.

⁶Anbi nokfa fe nok-noka leka Nai Yusuf nem neu sin, in ankiso te sin nasusbok.

⁷Oke te in natan sin nak, “Nansa' au ba'e ki anbi neno le i hi misusbom?”

⁸Sin natae nak, “Anbi fai i hai minanai, ma kan mu'i fa esle' nahin in oten.” Nai Yusuf nak, “Al Uisneno kun es anfe sona neu atoni he anti ansefi nanait nane in oten. Aiti muton mit ho nanait le nane.”

⁹Atuthaes mninut tua min kase nane nak, “Anbi nanait nane au it anmu'i tua min kase anbi au matak.

¹⁰Hau le nane anmu'i tlaef tenu. Leka nof fe anpoi anbi in tlaef sin nane, in sufan amsa anpe', ma in fuan sin namnatu.

¹¹Anbi tabu nane au fe na' kesel in klas noni mninut, oke te au aiti tua min kase nane in fuan ma au aes neu kesel in klas mninut in nanan, nalali te au ubalab neu kesel.”

¹²Nai Yusuf nak, “In sefin esle' i: Tlaef tenu nane in oten esle' neno tenu.

¹³Anbi neno tenu le i in nanan kesel of nafetin ko, in of ansako ho sanat sin, ma in of nafani ko neu ho toko ahunut. Ho of muloitan klas mninut neu kesel onle afi ahunut.

¹⁴Mes mumnau kau leka ho monim naleko. Ambab kau he muton au lasi le i neu kesel, he nati' nafetin kau na'ko o'of le i.

¹⁵Natuin, namneo anbi afi unun neki kau na'ko atoni Ibrani sin pah ma anbi i amsa, anbi Mesir le i, au ka mo'e fa amle'ut sa' es amsa talantia natam kau neu o'of in nanan.”

¹⁶Leka atuthaes utunu' nane in an nen nak atuthaes mninut nane in nanai oten naleko in amsa nak neu Nai Yusuf nak, “Au unanai amsa, au su utunu' aba tenu anbi au nakak.

¹⁷Anbi aba le anbi fafon in nanan anmu'i bukae huma-huma neu kesel, ma kolo-kolo sin nem nah nani bukae nane.”

¹⁸Nai Yusuf natae nak, “Nanait nane in sefin esle' i: Aba tenu nane in oten esle' neno tenu.

¹⁹Anbi neno tenu le i in nanan kesel of anlenu atoni ma an ote ho nakam ma naboni ho nitum nane anbi ni, ma kolo-kolo sin of nah nani ho nesam.”

²⁰Anbi neno tenu namuni anma tom nok kesel in neno mahonit, in anmo'e fesat anaek neu in ameput sin. In naplenat he nati' napoitan atuthaes mninut ma utunu' nane na'ko o'of ma neki sin neu ale ameput anbi sonaf sin matan.

²¹Atuthaes mninut nane nafani in neu in toko ahunut.

²²Mes atuthaes utunu' nane sin namate in, Ale lasi nane anbol namnes nok sa' le Nai Yusuf naton nalali.

²³Mes atuthaes mninut nane in ka namnau anteni fa Nai Yusuf. Fun in anikan nalali in.