Read Uab Meto KEJADIAN 41 Bible Online

KEJADIAN 41 - Uab Meto bible

KEJADIAN 41

¹Leka ton nua anfini onane, kesel Mesir nananai, nak in anhake anbi Noe Nil in ninen.

²Nok askeken bijae hitu le anpokan ma sin aokin naliman, anpoi na'ko noe le nane ma sin nekun hun anbi noe nane in ninen.

³Namuni te bijae hitu anbol anteni amsa; mu'it-mu'it nane sin anmeton ma alkun pasu es an amu mu'if-mu'if sin. Bijae-bijae ametos nane anhake anbi bijae apokat sin aon bian, anbi noe nane in ninen.

⁴Namuni te bijae-bijae ametos nane an ol nan bijae-bijae apokat sin. Oke onane te kesel anfen na'ko in tupas.

⁵Namuni te in antup ma in nananai anteni. Anbi in nanait in nit ane kase pune hitu le manesa ma namnatu anpoi na'ko tlaef mese.

⁶Namuni te ane kase pune hitu anpoi anteni, le an apa' ma nakbitu natuin anin paha snaen.

⁷Oke te ane kase le an apa' nane an ol nan ane pune hitu le manesa. Nalali onane te kesel naskek ma anfen fun in nahin nak in nananai nalali.

⁸Anbi nok-nokfa kesel in nekan na'unu. Es nane te in anlenu ma no'en ale atoni aban nanait ma atoni ahinet sin anbi pah Mesir. Ma in naton in nanait neu sin, mes kan mu'i fa atoni mese amsa hen sefi in oten.

⁹Nalali te atuthaes mninut nane nak neu kesel nak, “Anbi neno le i ho ate kau he utebes ho ate au sanat.

¹⁰Anbi ahunut Usi hom kas atuthaes utunu' ma neu ho ate kau, oke te natam kai anbi o'of, anbi nakaf apao sonaf in ume.

¹¹Anbi fai mese hai nua kai minanai, ma hai nanait nane in oten ka namnes fa.

¹²Atoni munif mese na'ko pah Ibrani in nok kai anbi nane. In anfani atuthaes neu nakaf apao sonaf nane. Hai miton hai nanait nane neu in, oke te in ansefi hai nanait in oten.

¹³Namneo ale sa' nane namnes onle in naton nani, esle': Au Usi ho mufani kau neu au toko anbi afi unun, mes ho mumate atuthaes utunu' nane.”

¹⁴Es nane te kesel anlenu naiti Nai Yusuf, ma nok nane amsa napoitan in na'ko o'of. Leka' Nai Yusuf an eu nalali ma in seka blua pake sin, in nao ma anhake anbi kesel in matan.

¹⁵Kesel nak neu in nak, “Au unanai ulali, ma ka tit fa atoni mese le nabe'i hen sefi in oten. Anmu'i atoni le naton kau nak ho mube'i muton nanait in oten.”

¹⁶Nai Yusuf natae nak, “Ka ho ate kau fa, koi au Usi, mes Uisneno es ansefi nok amneot.”

¹⁷Oke te kesel nak, “Au unanai nak au hake anbi Noe Nil in ninen.

¹⁸Oke te bijae hitu apokat, ma aon naklima anpoi na'ko noe nane, ma nekun hun anbi noe in ninen.

¹⁹Namuni te bijae hitu anpoi anteni, le anmeta ma alha pasu es an amu nuif. Au fe ka it fa bijae le'uf onle nane anbi pah Mesir.

²⁰Bijae ametos sin nane an ol nan bijae hitu apokat sin nane.

²¹Mes nalali onane amsa bijae anmetos sin nane fe anmeto nabalah. Oke te au uskek na'ko au tupas.

²²Namuni te au tup a'fani ma au unanai teni, nak au it ateni ane kase pune hitu le manesa ma namnatu anpoi anbi tlaef mese.

²³Oke te ane kase pune hitu le an apa ma nakbitu natuin anin pana snaen es anfu anpoi anteni.

²⁴Ane kase an apa nane an ol nan ane kase le manesa. Au uton ulali au nanait nane neu ale' mnane ma ahin sulat mes kan mu'i fa atoni mese amsa le nabe'i hen sefi in oten.”

²⁵Oke te Nai Yusuf nak neu kesel nak, “Nanait nua in nane sin oten namnes; Uisneno naton nalali neu au Usi ko neu sa' le of In anmo'e nani.

²⁶Bijae apokat hitu nane esle' ton hitu, ma ane kase pune hitu manesa nane esle' ton hitu amsa; sin nua sin oten namnes.

²⁷Bijae hitu le' anmeto, le anbol namuni nane, ma ane kase pune hitu an apa' ma akbitu le anin mnela snaen anfu nane esle' tabu amnahas anbi ton hitu in nanan.

²⁸Onle au uton ulali neu au Usi ko, Uisneno of nalile nani sa' le of Usi ko anmo'e nani.

²⁹Of anmu'i ton hitu le nahenu nok athoes anbi pah Mesir le i anfun natef.

³⁰Nalali onane te ton hitu le nahenu nok amnahas nane of anbol, ma anikan nani tabu le nahenu nok athoes, natuin tabu amnahas nane nae le'uf kun talantia pah le i in luman kun.

³¹

³²Ho nanait nane Usi anbol haef nua, nane anfani on etus ma tonas nak lasi nane Uisneno anlek ma anlulu nalali ma Uisneno of natiab nani nok manoe.

³³Es nane te, leko au Usi ko ambeti man atoni ahinet ma nek alekot mese ma amfe kuasat neu in hen painote pah le i.

³⁴Au Usi ko so ho maiti ameput-ameput bian anteni, ma amfe plenat neu sin he nati' nibun batis nim na'ko ale ane kase in fuan anbi ton hitu in nanan le nahenu nok athoes nane, ma nabuab anbi kot-kot ma anpanat nani.

³⁵

³⁶Ane kase nane anfani loitan ma balab anbi ton hitu tabu amnahas nem anbi pah Mesir. Nok nane te to of kan mate fa natuin amnahas.”

³⁷Kesel ma ale in ameput sin ansimo Nai Yusuf in salit nane.

³⁸Oke te kesel nak neu sin nak, “Hit of ka tapeni fa atoni bian le naleko nesi na'ko Nai Yusuf, natuin Smanaf Uisneno es antopu in.”

³⁹Es nane te kesel nak neu Nai Yusuf nak, “Uisneno naton nalali ale lasi nane neu ko, nok nane natonon nak ho es muhin amnesi ma nek leko ko na'ko sekau ma sekau amsa.

⁴⁰Of au aiti ko amfani Kumlol, ma ale au to sin of natuin ho plenat. Alkun au kuasat es anfinin ko.”

⁴¹Nalali te kesel napoitan kleli mese na'ko in kalulun le anlun nani neki taka plenat, ma antao nani neu Nai Yusuf in kalulun ma in namolok nak, “Nok le i au aiti ko amfani Kumlol anfun natef pah Mesir ok-oke.” Nalali te napakeb Nai Yusuf sobalu betkone mese le anmo'e na'ko abmuti manula, ma antao neune heke mnatu mese neu in to'an.

⁴²

⁴³Oke te in anfe neu Nai Yusuf aklet plenat no nua neu he nati' in ansae, ma apanat apaot neu kesel sin nao nahunun aklet nane ma sin anhunun nak, “Ampantom! Amfe lanan! Amle lanan!” Onle nane naiti Nai Yusuf anfani Kumlol anfun natef pah Mesir ok-oke.

⁴⁴Kesel nak neune nak, “Au le i kesel kau — ma au etun ma uton ak kalu ho kam fe fa sona atoni mese amsa anbi pah Mesir le i anfun natef of kan mo'e fa sa'-sa'.”

⁴⁵Oke te kesel anfe neu Nai Yusuf kanaf Mesir mese, esle' Nai Zafnat-Paaneah. Onane amsa in anfe neune fenai mese le in kanan bi Asnat, Nai Potifera in anah le anfani ana' fuat anbi kot Heliopolis. Nai Yusuf in nan ton bo'tenu tabu in nauba in mepu neu kesel Mesir. Ma Nai Yusuf anpoi na'ko kesel in sonaf ma in nao anfun natef pah le nane.

⁴⁶

⁴⁷Anbi ton hitu in nanan le nahenu nok athoes nane, nain napoitan in nesan no athoes.

⁴⁸Nai Yusuf in nibun ane kase nane ma nabuab anbi kot-kot. Anbi kot mese-mese in nibun ane kase na'ko lene-lene le anbi kot nane in ninen.

⁴⁹Ane kase le in nibun nane antu'an ma namfau, talantia Nai Yusuf kan tai nani fa, natuin in amfaun on asnaen anbi tasi in ninen.

⁵⁰Nahun na'ko tabu amnahas nane anbol, bi Asnat Nai Yusuf in fenai nahonis li'anmone anaet.

⁵¹Nai Yusuf nak, “Uisneno anmo'e kau talantia au nikan ale au nukat sin ma neu au ama in sufan.” Nok nane te in nakanab in anmone ahunut nane “Manasye”.

⁵²Ma in nak, “Uisneno anfe nalali neu kau li'ana anbi tabu au tam bi nukat in nanan,” oke te in nakanab in anmone kliko nane “Efraim”.

⁵³Ton hitu le nahenu nok athoes le pah Mesir antamis nane anfini ma ankon.

⁵⁴Ma ton hitu le nahenu nok amnahas nane anbol, namnes nok Nai Yusuf naton nalali. Amnahas anbol anbi pah nane anfun natef, mes anbi pah Mesir anfun natef anmu'i mnahat.

⁵⁵Leka to Mesir amnahas anbolan sin, sin antoti mnahat na'ko kesel. Oke te kesel anlenu sin nao neu Nai Yusuf ma anpao ale lekat lulut le Nai Yusuf of naplenat neu sin.

⁵⁶Leka amnahas nane antu'an ma anao piut anfun natef pah ok-oke, Nai Yusuf nasoitan ale lopo ma nasosa ane kase neu atoni Mesir.

⁵⁷Ale atoni na'ko pah pinan anfun natef sin nem neu Mesir hen sos ane kase na'ko Nai Yusuf, natuin amnahas nane nae le'uf anbi me-me.