Read Uab Meto KEJADIAN 42 Bible Online

KEJADIAN 42 - Uab Meto bible

KEJADIAN 42

¹Leka Nai Yakub in nen nak, anmu'i ane kase anbi Mesir, in namolok neu in anah sin nak, “Nansa' es him ta' ah ka?

²Au nen ulali nak anmu'i ane kase es pah Mesir; him nao nai neu bale nane ma amsos ane kase he nati' kaisa hit atmate natuin amnahas.”

³Oke te Nai Yusuf in tataf sin bo'mese nane sin nao ma ansos ane kase anbi pah Mesir.

⁴Mes Nai Yakub in ka nafetin fa Nai Benyamin, Nai Yusuf in olif honi he nao nabua nok sin, natuin in namtau kaisa-kaisa in anmone napeni amle'ut.

⁵Natuin amnahas anbi pah Kanaan, Nai Yakub in anah sin nok atoni amfaut bian sin nem ma ansos ane kase anbi Mesir.

⁶Nai Yusuf le anfani Kumlol anbi pah Mesir, in es nasosa ane kase neu atoni-atoni na'ko pah pinan funam natef. Es nane te Nai Yusuf in tataf sin nem ma nabes anbi in matan.

⁷Leka Nai Yusuf naiti in matan ma ankiso in tataf sin, in nahin sin, mes in anmo'e son onle in ka nahin fa sin. Nok han a'seke in natan sin nak, “Hi atoni me ka?” Sin natae nak, “Hai atoni Kanaan. Hai aim hem sos amnahat.”

⁸Maski Nai Yusuf nahin in tataf sin, mes sin ka nahin fa in.

⁹Oke te in namnau nafani in nanait antom sin. Ma in nak neu sin nak, “Hi atoni a'mata ki; hi aim he mimat hai pah in olet esme.”

¹⁰Sin natae nak, “Kahaf, koi hai Usi,” sin natae nak, “Hai le i ho ate kai le hai aim alkun neu hem sos amnahat.

¹¹Hai le i ma oil tatan, koi Usi. Hai le i atoni-atoni alekot kai, hai ka atoni a'mata kai fa.”

¹²Nai Yusuf nak neu sin nak, “Hi mipoibom! Hi aim he mimat hai olet anbi pah le i.”

¹³Sin natae nak, “Koi hai Usi, hai ma oil tatan bo'es am nua, hai amaf mese anbi pah Kanaan. Atoni mese na'ko kai anmate nalali ma le kliko nane tabu le i in nok hai ama.”

¹⁴“Namneo teb onle au ak,” Nai Yusuf natae, “hi le i atoni a'mata ki.

¹⁵Au he su' ki: Au sup natuin kesel in kanan nak hi of ka misaitan fa pah le i kalu hi olif kliko nane hi ka meki fa in nem.

¹⁶Atoni mese na'ko ki mes anfani he nunan in. Le bian of nabalah talantia hi molok nane natonon. Kalu kahaf, nok kesel in kanan, hi le i atoni a'mata na'ko musu!”

¹⁷Namuni te natam sin neno tenu anbi o'of in nanan.

¹⁸Leka neno tenu onane te Nai Yusuf nak neu sin nak, “Au atoni nek amtaus ma nek aki'at neu Uisneno. Au of ufetin ki nok lasi mese.

¹⁹He nati' natonon nak hi le i nek amneot ki, atoni mese na'ko ki nabalah o'of in nanan; le bian nabe'i anfani neki ane kase le him sos neu hi ume nanan le antoman amnahas.

²⁰Nalali onane te so hi meki hi olif kliko nane nem neu kau. Nane anfani taka' nak hi molok nane namneo, ma au of ka umate ki fa.” Sin ansimo fekat na'ko Kumlol nane.

²¹Oke te sin namolok es neu es nak, “Namneo, tabu le' i hit tapeni kasat natuin hit sanat neu hit olif anbi afi ahunut; in antoti tuntakus mes hit kat simo fa, maski nak hit tit in nukat. Es nane te tabu le i hit atam anbi nukat.”

²²Nai Ruben nak, “Ai afi anbi ahunut au ka uton ulali fa neu ki he nati' kaisa atmo'e sa'-sa' neu li'ana nane. Mes hi kam nen kau fa. Leku le i in amaten anseun banin nafani neu kit.”

²³Nai Yusuf nahin sin a'at, mes sin ka nahin fa lasi nane, natuin sin namolok nok Nai Yusuf nane atoni mese es nateun sin a'at.

²⁴Nai Yusuf nasaitan sin, oke te in ankae. Leka in namepan nafani in nekan anteni, in anfani nem neu sin, oke te in naiti Nai Simeon, ma anlenu anfutu in anbi sin matan.

²⁵Nai Yusuf anfe plenat he nati' nalai ane kase neu ale kalo le in tataf sin neki, ma es-es in noni antao nafani neu kalo-kalo nane. Ma anfe mnahat neu sin amsa anfani bukae anbi lanan. Ma plenat nane sin nanaoba nani.

²⁶Nalali onane te Nai Yusuf in tataf sin nasaeba ane kase le sin ansos neu sin bikase luke mnanu sin, ma sin anpoi ma an nao na'ko bale nane.

²⁷Anbi bale le sin antup anbi fai nane, es na'ko sin ansefi in kalo ane kase hen hao in bikase luke mnanu. Ma in nit in noni anbi ane kase nane in fafon.

²⁸In nak neu in biaf sin nak, “Au noni sin anfe nafani,” in an anbai neu in biaf sin. “Amkiso, es au kalo in nanan!” Sin nekan anmofu, ma nok nek amtaus sin an matotin es nok es nak, “Sa' es Uisneno anmo'e neu kit ka?”

²⁹Leku sin antia Kanaan, sin naton ale sa' le sin naeku nokan neu sin amaf.

³⁰Sin nak, “Kumlol pah Mesir namolok nok kai nok nek maputu ma in anlek kai nak haim fani atoni a'mata neu in pah.

³¹Hai mitae mak, ‘Hai atoni nek alekot kai, hai nek amneot kai, ma hai ka a'mata kai fa.

³²Hai alkai maola tatan ma hai bo'es am nua, ma hai amaf mese, ma es na'ko kai anmate nalali, ma hai olif kliko namaika nok hai ama anbi Kanaan.’

³³Kumlol nane in nak, ‘Au lomi he su' ki he uhin namneo ka hi atoni nek muti ki: Atoni mese na'ko ki mes nabalah; le bian nabe'i anfani neki ane kase neu hi ume nanan le antoman amnahas.

³⁴Leka him fani aim hi meki hi olif kliko nane, au of uhin ak hi ka atoni a'mata ki fa mes hi atoni nek muti ki. Ma hi biaf le nabalah le i of au fe ufani neu ki ma nabe'i hi mimaika ambi pah le i ma au ufetin ki he hi misosa nok menuan.’ ”

³⁵Namuni te, anbi tabu nasoni nalali sin kalo, sin nit es-es in alu le matua nok noni; oke te sin namtau nae le'uf, ma sin amaf amsa.

³⁶Oke te sin amaf nak, “Hi mo'e kau talantia au uneku au anah sin ok-oke. Nai Yusuf ka esan fa anteni; Nai Simeon ka esan fa; me leku le i hi he meki amteni Nai Benyamin amsa. Au nu'ut lo mafena nae le'uf kun!”

³⁷Oke te Nai Ruben nak neu in amaf nak “Muna'at Nai Benyamin neu kau, Ama; of au okan anfani nem, kalu kahaf, Ama nabe'i ho mumate au anmone nua sin.”

³⁸Mes Nai Yakub in nak, “Kahaf! Hi ka nabe'i fa he hi meki Nai Benyamin; in tataf anmate nalali ma alkun in es nabalah. Kaisa-kaisa in napeni amle'ut anbi lanan nane. Au umnasi ulali, ma nek nu'ut le of hi meki of neki lasi maten neu kau.”