Read Uab Meto KEJADIAN 43 Bible Online

KEJADIAN 43 - Uab Meto bible

KEJADIAN 43

¹Amnahas anbi pah Kanaan nane antu'an ma nao piut, ma leka Nai Yakub in ume nanan sin nalali ale ane kase le neki na'ko Mesir, Nai Yakub nak neu in anah sin nak, “Amnao amteni nai meu bale nane ma amsos amteni ane kase neu kit.”

³Oke te Nai Yehuda nak neune nak, “Kumlol pah Mesir anfe nalali han amnaut nok mafena nak hai ka nabe'i fa hem hake anbi in matan kalu hai ka mokfa hai olif nane.

⁴Kalu Ama ho mufetin hai oli nane he in nok, hai amsa of amnao neu bale nane hem sos amnahat.

⁵Mes kalu Ama ho ka mufetin fa Nai Benyamin he nok, hai kam lomi fa hem nao, natuin Kumlol nane in nak nalali neu kai nak ka nabe'i fa he haim hake anbi in matan kalu hai olif nane ka nok fa.”

⁶Nai Yakub in nak, “Nansa' es hi misusab kau ma hi mitonan atoni nane mak hi fe amu'i amteni olif?”

⁷Sin natae nak, “Atoni nane in natan piut-piut neu kai ma neu hit ume nanan, nak, ‘Hi Ama fe anmoni ka? Ai hi fe amu'i amteni olif li'anmone ka?’ Nok nek mafena hai mitae ale in han totis sin. Hai ka mu'i fa tenab mak in of anlenu kai he hai meki hai oli nane ka?”

⁸Oke te Nai Yehuda nak neu in amaf nak, “Mufetin li'ana nane he nok, ma au es a'sutai neu in. Hai of amfen ma amnao esle' i he nati' es na'ko kit kaisa anmaten amnahas.

⁹Au of a'lelnok natuin in, ma Ama nabe'i ho mutoti in na'ko kau. Leka au ka eki ufani fa in nok aomina, au es a'sutai in kasat anbi au neno monit sin.

¹⁰Oni bati hit he ta' eo'bok fa, leku le i hai mioni hae nua nalalien.”

¹¹Oke te sin amaf nak, “Kalu namneo mes he onle nane, hi maiti na'ko pah le i in afan alekot amtao anbi hi kalo sin nanan ma hi meki anfani tulu neu Kumlol nane: Mina a'set akle'o, oni hau, atu fomeni, fenu, ma hau bubuk in fuan.

¹²Meki noni amsa kuni nua, natuin noni le hi mipeni anbi hi kalo nanan nane so mes him fe mifani. Oni nane anfani lasi akmanat mese.

¹³Meki hi oli nane ma nati' him fani aim labah.

¹⁴So nati' Uisneno Akuasat Afin-finit anmo'e Kumlol nane he nati' in naton in manekan neu ki, talantia in anfe nafani ki Nai Benyamin ma Nai Simeon neu ki. Neu au le i, kalu namneo au he uneku au anah-anah sin, neu au he ak sa'.”

¹⁵Namuni te Nai Yusuf in biaf sin neki ale tulu nane ma noni kuni nua, oke te sin anfen ma nao neu Mesir nok Nai Benyamin. Leka sin antia bale nane, sin anao ma anhake anbi Nai Yusuf in matan.

¹⁶Leka Nai Yusuf in nit Nai Benyamin nok in tataf sin, in namolok neu in atuthaes le anfani nakaf anbi in ume nanan nak, “Meki atoni-atoni nane neu au ume. Sin of anbukae nok kau anbi neno le i, es nane te amlolo mu'it mese ma muloitan mani.”

¹⁷Atuthaes nane nanaoba plenat nane ma in neki Nai Yusuf in biaf sin neu Kumlol in ume nanan.

¹⁸Leka neki sin neu Nai Yusuf in ume nanan, sin namtau ma natenab nak, “Neki kit neu bale i, natuin noni le hit tapeni sin anbi hit kalo sin anbi tabu hit tem anbi ahunut anbi bale i. Sin of anheke kit nok askeken, oke te sin naiti hit bikase luke mnanu sin ma sin anmo'e kit atfani sin ate.”

¹⁹Es nane te, leka sin anhaumak Nai Yusuf in ume enon, sin nak neu nakaf ume nane nak,

²⁰“Koi Usi, hai afi aim mit meu bale i hem sos amnahat.

²¹Anbi tabu haim nao amfani, leka hai hem tup, hai ampukai hai kalo sin. Hai miskek natuin noni le haim baen ane kase nane nabelkok anbi ane kase fafon. Hai ka mihin fa neu sekau es antao nafani noni nane. Tabu le i hai meki mifani sin neu ko Usi. Nesi na'ko nane amsa hai meki noni hem sos amteni mnahat.”

²³Atuthaes nane nak, “Kaisa mimtau. Kaisa mioleb hi nekam. Hi Uisneno, le hi ama naluli ma nabes neune, In es antao nafani noni nane neu hi kalo nanan. Au simo ulali noni le him baen ane kase le nane.” Namuni te neki Nai Simeon neu sin,

²⁴oke te neki sin antam neu ume nanan. In anfe neu sin oe hen boe sin haen, ma mnahat neu sin bikase luke mnanu sin.

²⁵Nalali te sin naloitan tulu he nati' anfe nani neu Nai Yusuf, leka in nem anbi manas namtetu, natuin naton nalali sin nak of sin anbukae nok in.

²⁶Leka Nai Yusuf in nem antia ume, sin naluli ma nabes neu in ma sin anfe tulu-tulu nane neu Nai Yusuf.

²⁷Nai Yusuf in natan neu sin monin ma in nak, “Hi miton milali neu kau neu hi ama le namnasi nalali nane. In aomina ka? In es alekot ka?”

²⁸Sin natae nak, “Usi ho ate, hai ama, in es aomina.” Oke te sin naluli ma nabes neu in.

²⁹Leka Nai Yusuf ankiso nit Nai Benyamin, in olif, in nak, “Le i hi olif kliko nane, le hi miton milali neu kau? So nati' Uisneno anfe nani tetus neu ko, au anah.”

³⁰Nai Yusuf in nekan antu' natuin in namnau ma in anek in olif. In ala kle'ot kan pao nabe'i fa in aon, es nane te in anpoi na'ko bale nane nok askeken oke te in antam neu in ke'an ma in ankae.

³¹Leka in anboe nalali in human, oke te in anpoi anteni, in anhatani in nekan, ma in anlenu he naloitan bukae.

³²Nai Yusuf in anbukae natet'on anbi mei mese, ma in biaf sin anbi mei teta. Atoni Mesir le anbi nane sin anbukae anbi mei es anteni, natuin sin naben sin nabaunok leka sin anbukae nabua nok atoni Ibrani.

³³Nai Yusuf in biaf sin anbi mei le anmabaina nok Nai Yusuf, natokob sin natuin sin uan ton mese-mese, na'ko anaet talantia akliko. Leka sin ankiso fun natokob sin le nane, nok amkakat sin anmakison es nok es.

³⁴Anfe neu sin bukae na'ko Nai Yusuf in mei, ma antuthaes Nai Benyamin no nim anesin in tataf sin. Oke te sin anbukae ma sin ninu nabua nok Nai Yusuf talantia sin namsenan.