Read Uab Meto KEJADIAN 44 Bible Online

KEJADIAN 44 - Uab Meto bible

KEJADIAN 44

¹Namnes nok nane amsa Nai Yusuf anfe plenat neu nakaf anbi in ume nanan nak, “Mulai ane kase neu atoni-atoni nane sin kalo, fauk le sin nabe'i he neki, ma amtao mufani sin noni mese-mese neu sin kalo nanan, anbi ane kase in fafon.

²Amtao au klas noni mninut neu sin olif akliko in kalo, nok noni le in anbaen ane kase.” Atuthaes nane in nanaoba plenat nane.

³Anbi nokfa, fe nok-noka, Nai Yusuf an bait son nok in biaf sin, oke te sin anfen ma nao nok sin bikase luke mnanu.

⁴Sin fe ka nao na'lo fa na'ko kot nane, leku nane Nai Yusuf nak neu in nakaf anbi in ume nanan nak, “Amli'u mutuin atoni-atoni nane nai lab-lab. Leka ho mupeni sin, ho mutonan sin mak, ‘Nansa' es him senubanin alekot meki amle'ut?

⁵Nansa' es hi mibak au Usi in klas noni mninut? Klas nane in anpake he ninu ma anfani blua mahine lasi tolo'. Hi mo'e milali lasi amle'ut nae le'uf kun!’ ”

⁶Leka atuthaes nane napeni Nai Yusuf in biaf sin, in natiaba sa' le Nai Yusuf naplenat nalali neune.

⁷Sin natae neune nak, “Ho salit onme ka Usi? Hai nabe'i amsup natuin hai ka mo'e fa onane!

⁸Usi ho muhin nak noni le hai mit sin anbi hai kalo sin nanan anbi ane kase in fafon nane, hai amfe mifani milali sin neu ko. Es nane te, hai ka nabe'i fa he mibak noni muti ai mnatu na'ko Kumlol in ume!

⁹Usi, kalu ho mupeni blua nane anbi atoni mese na'ko kai, maut he ho mumate in, ma hai amfani Usi ho ate.”

¹⁰Atuthaes nane nak, “Alekot kun; mes alkun neu in le klas mninut nane mapeni anbin, in es anfani au ate; ma le bian nabe'i him nao amfani.”

¹¹Oke te nok manapat sin es-es nasanut ma anfai in kalo.

¹²Nai Yusuf in ate nane in antae naleko-leko kalo-kalo nane na'ko li'anmone nael in kalo antia li'anmone kliko in kalo, ma klas noni mninut nane napeni anbi Nai Benyamin in kalo nanan.

¹³In tataf sin nekan nasusbok talantia sin anpisu sin blua pake sin. Sin nasaeb nafani sin baut neu sin bikase luke mnanu sin ma sin anfani neu kot.

¹⁴Leka Nai Yehuda nok in biaf sin nem antia Nai Yusuf in ume, in fe anbi nane, ma sin naluli ma nabes neu in anbi in human ma in matan.

¹⁵Ma Nai Yusuf nak, “Nansa' es hi mo'e onle nane? Ai hi ka mihin fa nak atoni on le au le i nabe'i uhin hi mo'et amle'ut nok ale lasi tolo?”

¹⁶“Hai he mimolok onme ka hai Usi?” Nai Yehuda in natae. “Hai he mitae mak sa' ka ma he mineobom onme ka? Uisneno es naton nalali hai sanat. Leku le i haim fani ate neu ko Usi, ka alfa in le klas mninut nane napeni anbine.”

¹⁷Nai Yusuf in nak, “Kahaf! Au ka lomi fa he mo'e onane! Al in neu sekau le napeni klas nane in es of anfani au ate. Le bian nabe'i him fani neu hi ama.”

¹⁸Nai Yehuda in nao mat ma anhaumak nok Nai Yusuf ma in nak, “Umtausan ko, koi au Usi, mufetin ho ate kau he umolok fa oke au Usi ko. Kaisa muto'an ho ate kau; au Usi ko on Kesel Mesir neknon kun.

¹⁹Au Usi ho mutan mulali kai, ‘Ai hi fe amu'i amaf ai hi benuf bian?’

²⁰Hai mitae mak, ‘Hai ama nam nasi nalali leka nahonis hai olif. Hai olif in tataf sin aina mese nane anmate nalali, es nane te leku le i al in es fe anmoni na'ko sin nua sin, ma hai ama anek nis in.’

²¹Au Usi hom lenu kai he hai meki in nem neu bale i, he nati' hai Usi ko ho mit in,

²²oke te hai mitae mak li'ana nane ka nabe'i fa he na'lo na'ko in amaf; leka in na'lo na'ko in amaf, in amaf of anmate.

²³Namuni te au Usi ho mak, ‘Hi ka nabe'i fa hem hake anbi au humak au matak anteni kalu hi ka meki fa hi olif nane.’

²⁴Leka haim fani neu hai ama, hai mitonan Usi ho molok nane.

²⁵Nalali onane te hai ama anlenu kai hai aim amteni neu bale i hem sos amnahat.

²⁶Hai mitae mak, ‘Hai ka nabe'i fa hem nao neu bale nane, natuin ka nabe'i fa he haim hake anbi Kumlol in matan kalu hai oli kliko nane ka nok fa.’

²⁷Nalali te hai ama nak, ‘Hi mihin nak bi Rahel, au fenai nane in al nahoni li'anmone nua.

²⁸Le ahunut in nasaitan nalali kau. Namneo mu'i fui anpisu nalali in, natuin antia tabu le i au ka it ateni fa in.

²⁹Leka hi maiti amteni li'anmone kliko le i na'ko kau, ma anbol sa'-sa' neu in, hi mo'et nane neu kau of neki maten, natuin au le i umnasi ulali.”

³⁰“Es nane, koi au Usi,” Nai Yehuda nak neu Nai Yusuf, “kalu ho ate au fani neu hai ama ka okfa hai oli nane, namneo hai ama of anmate. In amonin naboni'on neu li'ana nane, ma in namnasi nalali talantia susal le hai meki nane of neki maten neu in.

³²Nansa' anteni, ho ate kau au manta'en ulali neu ho ate au ama ak ho ate kau of a'panat li'ana nane. Ho ate au ak neune, ak leka au ka eki fa li'ana nane anfani, ho ate kau es of asutai kasat nane anbi au neno monit.

³³Es nane, ho ate kau toti ko, koi Usi, mufetin ho ate kau he au umaika bi i ma fani ate neu ko Usi he seka hai oli nane; maut he in anfani nok in tataf sin.

³⁴Ho ate kau he nao fani onme ka neu hai ama kalu li'ana nane ka nok fa? Ho ate kau ka sutai ube'i fa snama le of antoman hai ama nane.”