Read Uab Meto KEJADIAN 46 Bible Online

KEJADIAN 46 - Uab Meto bible

KEJADIAN 46

¹Nai Yakub naloitan ale in mu'in nalali te in anfen ma in nao. Antia Bersyeba in natulu fua tulu neu Uisneno le in amaf Nai Ishak naluli nabes neune.

²Anbi mnitas mese in nanan anbi fai, Uisneno nak neune nak, “Yakub, Yakub!” “Koi, Uisneno,” Nai Yakub in natae.

³“Au le i Uisneno kau, Uisneno le ho ama naluli nabes neune,” In nak onane. “Kaisa ho mumtau neu hem nao neu Mesir. Au of umfaub ho sufam nane anfani uf mese le anaek anbi bale nane.

⁴Au of ko anbi lanan neu Mesir, ma Au of eki ho sufam nane anfani nem neu pah le i. Nai Yusuf of anbi ho aon bian leka ho tabu maten anbol.”

⁵Oke te Nai Yakub anfen ma anao na'ko Bersyeba. In anah sin nasaeb sin amaf ma sin anah ma sin fenai neu aklet le Kesel Mesir ansonu.

⁶Sin neki amsa mu'it ma ale sin a'mu'in le sin napeni anbi pah Kanaan, oke sin anfen ma sin anao neu Mesir. Nai Yakub neki ale in sufan, esle'

⁷ale in anah ma in upuf atoni ma bife.

⁸Nai Yakub in ume nanan le sin nok neu pah Mesir esle':

⁹Nai Ruben, in anmone nae; in anah sin: Nai Henokh, Nai Palu, Nai Hezron ma Nai Karmi.

¹⁰Nai Simeon; in anah sin: Nai Yemuel, Nai Yamin, Nai Ohad, Nai Yakhin, Nai Zohar ma Nai Saul, in anah na'ko in fenai na'ko Kanaan.

¹¹Nai Lewi; in anah sin: Nai Gerson, Nai Kehat ma Nai Merari.

¹²Nai Yehuda; in anah sin: Nai Syela, Nai Peres ma Nai Zerah, ma Nai Yehuda, esle' Nai Er ma Nai Onan anmate anbi Kanaan. Nai Peres in anah sin: Nai Hezron ma Nai Hamul.

¹³Nai Isakhar; in anah sin: Nai Tola, Nai Pua, Nai Ayub ma Nai Simron.

¹⁴Nai Zebulon; in anah sin: Nai Sered, Nai Elon ma Nai Yahleel.

¹⁵Sin al sin nane bi Lea in anah sin le nahonis sin neu Nai Yakub anbi Mesopotamia, naik na'ko nane in anfeto bi Dina. Es nane te Nai Yakub in sufan na'ko in fenai bi Lea sin alsin atoni bo'tenu am tenu.

¹⁶Nai Gad; in anah sin: Nai Zifyon, Nai Hagi, Nai Syuni, Nai Ezbon, Nai Eri, Nai Arodi ma Nai Arteli.

¹⁷Nai Asyer; in anah sin: Nai Yimna, Nai Yiswa, Nai Yiswi ma Nai Beria ma Nai Serah, sin fetof. Nai Beria in anah sin esle' Nai Heber ma Nai Malkiel.

¹⁸Atoni bo'es am ne le nane Nai Yakub in sufan na'ko bi Zilpa, ate bife le Nai Laban anfe neu bi Lea, in anfeto.

¹⁹Bi Rahel Nai Yakub in fenai in nahonis li'ana nua, esle' Nai Yusuf ma Nai Benyamin.

²⁰Anbi pah Mesir Nai Yusuf napeni anah nua, esle' Nai Manasye ma Nai Efraim na'ko in fenai bi Asnat; Nai Potifera in anfeto, le anfani ana fuat anbi Heliopolis.

²¹Nai Benyamin; in anah sin: Nai Bela, Nai Bekher, Nai Asybel, Nai Gera, Nai Naaman, Nai Ehi, Nai Mupim, Nai Ros, Nai Hupim ma Nai Ared.

²²Atoni bo'es am ha nane Nai Yakub in sufan na'ko in fenai bi Rahel.

²³Es anteni Nai Dan; in anah Nai Husim.

²⁴Nai Naftali; in anah sin: Nai Yahzeel, Nai Guni, Nai Yezer, ma Nai Syilem.

²⁵Atoni hitu sin le nane Nai Yakub in sufan na'ko in fenai bi Bilha, ate bife le Nai Laban anfe neu in anah bi Rahel.

²⁶Nai Yakub in sufan le sin nao neu pah Mesir sin alsin atoni bo'ne am ne, kan so'i natam fa in nanef sin.

²⁷Nai Yusuf in anah sin le nahonis sin anbi Mesir nane sin atoni nua, es nane te Nai Yakub in ume nanan le antia Mesir sin alsin atoni bo'hitu.

²⁸Nai Yakub in anlenu Nai Yehuda anao nahunun in he no'en Nai Yusuf he naeku nok in amaf anbi Gosyen. Leka sin nem antia Gosyen.

²⁹Nai Yusuf ansae neu in aklet he naeku nok in amaf anbi nane. Leka sin naeku, Nai Yusuf anho nan in amaf ma in ankae lo le'uf.

³⁰Nai Yakub nak neu Nai Yusuf nak, “Anbi leku le i au lomi he mate, natuin au it ulali ko ma au uhin nak ho fe amoni.”

³¹Oke te Nai Yusuf nak neu in biaf sin ma in-ini sin bian nak, “Au mes anao he utonan kesel ak au biaf sin ma au in-ini sin le namaika anbi Kanaan sin nem nalali.

³²Au of utonan ak hi atukus bibi kase ma bijae, ma hi meki hi mu'it ma abnak nem nalali.

³³Leka kesel anboin ki ma natan ki neu hi mepu,

³⁴mitonan in mak na'ko hi mibau hi le i atukus mu'it ki, namnes onle afi hi am uf sin. Nok nane in of anlenu ki he mimaika anbi pah Gosyen.” Nai Yusuf namolok onane natuin atoni Mesir sin nanebtok leka sin nabua nok atukus-atukus.