Read Uab Meto KEJADIAN 49 Bible Online

KEJADIAN 49 - Uab Meto bible

KEJADIAN 49

¹Nalali onane te Nai Yakub no'en in anah sin ma in nak, “Mibuaom aim neu i, amhaumak kau. Au of uton neu ki ale sa' le of hi mieku mokan anbi neno amunit:

²Amnibunom nai, hoi Nai Yakub in anah-anah sin, amnen nai Israel, hi ama.

³Nai Ruben, ho au anmone nael, ho le nane au be'ik au matanik, fuaf ahunut na'ko au matanik, fuaf ahunut na'ko au matanik. Ho mumas amfini ma abe'it anesit na'ko ale au anah sin ok-oke.

⁴Ho mune'o onle oe, talantia ho ka ahunut ko fa; natuin hom tup mubua mok au fe kliko, ho mulahi mulali ho ama in hala tupa.

⁵Nai Simeon ma Nai Lewi hi maoil tatan; sin bale manuat nane afani blua makenat mabe'ut.

⁶Au of ka tam oke fa anbi sin salit, ma of ka tam oke fa anbi sin buat in nanan amsa. Natuin anbi sin nek to'as in nanan sin namate atoni, sin na'oleb bijae fui neu sin nek malinat.

⁷Kasat neu sin to'as nane, natuin nae le'uf kun. Kasat neu sin nek maputu nane, natuin maneun le'uf kun. Au of usitab ma usana sin anbi Israel ok-oke. Au of a'kaki ma kifun sin neu ale' uf sin atnanan.

⁸Nai Yehuda, ho of amheke ho musu sin anbi sin a'kon; ho biaf sin of anpules ko ma naluli nabes anbi ho matam.

⁹Nai Yehuda in onle meo asu tipu'; in namate in musu sin, oke te anfani kun neu in kuna; in of namateson ma antup, ma kan mu'i fa atoni mese amsa le nabe'i hen li'u in.

¹⁰Nai Yehuda in of es ana' tias aplenat, in sufan nane es of naplenat tal nabal-bal. Uf-uf of sin neki noni puni, ma naluli nabes nok amtaus anbi in matan.

¹¹In bikase luke mnanu ana in anfutun neu hau, hau tua min kase amasat. In anfase in blua pake sin neki tua min kase, tua min kase le amtasa onle na'.

¹²In matan amtasa natuin in ninu tua min kase, in nisin muti natuin in ninu susu.

¹³Nai Zebulon of namaika anhaumak tasi; ale bnao of anhake anbi in tasi ninen; in pah nane of an nakat nok Sidon.

¹⁴Nai Isakhar nane in onle' bikase luke mnanu abe'it le antup anbi baut-baut sin atnanan.

¹⁵In ankiso bale nane leok le'uf kun ma pah nane lo in namas kun, es nane te in anluin ma an lomi he nasaeb baut mafena neu in benan, ma naseke in hen mepu on ate.

¹⁶Ho Nai Dan, ho of mufek ho uf sin lasi, hom fani uf mese onle uf bian anbi Israel.

¹⁷Ho onle kauna anbi lanan in ninen, kaun laso anbi lolok in ninen, le anlau bikase in haen tikan talantia anpolin in asaet nane.

¹⁸Koi UISNENO, honis le Hom fe nane, es au hat ma pao.

¹⁹Nai Gad, atoni asikat sin of anmaken nok ko, mes of ho mubain'om ma musik mufani sin.

²⁰Nai Asyer, ho bukae nane of nathoe, ho of muloitan bukae neu kesel sin.

²¹Naftali, ho onle lus le nafetnon, in anah-anah sin namas anfin kun.

²²Nai Yusuf, onle bikase luke mnanu tipu', bikase luke mnanu fui le anhaumak oe mata, le na oin-oin son anbi tubu in un.

²³Musu anken in nok matani, anli'u in neki aklaot ma as'anef.

²⁴Mes Nai Yusuf in niman nahel ma namep, in as'anef sin namep piut, natuin kuasat Atukus Abe'it Anesit. Nai Yakub in Uisneno, Aneot Ahafot Israel.

²⁵Ho ama in Uisneno antuntaku ko; Uisneno Akuasat Afin-finit anfe ko tetus neki ulan na'ko neno tunan ma oe na'ko pah pinan in nupun. Nok li'ana ma bijae,

²⁶ane kase ma tuna. Tetus na'ko ho ama in Uisneno nesin bnak ma mu'if tubu-tubu le namnasi nalali. So nati' ale tetus nane ansanu neu Nai Yusuf in nakan, neu in ilan. In es mabeti na'ko in biaf sin atnanan.

²⁷Nai Benyamin nane asu fui apisut. Anbi nok-noka in anheke in musu. Anbi fai in anbati.”

²⁸Le nane uf Israel sin bo'es am nua, ma uab a'at le sin amaf namolok nani leka in anfe han seon neu sin mese-mese.

²⁹Nalali onane te Nai Yakub anba'an in anah-anah sin nak, “Ka lo fa anteni of au nao fani onle au am uf sin. Nati' amsub kau anbi sin aon bian anbi Nuat Makhpela, aon neno saen Mamre anbi Kanaan. Nai Abraham in ansos nalali nuat ma mnela anbi in aon bian na'ko Nai Efron atoni Het hen fani nate naukel.

³¹Anbi nane ansub Nai Abraham ma bi Sara, Nai Ishak ma bi Ribka; ma anbi nane amsa au sub bi Lea.

³²Mnela ma nuat le anbi nane au sos na'ko atoni Het. Amsub kau anbi nane amsa.”

³³Leka Nai Yakub anba'an nalali in anah sin, in antup oke te in anmate.